其實市面上好多信用卡都免年費，不過免年費都有兩種，一種係真正完全永久免年費，另一種係豁免頭幾年，然後要你打上去waive年費。論方便當然係永久免年費，而現時嘅永久免年費信用卡，在功能上同埋回贈率上已經愈來愈好，有啲甚至仲好過收年費嘅信用卡，今次筆者就同大家比較下！
Table of Contents
永久免年費信用卡2024
以下係現時市面大部分永久免年費信用卡嘅年薪要求同埋特色優惠比較。（資料截至2024年4月11日）
| 信用卡 | 類別 | 年薪要求 （HK$） | 特色優惠 |
| 渣打銀行 | |||
| 渣打Smart信用卡 | VISA | $96,000 | 指定商戶高達5%現金回贈；免外幣交易手續費 |
| 渣打Q Credit Card | VISA | $96,000 | 淘寶0%手續費；特約商戶及外幣簽賬高達5%現金回贈 |
| 滙豐銀行 | |||
| 滙豐Red信用卡 | MasterCard | $120,000 | 網上簽賬高達4%「獎賞錢」回贈 |
| 恒生銀行 | |||
| 恒生MMPOWER | MasterCard | $150,000 | 外幣簽賬高達6% +FUN Dollars回贈；網上簽賬高達5% +FUN Dollars回贈 |
| 恒生MUJI Card | VISA | $150,000 | 無印良品高達5% MUJI Dollars回贈 |
| 恒生enJoy | VISA | $150,000 | 4倍 yuu積分獎賞 |
| 恒生Travel+ | VISA | $150,000 | 外幣簽賬高達7％ +FUN Dollars回贈 |
| 中銀香港 | |||
| 中銀Chill Card | MasterCard | $150,000 | 指定商戶高達10%現金回贈；海外及網上高達5%現金回贈 |
| 中銀淘寶World | MasterCard | $150,000 | 淘寶0%手續費；免外幣交易手續費 |
| Citibank | |||
| Citi The Club | MasterCard | $120,000 | 指定商戶高達4%簽賬回贈 |
| 中信銀行(國際) | |||
| Motion信用卡(虛擬版) | MasterCard | ／ | 食肆及網上簽賬高達6%現金回贈 |
| 建行(亞洲) | |||
| eye Visa Signature | VISA | $150,000 | 食肆、交通及海外簽賬高達11%現金回贈 |
| 京東信用卡 | MasterCard | $150,000 | 網購高達4%現金回贈 |
| 八達通車生活 | 銀聯 | $150,000 | 泊車及「易通行」每月高達HK$100回贈；內置八達通功能 |
| AEON | |||
| WAKUWAKU | MasterCard | ／ | 網上簽賬高達6%現金回贈 |
| 富邦銀行 | |||
| 一田Visa白金卡 | VISA | $60,000 | 一田百貨全年獨家折扣 |
| 一田 X 熊本熊 | VISA | $80,000 | 一田百貨全年獨家折扣；日本簽賬5X積分 |
| Mox | |||
| Mox Credit | MasterCard | ／ | 無上限高達2%現金回贈；超市3%現金回贈 |
嚴選3張必備永久免年費信用卡
渣打Smart信用卡：旅行必備 + 百佳 / HKTVmall 必備
如果你去旅行，應該都煩惱過要碌邊張信用卡好，一來匯率又難計，二來又驚有好多手續費。咁情況筆者一定會推薦你碌渣打Smart信用卡，首先佢係少數完全唔收外幣交易手續費嘅非銀聯卡（其他非銀聯卡要收大約1.98%手續費，另外中銀淘寶World萬事達卡都唔收），即是話你在外國簽卡除匯率外並無任何額外成本，二來佢係Visa，基本上全世界都收（銀聯就未必喇），另外佢仲有無上限0.56%現金回贈幫你補返少少匯率差價，計返同你自己唱錢其實差唔多。
另外渣打Smart信用卡在香港都有用途，佢有指定商戶5%現金回贈，現時指定商戶包括百佳、HKTVmall、戶戶送、麥當勞、OK便利店等，有上限嘅，每年限簽HK$60,000，都好夠用啦。最後要講多句，佢個迎新都好癲，簽HK$4,000回HK$1,200，所以唔少人都會簽完迎新一年後cut卡過冷河，之後再申請過。
要講特別缺點，渣打Smart信用卡就唔多嘅，但佢一般回贈只得0.56%，就唔太適合做你惟一嘅信用卡，但出外旅行時，同埋指定商戶簽賬時，渣打Smart信用卡基本上係最好選擇。
滙豐Red信用卡：網購必備 + 儲里數必備
永久免年費信用卡之中，滙豐Red信用卡可能係最普遍嘅一張，一來係滙豐銀行卡，二來佢都「神」咗好多年，係極常用嘅好卡。最大優點當然係網上簽賬4%「獎賞錢」回贈（建行(亞洲)京東信用卡都係同一個回贈率），不過回贈上限愈來愈少，現時每月上限回$500「獎賞錢」，比以前少好多，但仍然好過AEON WAKUWAKU、中銀Chill Card、信銀國際Motion信用卡(虛擬版)呢類高回贈率但低上限嘅網購卡。另外滙豐Red信用卡超市都有2%回贈，其他簽賬1%回贈，留意呢1%係無上限，所以如你手上冇其他更高回贈嘅卡，你平時都可以合埋眼簽呢張。
第二個優點係，滙豐係年中最多信用卡優惠嘅銀行，而且好多優惠可以雙食甚至三食（優惠+網上回贈+迎新），所以呢張卡你應該要有（非廣告）。
第三大優點好多人都會miss咗，就係「獎賞錢」可以換里數，所以滙豐Red信用卡其實係一張網上簽賬$2.5/里、超市簽賬$5/里、其他簽賬$10/里嘅里數卡，在永久免年費信用卡之中係最好，即使同要畀年費嘅里數卡比，亦都有贏有輸。
Mox Credit：大額消費必備
揀Mox Credit得1個原因，就係佢而家做緊嘅2%無上限但有條件嘅現金回贈，要求係你要擺HK$75,000入Mox戶口，定期唔計，要現兜兜，咁你就有2%無上限現金回贈喇！如果你冇擺錢，都仲有1%無上限現金回贈，但1%講真就冇必要特登去申請。留意返2%已經係全城最高，其他一係最高得1.5%（例如渣打Simply Cash），一係就有上限（例如EarnMore），Mox Credit仲要冇年費！
由於要擺成HK$75,000入去，變相就限制咗呢張卡嘅用途，細額簽賬係唔適合嘅。理由係現時12個月定期利率最高約4%，即是呢HK$75,000你一年可以賺到大約HK$3,000息，所以你擺入Mox去簽賬賺嘅現金回贈，必須要多過HK$3,000先有著數，換句話說你一年內要簽多過HK$150,000先開始贏到定期，所以呢張卡只適合簽大額消費，而由於佢係真無上限，所以只要你簽得夠多，市面上亦唔會有其他卡回贈更多！
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓