香港近年缺乏有實力嘅投資界明燈。以前嘅股壇明燈沈大師沈振盈，雖依然活躍，但燈力已弱，漸漸淡出股民注意範圍；永垂不朽嘅連登燈神麵咪媽，已早登極樂，離我地遠去；曾經最全面嘅燈神燒生蕭若元，可能仲係好靈，不過已移居台灣，無力影響香港太多；破壞力最大嘅廣告殺手成龍，以往逢代言完必燈死品牌，多年未見有新作，已潛水休息。
雖然係咁，但香港人需要在投資苦海中尋找反指明燈時，依然仲有。事關明燈界人才輩出，近年就有兩個極速上位嘅明燈，值得大家借鏡，兩位都係來自大台嘅女藝人，今次就等筆者向大家介紹佢地嘅威水史！
Table of Contents
2023香港最大明燈：莊鍶敏
係人都知，莊鍶敏係拿督個女，聽個名就知道有錢，究竟點解一個有錢人，竟然可以不斷睇錯市做錯決定，去到成為投資界明燈嘅地步，而仍然繼續投資落去呢？呢個係個不解之謎。不過講到明燈界第一人，相信大家都唔會對莊鍶敏呢個人選有咩異議。
莊鍶敏可以用掂乜衰乜嚟形容，以下簡要地回顧佢嘅主要戰積。莊鍶敏有做過唔少次生意，例如開點心店、時裝店，全都蝕錢收場，最出名係2014年佢開嘅經理人公司（簽過王晶個女王子涵架）及化妝學校結業，蝕近200萬。做生意唔成，買磚頭都可以蝕，私人樓買過加多利軒，買完就成為「蝕讓之城」；買舖仲甘，2021年佢同朋友夾份買嘅銅鑼灣商場舖位，持貨16年最終勁蝕近七成，果然眼光獨到。其他投資又點呀？
犀利喇，今年未完，已連爆兩鑊，諗住「低吸」的士牌收息，冇幾耐之後的士牌價即跌穿400萬心理價位；投資加密貨幣，又被凍6位數字資產，仲因為做過宣傳成為嫌疑人，不停被人狙擊，問係咪飛返大馬著草。
呢個世界唔識投資而損手爛腳者大有人在，莊鍶敏犀利在佢唔止會講你知你投資啲乜，仲直頭會用一個專家／KOL嘅姿態同你講解佢嘅投資心得，所以就算JPEX事件完結後大家都唔使驚，我相信佢一定會繼續發揮明燈效用，繼續推廣錯誤嘅投資心得，造福港人。
2023香港第二明燈：肥媽
個人形象上，肥媽係眾人眼中嘅媽媽，皆因鍾意肥媽嘅人會「呀媽呀媽」媽媽聲咁叫佢，唔鍾意佢嘅人，亦都一樣會媽媽聲鬧佢。大家都知肥媽好搵得錢，正財不停入，但又知唔知，或記唔記得，其實肥媽偏財方面，尤其係投資上，完全係敗緊自己副身家？
冇錯最近嘅Jpex事件，肥媽都有份，但呢單唔係肥媽第一次投資出問題。話說大約10年前，肥媽本來就退咗休架喇，佢在訪問講，當時揸住4、5千萬現金積蓄，可以舒服退休。點知退休後3年唔夠，2017年就因為投資科技股而輸咗5千萬（佢講，唔知有冇誇大），隻股叫做德普科技（3823.HK），現已除牌，肥媽當年仲幫過佢做代言。
陰功，2016/17年買科技股可以蝕到5千萬，都算係奇人，佢夠膽all in都真係好嘢。加上佢早兩年係咁叫人買中山樓，仲話自己同屋企人都買好多，如果係真相信而家都蟹晒，然後再到JPEX拍宣傳片事件，可以見到肥媽個Portfolio愈來愈猛料，如果莊鍶敏唔keep住，頭位好快會被肥媽追過。
好在肥媽講嘢一向都唔易消化，好似佢會話方艙好住過私家醫院（但自己中招又唔入去住），又或者教你食淡水魚刺身，你都聽得出佢講嘢好多時都係貪嗰一刻口爽，係正常人都唔會信晒佢嘅建議啦（不過間中都有例外，黃家強就曾經因為唔信家駒會寫歌俾肥媽，再加上唔夠Ram，而鬧錯肥媽）。相信真係跟肥媽落注而招致損失嘅受害者，應該係少數（唔係blame the victim，但如果你真係因為聽肥媽講而去讀Crypto課程，你都唔係省油的燈啦）。
點解林作做乜衰乜 都未算係明燈？
因為現時JPEX事件嘅熱度，相信一定會有人問，點解林作做乜衰乜都榜上無名？只能夠講，燈都要講能力，唔係人人都可以做到明燈。你睇返林作嘅經歷，其實佢除咗JPEX係運氣差之外，由選議員、到教書、做保險，其實都唔係投資錯誤，而只係佢自毀前程。簡單三個字總結：未入流。
（聲明：上述文章僅供參考，並不構成任何投資建議。讀者宜按自己的能力及認知，而作出投資決定。另外，以上資料全部來自於網絡可找到的公開訊息，再加以整合再撰寫；所有意見屬個人評論性質，並不針對任何人，而且所謂「燈神」都可能有撞中之時，和她們唱反調不一定代表賺到錢。）
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓
