如果你已移民英國，而以前曾經有儲里數習慣，咁你大概會感嘆，點解英國冇乜人會儲里數嘅？亦唔似香港咁多優惠畀你快速累積里數，咁係咪就唔使儲？其實啱一半，儲里數手段的確少咗，但錢你係會照使架嘛，所以就算難儲，都應該盡量儲，咁先為之唔浪費，本文就教你點樣在英國儲里數換機票啦！
Table of Contents
儲里數嘅英國信用卡
首先在香港，大家有好多種里數可以儲，最常見當然係Asia Miles，不過去到英國，除非你用返香港信用卡去儲，否則都冇乜機會儲到（咁應唔應該在英國用香港信用卡儲里數呢？當然唔應該，蝕滙率又有手續費）。在英國要儲里數，只能揀英航嘅Avios。
不過大家要有心理準備，英國都好少有信用卡儲到Avios，而事實上咁講唔公平，因為英國本身就唔興消費回贈呢回事，信用卡只係消費工具，大部分仲要交年費添。而呢度你需要申請一張美國運通嘅British Airways American Express Credit Card，原因係免年費，每簽賬£1就有1里Avios，而且有迎新，頭3個月消費滿£1,000送5,000 Avios，唔吸引但在英國來講係惟一免年費選擇。佢另外仲有一張Premium Plus，每簽賬£1有1.5 Avios，英航簽賬有3里/£，不過要畀£250年費，唔好癲啦。
Avios好唔好儲？
其實一睇就知，£1儲1里，都真係好慢，加上一來英國唔似香港咁乜都收卡（香港連收租都有辦法儲里數），二來冇promotion畀你睇住嚟簽。咁究竟Avios好唔好儲？答案係唔好儲，除剛剛講過要慢慢儲之外，Avios近來仲成日加價，換機票成本高咗，仲要同CX一樣，好鬼難換，基本上換英國返香港來回機票，一係好淡嘅淡季，一係換即日飛，否則都好難換到。
既然又難儲又難換，仲儲來做咩？但在筆者角度，既然錢就一樣使咁多，現金回贈又係少到冇咁滯，咁有里數點解唔儲埋佢？總好過射落海嘛。
Avios兌換表2023
講解之前，先放個最upadate嘅兌換表畀大家用先。其實近來Avios已經加價加到傻咗，而家甚至唔再在網上擺兌換率出嚟，需要自行用佢個Book flights輸入晒資料先會見到相應嘅所需里數。所以大家在網上見到嘅Avios兌換表，通常都係舊資料，或者抄來抄去，筆者就花咗啲時間自己重新整理一次。以下為最新Avios兌換表，以倫敦（LHR）為中心，兌換不同距離之單程英航直航機票所需Avios里數。（資料截至2023年11月21日）
| 距離 | 航點例子 | 淡季 | 旺季 | ||||
| 經濟 | 特選經濟 | 商務 | 經濟 | 特選經濟 | 商務 | ||
| 1-650 miles | 巴黎、阿姆斯特丹、都柏林、愛丁堡、法蘭克福、米蘭、慕尼黑、哥本哈根 | 9,250 | / | 15,000 | 9,750 | / | 16,250 |
| 651-1,150 miles | 布拉格、巴塞隆納、奧斯陸、馬德里、羅馬、斯德哥爾摩、布達佩斯、里斯本 | 11,750 | / | 20,000 | 12,750 | / | 22,250 |
| 1,151-2,000 miles | 雷克雅未克、赫爾辛基、雅典、伊斯坦堡、莫斯科 | 13,750 | / | 24,250 | 15,250 | / | 27,250 |
| 2,001-3,000 miles | 開羅、科威特城 | 22,500 | / | 70,000 | 27,500 | / | 80,000 |
| 3,001-4,000 miles | 杜拜、紐約、多倫多 | 25,000 | 42,500 | 80,000 | 30,000 | 60,000 | 90,000 |
| 4,001-5,500 miles | 新德里、孟買、溫哥華、北京、洛杉磯 | 30,000 | 47,500 | 90,000 | 35,000 | 67,500 | 100,000 |
| 5,501-6,500 miles | 首爾、約翰內斯堡、里約熱內盧、曼谷、東京、開普敦、香港 | 35,000 | 50,000 | 100,000 | 40,000 | 77,500 | 110,000 |
| 6,501-7,000 miles | 新加坡、布宜諾斯艾利斯 | 40,000 | 55,000 | 110,000 | 45,000 | 80,000 | 120,000 |
| 7,001+ miles | 悉尼 | 50,000 | 80,000 | 145,000 | 55,000 | 115,000 | 170,000 |
英國儲Avios換機票攻略
其實從上面嘅兌換表可以見到，返香港淡季Econ來回要7萬Avios，旺季要8萬，如果靠信用卡簽£1=1 Avios，大家可以計下要簽幾耐先夠返一次香港?相信係以年計，所以咁樣唔work。
在英國儲Avios換機票，首先要有心態上嘅調整，首先唔會再好似以前咁，一年換到兩套日本來回咁爽，亦都唔好諗住平時消費可以儲埋夠換香港來回機票探親咁好用，而係調返轉，乖乖地經英航買香港機票，儲起里數換啲歐洲短trip四圍去下，先係最著數嘅玩法。
搭英航賺Avios：英航Executive Club
要儲Avios，其實仲有一招，就係買英航機票，買機票可以賺到幾多Avios？以下用例子計畀你睇。
首先下面係一張11月份倫敦香港嘅來回Econ機票，總數係£1,059.41。當你網購機票時，可以睇到price breakdown，話你知分別係咩收費。
紅色圈嘅兩項收費，屬於Avios嘅有效消費，可以用嚟計算Avios里數。呢張單嘅有效消費係£628+£250 = £878。
至於計法方面，就要睇返你嘅英航Executive Club會藉，一般人開始時都係Blue會員，隨住幫襯得愈多（買英航機票有得儲Tier Points，儲夠就升級），就可以一路升級，總共有4級，而4個級別可以儲嘅Avios係以倍數計：
- Blue會員：有效消費（£）x 6
- Bronze會員：有效消費（£）x 7
- Silver會員：有效消費（£）x 8
- Gold會員：有效消費（£）x 9
即是上面個例子，最少可以儲到 878 x 6 = 5,268 Avios。咁好似唔多喎，又唔係嘅，一般香港人返得香港，都係舉家返，即是唔止一張機票，亦都通常係大時大節返，好似12月中機票就要成£1,500左右，有成8,000幾Avios架，加埋用信用卡簽，有1500 Avios，加埋就差不多10,000 Avios。
返1次香港當儲到1萬Avios，可以點用？
有以下3個推薦方法：
1. 儲起2萬幾換個歐洲短trip
返1次香港儲1萬，咁兩次咪2萬囉，好多人一年唔止返1次架嘛，咁就夠你換個巴黎／米蘭或其他地方短程來回，或者補少少錢（Avios換機票可以補錢換里數）換西班牙或中歐來回，甚至冰島、希臘，亦係非常抵。又或者，你可以拆開做open jaw，換單程倫敦去阿姆斯特丹，同埋單程巴黎去倫敦，再自己補張阿姆斯特丹去巴黎火車飛，車程只需3個鐘，200歐有找，咁就又係一個筍trip啦！
2. 下次返香港加多一站
唔係短程先可以open jaw，返香港嘅長途機都可以。英航去幾個同香港距離相近嘅亞洲國家都有直航，包括東京、曼谷、首爾、北京，咁啱全部都係香港人旅遊熱點。以東京為例，你下次返香港時，可以買一張倫敦去香港單程，再買多張東京返倫敦單程，然後就用Avios換香港去東京補返個單程（呢程就唔係坐英航，而係坐國泰或其他夥伴航空公司），咁你就可以先返香港，再去東京玩幾日，然後直接返英國喇！
至於返香港先定去日本先？或者唔去日本去邊好？呢個就你自己決定喇，最緊要留意里數換機票難度高過買機票好多，所以要confirm有得換，先好買呀，唔係就成個trip搞彎晒。
另外附上幾個短途熱點嘅所需Avios以作參考（經濟／特選經濟／商務）：
- 香港（HKG）<> 東京（NRT/HND）：14,300／23,400／32,500 Avios
- 香港（HKG）<> 曼谷（BKK）： 12,000／21,600／30,000 Avios
- 香港（HKG）<> 首爾（ICN）： 14,300／23,400／32,500 Avios
- 香港（HKG）<> 北京（PEK）： 14,300／23,400／32,500 Avios
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓