嚟到2023年，有啲詫異居然仲有好多人報導印度神童啲預言，神童一路都唔準，而且人地都16歲，已經唔「童」喇！筆者就信開另一個神，係股神巴菲特。雖然佢個倉我永遠跟唔到，次次知佢入貨都已升咗大半，但從佢嘅一舉一動，唔知點解自然會對世界了解深咗。就好似佢踏入2023年後一連串動作，就已經可以建構出5大預言，雖然唔一定成真，但相信準過印度神童，會更有參考價值。
Table of Contents
預言1：台海開戰機會大
2022年第3季，巴郡買入台積電ADR股票，2023年2月公布，原來上季已經賣咗大部分。大家都知道股神一係唔買，一買就揸好耐，絕少一兩季就走貨，加上台積電確實係晶片業領導者，無論短期還是中期都難以被其他公司取代，而創新科技係晶片主導，股神冇買錯呀。之後股神訪日時答咗呢個問題，佢話因為「地緣政治緊張」，係其中一個賣股考慮因素。事實上，2023年頭一季台海風波不斷，3月蔡英文訪美，4月美國國會訪台，中國以環台軍演回應，加上中國近月拋售美債，種種跡象顯示中台關係前所未有地緊張。股神早於風波前賣股，係咪收到風？如果係的話，咁打仗機會都唔細喎！
預言2：日圓匯率或將進一步下跌
巴郡由2019年開始，每年都發行日圓債券，先唔理佢借錢嚟做乜先，單睇日圓匯率一直跌，淨係匯率佢已賺到笑（因為還少咗錢），但現時日圓已跌到一個非常低位置（執筆時日圓兌美元0.0074），呢個時候股神做咗1個動作：宣布2023年會第6度發日圓債。咁就表示，日圓匯率好有可能會跌返落舊年超低位，甚至更低！
預言3：日本經濟準備復甦
承接上一段，股神發日圓債除咗賺匯率，其實仲將借到嘅錢投資落日本市場，而且有斬獲，所以不斷加注，今年股神再訪日，佢都再次大推日本市場，據知現時巴郡於日本5大商社（伊藤忠商事、丸紅、三菱商事、三井物產、住友商事）持股已達7.4%。作為鄉下在日本嘅香港人，呢幾年每每見到日本都係一片蕭條，唔講旅遊業啦，製造業同科技無論汽車、相機、晶片等都分別被電動車、手機同埋台積電等打到體無完膚。不過股神今次係身體力行，好清晰咁同大家講，喂日本而家平呀，嚟緊就復甦，上車喇喂！
不過唔係話日圓仲會跌咩？放心啦，股神發債咪就係對沖囉，日圓升，投資贏；日圓跌，發債贏，sure win！
預言4：電動車市場前景有變
股神由2008年開始已持有比亞迪（買入價8蚊港紙），揸咁多年終於等到比亞迪有得同Tesla爭吓，仲坐擁龐大中國市場，理論上而家先開始步入收成期，你想唔想像到，股神由舊年8月開始，到今個月已經第10次減持比亞迪，加埋減咗接近一半股數？股神減持，即是代表已經賺盡，呢個結論同大家對電動車市場嘅認知好似有啲唔同，明明身邊多咗好多人揸電動車，好暢旺喎！不過咁，如果加埋Tesla不斷減價去睇，咁可能，現實中電動車市場，特別係中國市場，其實冇大家想像中咁大，又或者，股神收到風電動車市場前景有變都唔定。
預言5：美國銀行股面臨災難
而家講美國銀行災難，好似講返轉頭咁，發生咗喇喎，仲預言？老實講，如果銀行業真係爆煲，點會只到而家呢個程度？記唔記得金融海嘯，係骨牌式冧檔架。嗱，大家都知道股神向來喜愛銀行股，特別美銀係佢愛股，但根據美國證監文件，巴郡披露銀行持股由2019年或1,020億美元，減至2022年底700億美元，主要減持美國合眾銀行、紐約梅隆銀行、高盛、摩根大通等，現時持倉依然集中在美銀，並建倉花旗銀行。咁就唔難想像，股神都預咗銀行股危險，佢只係對個別銀行有信心。睇埋佢早前點樣回應銀行危機？佢話即使銀行破產，存戶都唔使擔心，但銀行危機未過，仲批評某啲銀行家計算資產價值方法有問題。半句有關銀行嘅好說話都聽唔到，係咪擔心都合理先？
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓
