Facebook正式改名做Meta Platforms，勢要all in元宇宙(Metaverse)。好地地做開social media，點解要訓身去搞聽個名都唔知做緊乜既元宇宙？因為驚。
Table of Contents
不創新不轉型終被淘汰
當年PC互聯網轉移至移動互聯網，已經係一次行業大洗牌。Nokia被Apple打殘、微軟OS移殖唔到去手機，市場俾iOS同android瓜分、百度轉型唔切失勢，都提醒緊朱仔，就算你幾勁都好，轉身唔夠快，最終都會被淘汰。
睇返Facebook，最初係基於網頁形式發展出黎，一時間要轉型到smartphone，用戶體驗一定跟唔上，同當時競敵Instagram完全無得比。IG因應手機而誕生，一開波就相機行先，去到邊影到邊，影完即post上網。
Next Computing Platform
朱克柏格當時覺得好唔對路，不惜重金收購Instagram同之後既WhatsApp，先至爭取到啲時間等Facebook轉型成功。唔想追得咁辛苦，就要行先一步，比對手更快捕捉到下一個機會。到底Mobile internet之後，下一代互聯網形態會係點？朱克柏格覺得，就係元宇宙（Metaverse）。
根據朱仔講法，元宇宙幾乎同真實世界一樣，同而家既互聯網最重要既分別就係親歷其境既存在感，就好似你用佢個VR headset開會，就算你同事喺十萬八千里遠，你都會感覺到佢坐喺你隔離。元宇宙，對朱仔黎講，就係下一代計算平台（next computing platform），用AR同VR技術，將虛擬和現實生活結合。
元宇宙不確定性仍相當大
OK，咁Facebook攪個好似Roblox既元宇宙App咪得囉，既然自己都有Horizon，使乜自己搞埋VR、AR硬件呀？因為朱克柏格唔想受制於人。佢覺得Apple恃著自己多人用、係用戶進入互聯網世界既第一入口，於是整左好多rules黎偏袒自家應用程式。為免受制於第一入口既硬件，朱仔把心一橫投入勁多資金發展VR頭戴式裝置Quest 2，兼且發展自己既OS，希望控制埋第一入口，最終用戶以各種不同設備，都能輕易進入元宇宙。
願景好大，但不確定性仲大。究竟元宇宙係咪真係下一代互聯網形態？就算係，朱仔又係咪真係攪得掂啲硬件，做到Apple咁犀利？目前硬件設備佔Facebook既收入只有唔到2%，有一樣係肯定既就係，起碼仲要燒幾年錢先見到啲成果。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓
