平安出第三季績，本來無諗住寫，一來前排比較忙，二來無咩新睇法，但原來唔少網友都想知我點睇，所以短短地寫下。
Table of Contents
主要靠平安銀行業績
坦白講，今年對平安管理層、平安投資者係艱難既一年。企業發展好難一帆風順，總有起起跌跌，但只要有清晰目標，行啱條路，遲早會好轉的。安慰既係，平安銀行業績做得唔錯，營運利潤按年升三成，主要得益於資產質量改善，令撥備減少。唔覺唔覺，平銀營運利潤佔總營運利潤已經去到14.2%，頂得住下個業績。財險都唔差，營運利潤按年升兩成，但增幅差過中期。利潤有得升主要係綜合成本率比舊年低咗1.8%，但環比升返啲，要留意下。始終商車費改仍然困擾住行業，收入仲未得。
重點壽險未有起色
重點壽險，遺憾地仲未有起色。代理人數比我預期仲要跌得犀利，由中期87.7萬人再跌多17.1萬人去到70.6萬人，我只可以講平安既代理人改革進度無因為業績難睇而鬆懈到。但業績確實難睇，新業務價值按年跌17.8%，同管理層年初估有得升真係差天共地。拖累新業務價值既，除咗代理人少咗外，新業務價值率跌咗5%都係主因，一來今年大陸經濟確實唔好，賣唔到啲貴價單，二來競爭都大。
唯一亮點係，代理人產能真係提高咗。人均新業務價值由41,846人仔按年升19%至49,896人仔。
估計今年全年新業務價值都要按年跌雙位數。壽險業務幾時先有起色？先行指標，代理人數、代理人收入，就睇呢兩個指標幾時有得升。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓
