以往香港人儲落好多Asia Miles，疫情時用唔到，一開關經歷完兩次旅遊旺季，暑假都未到，就宣布2023年10月1日新兌換表就會生效，其中香港人最鍾意去嘅日本係重災區，加到飛起，疫情中仍然義無反顧儲里數嘅朋友頓成韮菜，慘受大刀一割。究竟之後仲值唔值得繼續儲Asia Miles？仲換唔換日本好？等筆者理性地計俾你睇。
Table of Contents
世界各地兌換單程機票所需里數（2023年10月1日後）
簡單講，10月1日後，超短途如台北等維持不變，短途分成兩個類別，類別2係香港人最鍾意去嘅日本，同埋印度、印尼，全部勁加；類別1係韓國、新加坡、泰國等，Econ維持不變，其他艙加。其他距離特選經濟、商務、頭等都狂加，只得中途、長途、超長途Econ有得減。另外，以往分為2個類別嘅長途合而為一，以後去南非、歐洲同去美國西岸都係同一價位。
| 地點 | 新兌換所需里數 |
| 超短途 1-750 哩數 中國 長沙、重慶、福州、廣州、桂林、海口、杭州、昆明、南京、南寧、寧波、三亞、溫州、武漢、廈門｜菲律賓 克拉克、馬尼拉｜台灣 高雄、台中、台北｜越南 峴港、河內 | 經濟客艙：7,500里（+-0）特選經濟：11,000里（+-0）商務客艙：16,000里（+-0） |
| 短途 – 類別1 751-2,750 哩數 中國 北京、成都、濟南、青島、上海、西安、鄭州｜韓國 釜山、濟州、首爾｜新加坡 新加坡｜泰國 曼谷、清邁、布吉｜越南 胡志明市｜馬來西亞 亞庇、吉隆坡、檳城｜孟加拉國 達卡｜柬埔寨 金邊、暹粒｜緬甸 仰光｜尼泊爾 加德滿都｜菲律賓 宿霧、達沃市｜斯里蘭卡 科倫坡 | 經濟客艙：10,000里（+-0）特選經濟：20,000里（+2,000）商務客艙：28,000里（+3,000）頭等客艙：43,000里（+3,000） |
| 短途 – 類別2 751-2,750 哩數 日本 福岡、名古屋、沖繩、大阪、札幌、東京｜印度 班加羅爾、真奈、德里、海得拉巴、加爾各答、孟買｜印尼 登巴薩／峇里、雅加達、棉蘭、泗水 | 經濟客艙：12,500里（+2,500）特選經濟：23,000里（+5,000）商務客艙：32,000里（+7,000）頭等客艙：50,000里（+10,000） |
| 中途 2,751-5,000 哩數 馬爾代夫 馬累｜阿聯酋 杜拜｜澳洲 阿德萊德、布里斯班、墨爾本、珀斯、悉尼｜巴林 巴林｜以色列 特拉維夫 | 經濟客艙：20,000里（-2,000）特選經濟：38,000里（+8,000）商務客艙：58,000里（+13,000）頭等客艙：90,000里（+10,000） |
| 長途 5,001-7,500 哩數 比利時 布魯塞爾｜加拿大 溫哥華｜法國 巴黎｜德國 法蘭克福｜愛爾蘭 都柏林｜意大利 米蘭、羅馬｜荷蘭 阿姆斯特丹｜新西蘭 奧克蘭、基督城｜南非 開普敦、約翰內斯堡｜西班牙 巴塞羅那、馬德里｜瑞士 蘇黎世｜英國 倫敦、曼徹斯特｜美國 洛杉磯、三藩市、西雅圖 | 經濟客艙：27,000里（-3,000）特選經濟：50,000里（+10,000）商務客艙：84,000里（+19,000）頭等客艙：125,000里（+25,000） |
| 超長途 7,501+ 哩數 加拿大 多倫多｜美國 波士頓、芝加哥、紐約、華盛頓 DC | 經濟客艙：38,000里（-4,000）特選經濟：75,000里（+15,000）商務客艙：110,000里（+25,000）頭等客艙：160,000里（+35,000） |
10月1日後 仲值唔值得儲Asia Miles里數換日本機票？
先講答案：雖然10月1日後，Asia Miles去日本全線加價，不過加完之後，其實儲Asia Miles里數換日本機票仍然值得，或者咁講，只要CX香港去日本來回機票價錢keep住在HK$3,000以上，就值得用里數換，以下解釋俾大家知。
首先里數換機票抵唔抵，係視乎以下4個因素：
- 與現金回贈比較：因為如你想換免費機票，其實唔一定儲里數，儲現金回贈去買一樣得，所以儲里數效率必須要贏到現金回贈，先至值得用里數去換。現時現金回贈一般在2％左右，如你網上消費為主，就約為4%。
- 儲里數效率：視乎不同信用卡與優惠，一般為HK$6/里左右。儲里數效率愈低，里數成本愈高。
- 里數兌換率：日本里數兌換率將於10月1日起增加，里數兌換率愈差，里數成本愈高。
- 機票價錢：儲里數嘅終極目標就係要換機票，所以機票價錢好影響里數價值，機票愈貴，自然每一里嘅價值就愈高。
以下筆者做咗少少research，嚟緊日本旺季（8月）同淡季（10月），買來回機票嘅價錢，而價錢係唔連稅，因為兌換里數都係要再俾稅，所以咁先可以公平比較每一里嘅平均價錢。
8月旺季日本來回（不連稅）
| 艙等 | 來回機票價錢 （不連稅） | 10月1日前每里價錢 | 10月1日後每里價錢 |
| 8月旺季日本來回（不連稅） | |||
| 經濟客艙 | HK$5,050 | HK$0.25 | HK$0.20 |
| 特選經濟 | HK$11,800 | HK$0.33 | HK$0.26 |
| 商務客艙 | HK$18,900 | HK$0.38 | HK$0.30 |
| 10月淡季日本來回（不連稅） | |||
| 經濟客艙 | HK$4,300 | HK$0.22 | HK$0.17 |
| 特選經濟 | HK$11,800 | HK$0.33 | HK$0.26 |
| 商務客艙 | HK$16,900 | HK$0.34 | HK$0.26 |
從上表可以見到，無論任何價錢，10月1日後每里價錢都drop得非常多。
不過，現時並未drop到唔值得換嘅水平。以比較普遍嘅現金回贈 2％、儲里數效率 HK$6/里 呢個水平去比較，10月1日後最差嘅每里價錢HK$0.17（淡季Econ），除以HK$6/里，依然有2.8%，高於2％現金回贈，如果唔係淡季搭Econ，改為旺季搭Business，HK$0.30除以HK$6/里，更加去到5%。不過留意，除著機票價錢下降，里數價值都會下降，大約去到HK$3,000以下，就會開始輸俾2%現金回贈，如果目的係要去日本，到時就要開始改儲現金回贈。
Asia Miles 10月1日後調整里數 誰受影響？
主要受影響群體
- 喜歡去日本旅客：全線艙等勁加里數
- 幫印尼姐姐換機票人士：印尼屬短途 – 類別2，同日本一樣，里數加幅得特別多
- 幾乎所有坐特選經濟艙至頭等艙旅客：如果經濟艙今次係短加長減，咁其他等級就係有加無減，加幅高達29％，影響非常大
主要受益群體
- 中長途唔介意坐經濟艙旅客：好明顯啦，得中、長同超長途Econ有得減之嘛，其他都加，都好嘅，以後去旅行去遠啲仲抵，最多攞多兩日假囉
- 幫澳洲、英國、美國、加拿大學生換機票人士：學生如唔係富二代，肯坐Econ，咁父母換機票俾細路返學或返香港就會平咗約10%
- 已移民英國或往英國探親人士：換英國Econ機票都平咗，不過呢個唔算太有著數，因此已移英人士要儲都儲英航先，係住香港嘅先易儲Asia Miles
- 改表後特別抵換：衝出亞洲最平套餐，馬爾代夫或澳洲經濟艙，以前來回44,000里已經好平，而家平上加平
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓
