香港人尤其是打工仔，每日花在交通工具嘅時間同車費，係非常高，呢個都係來自土地問題。所以任何搭車優惠，哪怕是交通津貼、信用卡優惠、八達通優惠、長者卡等，都唔會嫌多，今次就等筆者列晒今年唔同類型嘅交通優惠出嚟俾大家參考啦！
Table of Contents
交通優惠2023｜交通津貼
公共交通費用補貼計劃 每月最高HK$500
現時用八達通畀錢嘅車費（港鐵、巴士、電車、渡輪），只要超過每月門檻HK$200，超出嘅金額，政府會每月補貼3分之一，最高補貼HK$500（即是每月HK$1,700車費就補貼到盡）。計劃會持續到2023年10月，之後可能會改門檻同補貼上限。
詳情：https://www.ptfss.gov.hk/tc-main.html#/tc-home
2蚊搭車優惠
呢個優惠相信人人都識，全名叫政府長者及合資格殘疾人士 公共交通票價優惠計劃，現時60歲或以上香港居民，或合資格殘疾人士，就可以HK$2搭車。不過留意返，政府好似對呢個優惠有啲意見，呢頭特首都叫人唔好濫用，嗰頭孫明揚又建議門檻升到去70歲，睇怕短期內此優惠會有大變。
現時要享用2蚊搭車優惠要跟以下方法：
- 60至64歲香港居民要申請樂悠咭先可以享用優惠
- 65歲或以上香港居民可以繼續用不記名嘅長者八達通或個人八達通享用優惠，不過都要分階段申請樂悠咭
- 合資格殘疾人士有兩個方法，一係用印有照片嘅「殘疾人士身分」個人八達通，一係在已印有照片嘅個人八達通加註「殘疾人士身分」，向港鐵申請就得
詳情：https://www.td.gov.hk/tc/gov_public_transport_fare_concession/index.html
交通優惠2023｜信用卡交通優惠
Citi八達通信用卡 每月簽夠HK$3,000以上 有15%車費回贈
呢個優惠有辣有唔辣，卡主每月用Citi八達通信用卡拍卡搭車，包括港鐵、巴士、綠色專線小巴、渡輪、電車，車費可以有15%現金回贈，每月最多回HK$300，換言之HK$2,000內嘅交通費都有15%回贈，係超多！不過有個條件，就係每個月你要用呢張卡簽夠HK$3,000，咁你嘅車費先有得回贈。
計返真係可以回好多，舉例，你每月搭HK$2,000車（再補簽HK$1,000其他野），Citi八達通信用卡回HK$300，公共交通費用補貼又回HK$500，加埋成HK$800！不過呢個優惠比較適合每月交通費接近HK$2,000人士，如果你每月只搭幾百蚊，其實就唔需要搞咁多嘢。
詳情：https://www.citibank.com.hk/chinese/credit-cards/octopus-cards
ICBC‧KMB銀聯雙幣信用卡 九巴及龍運高達20%車費回贈
工銀亞洲呢個優惠同上面Citi嘅玩法相似，不過就唔使簽HK$3,000咁多，每月簽HK$1,000就搞掂，但係就只得九巴或龍運有回贈，每月最多回HK$400。如果你係九巴龍運常客，呢個優惠掂。
詳情：https://www.icbcasia.com/ICBC/kmbcard/
滙豐EveryMile信用卡 指定公共交通工具$2/里
如果你係滙豐EveryMile信用卡卡主，咁你平時搭公共交通工具，包括九巴、龍運、新巴、城巴，用呢張卡簽賬會有$2/里。$2/里算係非常高嘅里數兌換率，不過由於搭巴士使費唔高，唔好諗住靠呢樣可以儲到好多，當幫補下就最fit。
詳情：https://www.hsbc.com.hk/content/dam/hsbc/hk/docs/credit-cards/everymile/everymile-everyday-spend.pdf
信用卡 八達通自動增值回贈
信用卡仲可以申請八達通自動增值賺回贈，不過唔係張張都回得多，部分得雞碎咁多就唔建議，要用就用以下呢幾個：
交通優惠2023｜港鐵優惠
港鐵特惠站 一拍即慳HK$2
有啲地方有港鐵特惠站，拍完之後去港鐵站入閘，會即減HK$2。
港鐵特惠站位置與詳情：https://www.mtr.com.hk/ch/customer/tickets/fare_saver.html
早晨折扣優惠 0715至0815出閘有65折
要星期一至五非公眾假期，用成人八達通先得，可以同轉乘優惠、特惠站拍卡、全月通連接車程折扣一齊減。
詳情：https://www.mtr.com.hk/ch/customer/main/early_bird.html
全月通、都會票、日票
地鐵有常客計劃，產品包括全月通、都會票同埋日票。如果符合到你嘅乘搭習慣，就可以慳到錢。
- 全月通：有5個路線，買完之後在該月份可以無限次來回路線內嘅車站，亦有連接車程折扣。5條路線包括上水／烏溪沙至尖東HK$495、屯門至南昌HK$525、屯門至紅磡HK$615、東涌至南昌HK$415、東涌至香港HK$650。（詳情）
- 都會票：可以於67個指定市區車站適用，票價HK$435，可以40日內搭40程，即是每程最平HK$10.875。（詳情）
- 日票：使用屯門-南昌全日通嘅乘客，可於購票當日無限次乘搭往來屯門至南昌沿途各站、輕鐵及港鐵巴士（詳情）
轉乘優惠 最多平HK$3
搭完港鐵再轉搭綠Van或其他指定交通工具，會有轉乘優惠，優惠由HK$0.3起，至最高HK$3，視乎指定路線。最多回贈HK$3嘅路線係成人八達通美孚港鐵站轉乘81K，至於最低HK$0.3嘅路線好多，自己睇詳情。
詳情：https://www.mtr.com.hk/ch/customer/tickets/intermodal.html
其他港鐵優惠
- 港鐵學生乘車優惠計劃：本港認可院校的全日制日間課程合資格學生有特惠車費優惠（詳情）
- 泊車轉乘計劃：指定停車場泊車轉乘有優惠（詳情）
- 機場快綫的士轉乘優惠：MTR Mobile預約的士前往香港站、九龍站 或青衣站轉乘機場快綫去機場有7折（詳情）
- 機場快綫早晨專綫服務：朝早HK$20九龍站或青衣站去香港站（詳情）
MTR Mobile 積分換免費車程
留意返搭港鐵係有得儲分，分數可以用來換免費車程，你要裝MTR Mobile app，做會員先可以儲到分。
詳情：https://www.mtr.com.hk/mtrmobile/ch/mtrpoints/rewards/
交通優惠2023｜九巴優惠
九巴月票 每日任搭10+2程車
要用九巴手機App買，係電子月票，HK$780可以30日內，每日任搭10程九巴龍運同埋2程B1口岸線，仲有27折優惠乘搭龍運機場A線同埋NA線。
詳情：https://www.kmb.hk/monthlypass.html
九巴優惠站 拍卡平HK$4
同港鐵類似，去指定優惠站拍卡，可以平HK$4搭九巴。
九巴優惠站位置及詳情：https://www.kmb.hk/faresaver.html
九巴其他優惠 包括轉乘優惠、即日來回優惠、分段收費等
九巴最筍優惠其實係上面ICBC‧KMB銀聯雙幣信用卡嘅20%回贈，其他恆常優惠，大部分都係路線掛勾，即是你坐開路線有優惠就會自動減，冇乜得plan。以下係九巴／龍運嘅主要優惠：
- 八達通轉乘優惠
- 區域性短途分段收費
- 即日回程優惠
- 學生長途路線即日回程半價
- 轉乘專線小巴優惠
- 轉乘電車優惠
- 轉乘港鐵優惠
- 轉乘陽光巴士優惠
- 轉乘新大嶼山巴士優惠
- 機場員工優惠
詳情：https://www.kmb.hk/discount.html
交通優惠2023｜新巴城巴優惠
相對於九巴，新巴城巴嘅優惠少得多，都係啲轉乘優惠同即日來回優惠之類。
交通優惠2023｜電車優惠
電車月票 HK$260任搭
雖然電車每程只需HK$3（成人），但仍然有高用量乘客需要優惠，電車係有月票賣嘅，現時票價HK$260，即是你平均每日搭多過3程就有著數，應該係有特殊工作需要先會買。留意返，電車月票需要指定日期（基本上係月尾兩日加月頭1日，一至六非紅日）去指定地點（北角、銅鑼灣、石塘咀）先買到。
詳情：https://www.hktramways.com/tc/service-updates-detail/1/1/
電車免費乘車日 4.30姜濤誕之外仲有其他日子
因為姜濤生日，好多人先知原來電車係有免費乘車日，不過呢啲通常係有人sponsor，所以唔敢講年年都會有，以下係過去1年嘅電車免費乘車日：
| 日期 | 節目 |
| 2022年7月1日 | 中國太平 |
| 2022年7月11日 | 香港建造商會 |
| 2022年8月20日 | ESPRIT |
| 2022年9月10日 | 華泰國際 |
| 2022年10月29日 | 北京同仁堂 |
| 2022年11月5日 | 渣打 |
| 2022年11月15日 | 御藥堂 |
| 2022年11月20日 | 中國太平 |
| 2022年12月24日 | UNIQLO |
| 2023年2月25日 | 招商永隆銀行 |
| 2023年4月30日 | 姜濤生日 |
| 2023年5月14日 | 國際家庭日 |
交通優惠2023｜天星小輪優惠
天星小輪月票
除電車外，天星小輪都有月票，現時票價HK$190。限於上一個月26號，至當月嘅10號發售，舉例2023年10月嘅月票，就要在2023年9月26日至10月10日買，要去以下3個地點購買：
- 尖沙咀天星碼頭天星維港遊售票處
- 中環7號碼頭 (天星碼頭)往尖沙咀方向上層閘口
- 灣仔(東)碼頭往尖沙咀方向閘口
詳情：https://www.starferry.com.hk/tc/news20090321
Follow我們 Social Channel 得到最新資訊 : IG: wavingcat.hk FB: WavingCat招財貓
