騰訊第四季業績確實唔理想，我睇法係呢一、兩年收入增速會放緩，但profit margin會好轉，長線依然睇好。百萬倉做法：700倉位已到上限，不增持、不減持。
第四季收入按年增長放緩到只有8%，多得國內遊戲同廣告GG。
Table of Contents
國內遊戲及廣告未如理想
首先本土市場遊戲收入只有1%增長，遠差我預期。原本諗住《英雄聯盟手遊》10月喺大陸上架，同時《王者榮耀》六周年慶，又搞左一連串優惠活動，肯定谷到收入。誰不知未成年人限打機令影響比我預期大，未成年人消費減少不突止，仲有因為研發資源專注喺新措施既實行，間接影響咗收入增長。
廣告收入受監管影響大跌
另外，暫停出版號亦影響咗推新遊戲進度，事關唔係隻隻game都可以好似《王者榮耀》咁長玩長有，隻game舊咗，收入就會逐漸下跌，要靠新game抬返起收入。
好彩國際市場遊戲Keep住做得好，增長34%，已經佔總遊戲收入30.8%。今年都仲係要靠國際市場。
至於廣告仲大鑊，收入跌13%，主要因為金主教育、遊戲、保險等行業廣告需求疲軟。加上廣告業監管趨嚴，好似彈出廣告、開app廣告、個人資料保密等都有監管，都會影響收入。金科及企服呢part唔錯，增長25%，已經佔集團收入33%。
盈利倒退主要有3點
收入增長俾國內遊戲同廣告陀衰家，但整體收入都仲有8%增長，點解盈利要倒退，仲要衰到大插25%呢？主要有3點﹕
1) 收入結構改變
金科及企服呢part增長最勁，但呢part毛利率係最低，純利甚至係蝕緊錢，所以拖低咗overall毛利率。
2)加大投資
其實第一季集團已經講過，會將2021年部分利潤增量投資喺新機會，包括延遲視頻號商業化時間，但視頻號既服務器及頻寬成本大幅增加；對雲計算專業人才、運營持續投入等。
3)行內競爭大
舊年燒咗好多錢喺marketing搶市佔，而且人才爭奪白熱化。財報顯示，全年研發開支增長33%，遠高8%收入增長。
業績幾時好轉？
業績係樣衰咗啲，但業務其實進步唔少，好似小程序、視頻號、海外遊戲、SaaS全部有進步，只不過好多都未商業化，未賺到錢。好消息係，視頻號今年遲啲時間會開始試行廣告，相信對收入會好大幫助。
另外，由於國家打擊反壟斷同資本無序擴張，限制咗巨頭投資，但好處係大家都唔會亂咁燒錢，企業回歸理性。Martin預計會停晒之前啲燒錢搶市佔marketing campaign，非核心業務會cut人，甚至退出，更加在乎成本效益，唔會再亂fing錢。
同埋管理層預期國內遊戲、同廣告都會喺下半年開始恢復增長。但作為投資者，我地要保守啲，今年下半年都唔好期望咁大，預佢2023年先恢復增長。
估值
騰訊上年自由現金流1,081億人仔，假設佢以後，forever增長「只有3%」，用7%折現率計。佢現值(present value)係27,836億人仔。
仲有佢啲投資，截至舊年底，市值12,101億人仔。截至24/3，恆生科指跌咗18.7%，照計返同樣跌幅，騰訊投資市值9,835億人仔。
合計，騰訊起碼值37,671億人仔，等於約45,205億港紙，除返開96.12億已發行股本，每股約值$470。
只要騰訊以後每年增長至少有3%，而家就係undervalued。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
Follow我們 Social Channel 得到最新資訊 : IG: wavingcat.hk FB: WavingCat招財貓
