利亞出咗業績，係賣走OK便利店之後，第一份全年業績，好有參考價值。
舊年收入升咗14.3%至13.62億元；撇除已終止經營業務既持續經營業務純利7,439.9萬元，按年增加22%，好過我之前保守估既6,000萬；每股持續經營盈利9.6仙，前收市價每股$0.73計，得7.6倍PE；派末期息5仙，全年7仙，前收市價計，9.59厘。
Table of Contents
香港聖安娜 逆市狂開鋪
香港聖安娜仍然係集團最重要業務，佔總收入84%。舊年香港聖安娜收入多咗15.9%，溢利仲要多咗25.6%，主要係租金同人工佔比都低咗。
直至上年年底，香港聖安娜分店多咗17間去到100間，而前幾年係一直縮緊店。原因無他既，平租！
CEO舉咗個例，舊年喺海港城開咗間Zoff，租金比之前平咗四成！當然啲租金都好視乎地區，旅遊區梗係減得多，但住宅區就跌得少啲。睇返租金佔收入比例，由2020年既12.58%跌至10.91%，差咗成1.67%，算好多啦，公司profit margin都係得5%咋。呢17間新店喺2021年應該未完全幫到手，今年打後應該會產生更多收入。
有樣比較特別，就係B2B生意。舊年百佳摺咗自己既面包工房，判咗俾聖安娜做獨家供應商，CEO話而家B2B生意都佔成收入既14%。黎緊，集團會進一步發展B2B，唔止可增加收入，仲可以減少季節性因素，但呢瓣生意個毛利率就會低啲。
廣州聖安娜連續第二年有錢賺，不過都係雞碎咁多。但公司就幾樂觀，諗住沖出廣州，去大灣區攪franchise，不過我就比較謹慎，唔抱期望。
賣眼鏡既Zoff 盈利升4倍
Zoff舊年生意都唔錯，收入增長14.2%，溢利仲升咗成4倍，叻仔！Zoff舊年開多咗2間鋪，總共13間。做得咁好，主要係舊年疫情好轉同消費券刺激消費，我都用咗消費券幫襯買咗副眼鏡！服務真係幾好。Zoff會keep住慢慢開鋪啦，仲有就會同日本Zoff傾大陸既franchise，不過都係個句，唔抱期望。
舊年樣樣都幾好，但有樣弊既就係，由於人民幣升值同通脹問題，攪到集團毛利率跌咗3.5%，得返50.1%。不過學之前話齋，人工同租平咗，所以最後profit margin可以由4.45%升到去5.46%。
大家最關注既梗係我地都經歷緊既第5波疫情。呢個疫情令到利亞最高峰嗰時有350位職員返唔到工，佔總員工11%左右。CEO估計Zoff 3月既生意會少咗58%至70%。但香港聖安娜就好好多，佢話而家啲包仲係日日賣清，係因為供應鏈問題，攪到唔夠貨賣，生意喺3月會係上年同期既七至八成左右。
CEO預計5月應該會回復正常，而且下半年會強勁反彈。一來會有啲報復性消費，二來消費券會幫到手。
未來積極擴張 不抱期望
最後管理層既展望幾aggressive，話以前既目標都係穩定既低雙位數收益同純利增長。但而家唔同玩法，會積極擴張，開新店、攪franchise、仲可能M&A收購新品牌。都係嗰句，唔抱太大期望。
今次派息，以前收市價計已經有9.59厘，仲要派息率只有73%，少過佢之前既九成。間公司無有息債，淨現金2.9億，淨係呢啲現金都值$0.37啦，盤生意根本唔使點樣要錢黎run，派大部分都仲得。
只要間公司循規蹈矩，唔好自己作死，夠食。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
Follow我們 Social Channel 得到最新資訊 : IG: wavingcat.hk FB: WavingCat招財貓
