尋日想食個快lunch，去到大快活，睇好曬食乜，但見到收銀條龍，都係打退堂鼓。走去隔離大家樂，條龍都係差唔多，算，認命。等俾錢個陣，發現，咦？大家樂好多菜式價錢竟然同大快活一模一樣？
焗豬 $44 │ 燒味單拼$39 │ 燒味雙拼$42 │咖喱牛腩飯 $52
價錢分毫不差，不過兩間集團賺錢既位，就唔多一樣。價錢分毫不差，不過兩間集團賺錢既位，就唔多一樣。餐飲企業賺唔賺錢，主要睇食材、租金、人工。大快活集團最主要只係經營大快活，而大家樂集團就有大家樂、一粥面同埋其他餐飲品牌。兩間公司係人工成本佔比相差無幾，反而食材、租金各有優勢。
Table of Contents
大快活集團贏在食材成本
大快活集團贏在食材成本。最近幾年，大快活集團食材成本佔比，都比大家樂集團同期低3%至5%不等。點解？因為大快活無會員制，menu上既已經係實價，相反大家樂又搞會員優惠、又不時俾你用折扣買現金券，扣下扣下變相9折左右可以食到大家樂個餐。換言之，同一菜式食材成本如果相差無幾，大快活食材成本佔收入比，自然較低。加上大家樂集團有一半收入，來自休閒飲食同機構業務，睇返同類業務上市公司盤數，一般休閒飲食既食材成本高D，而機構業務價錢相對優惠，係大學Canteen食大家樂同一個餐都平過出面啦，兩樣加埋都拉高大家樂集團食材佔比。
大家樂集團勁在租金低
大家樂集團勁在租金低。最近幾年，大家樂集團有幫醫院、航空公司等等提供餐飲，呢啲機構物業入面既租金，都低過一般分店，如果係幫佢地做外賣既話，就更加唔駛門店租金成本。再加上，大家樂集團旗下有多個品牌，通常幾個brands會一齊租同一商場既舖位，議價能力自不然勁啲。反觀大快活集團主要都係得大快活一個主品牌，其他品牌基本上冇咩分店，集團規模細，同業主拗租都冇咁有牙力啦。截至3月底既下半財年，無論係邊間，都要面對食材價格增長既主要壓力。大家樂講明會加2.5%左右，加價之餘，仲會係內地加開分店，收入表現應該唔錯。至於大快活，堂食恢復得七七八八，下半財年好難再錄同比大幅增長，加價方面取態亦保守，話未有時間表，就算加都唔會超過1%，收入增長未必會咁可觀。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
Follow我們 Social Channel 得到最新資訊 : IG: wavingcat.hk FB: WavingCat招財貓
