Facebook有98%收入黎自廣告業務，話佢係間廣告公司都不為過，靠住大量活躍用戶吸引廣告商不斷科水，上市至今每年收入都有雙位數增長，但增速一路減慢，舊年放緩到按年增長21.6%。點知去到今年，首三季表現竟然逆轉，收入增長大幅反彈到45.5%，有成842.6億美元。
要明Facebook既廣告收入靠咩增長好簡單，因為Facebook廣告收入就係廣告展示數目X廣告價格。拆解呢兩個因素，就可以估到Facebook未來既廣告收入。
Table of Contents
Facebook廣告展示數目
簡單黎講，就係總共廣告show左幾多次俾人睇。而次數多少由三樣野決定: 活躍用戶數、廣告負載量(Ad Load) 、新增內容形式。
活躍用戶數多啲，自然多啲人睇到廣告，呢個係第一推動力。但Facebook無論係月活定日活人數，今年第三季已經衝到去29.1億人及19.3億人，咁高基數都好難要求佢再快速增長，不過每年個位數增長，應該仲頂得住。
每個人睇到幾多次廣告，就係第二個關鍵，衡量準則叫做廣告負載量(Ad Load)。以我自己Facebook為例，碌大約3個post就會出1個廣告，我諗都極限啦掛，再多就煩。其他發展得無咁成熟既地區，就應該仲有得升。
話就咁話，對付好似香港之類既成熟市場，Facebook仲有計去谷高廣告展示次數，就係用新增內容形式整大個pool(廣告庫存)。動態新聞(News feed) ad load用盡，就出影片(Watch)、限時動態(Story)等，變相開多左廣告位。其中抄考抖音既短片Reels，9月已經登陸北美地區Facebook，點都可以谷高下廣告庫存，值得留意。
三樣野加埋，我估未來3年既廣告展示數目仲有低雙位數增長，雖然活躍用戶及廣告負載量增幅放緩，但都仲係向上吖。
平均Facebook廣告價格
廣告show得多，都要賣得起價先有得賺。Facebook廣告定價基本上係競價機制，完全由市場決定，所以好受宏觀經濟、唔同地區價位、廣告庫存多少等因素影響。
就咁睇只要谷高個廣告展示數目，乘埋個平均廣告價格，咁個廣告收入咪升囉。開頭我都係咁諗，但事情並非咁簡單，經我再study多啲，我發現平均價格同廣告展示數目，兩者唔係獨立概念，係有關係架！歷年Facebook廣告展示數目增長得少，廣告價格就會增長得多，調反轉亦係咁。可能係供求原理，供應少，價格自然升，反之亦然。
呢個搖搖板現象，打破咗市場上好多人既迷思：「Facebook廣告展示數目無以前增長得咁快，連帶收入都會減慢啦。」但無人諗到，廣告展示數目就算轉跌，由於僧多粥少，平均廣告價格都有機會飆升，最終廣告收入條大數會自動拉勻。
講到尾，都係睇Facebook夠唔夠賣座力。如果無人玩無價值，多多位都無廣告商要，不過暫時Facebook獨特地位未有其他平台取代到。我估Facebook廣告收入未來3年內，都應該有around 20%增長，無市場諗得咁負面。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
Follow我們 Social Channel 得到最新資訊 : IG: wavingcat.hk FB: WavingCat招財貓
