有無試過買腸粉，送魚蛋燒賣？家陣隻中國平安就係咁。入場費60蚊唔使，免費送埋財險業務、平銀、陸金所、平安好醫生、金融壹賬通、汽車之家，仲有壽險資產淨值俾你。淨係計平安壽險保單個part，都已經值60蚊啦，仲唔係賣大包？
無計，平安今年人衰行路打倒褪，壽險改革未成功，疫情又陰晴不定，新業務價值退晒步；投資華夏幸福又爆雷，撇賬幾百億；依家恒大風聲鶴唳，市場又開始擔心平安啲房地產投資危危乎。不過，爛船都有三根釘，咁樣隊隻平安係咪合理先？
Table of Contents
中國平安估值
計估值前先要明兩個term: 1. 有效業務價值 2. 新業務價值。
有效業務價值，類似用現金流折現(DCF)計現存保單價值。長期保單年年都要交保費，即係每年都會有現金流入保險公司。有效業務價值，就係將呢啲現金流減走估計成本加投資收益，再將成舊數折現做現值(Present Value)。平安假設投資收益率係5%，折現率係11%。
至於新業務價值，計法基本上一模一樣，分別在於有效業務價值只計existing保單，一年新業務價值就只係計新保單價值。 截至今年6月底止，平安扣償後有效業務價值係5,403億人民幣，除返已發行股數約183億股，即係每股約值$35.5港紙。呢個數只計算平安現時持有既保單價值，但未計將來會產生既保單價值。
未來保單價值點計？
2021年中期，平安年化扣償後一年新業務價值係459億人仔，不過平安搞緊壽險改革、驚會再跌，打個九折，變成413億人仔。用呢個數做基礎，當佢壽險改革完全失敗，新業務價值forever and ever都無增長，用Gordon Growth Model計全部未來既新業務價值既現值，就等於3,758億人仔，每股約值 $24.67港紙。
$35.5 + $24.67 = $60.17
平安壽險現存保單價值加埋未來保單價值，值$60.17，仲未計佢壽險公司既資產淨值、財險業務價值、平安銀行、陸金所、平安好醫生、金融壹賬通、汽車之家。但2318依家個價，只係50幾蚊咋！
筆者看法
有人會覺得，市場太CHOK，唔啱價值投資者生存，事實正正相反。價值投資者覺得波動愈大愈好，因為心入面已經計好估值，有一個價值錨，任憑市場先生點樣發癲，你都可以唔理佢。市場先生發癲得愈犀利，反而造就機會俾價值投資者。「最需要恐懼就係恐懼本身」，心中無價值錨，市場暴升暴跌，梗係嚇到你鼻哥窿都無肉啦。最後你必須要明白低估可以再低估，高估可以再高估，平安而家呢個價再暴跌多三成我都唔會覺得出奇，所以絕對唔好因為平而用槓桿。因為一旦用咗槓桿，市場先生就係你主人，你已經唔可以唔理佢。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
Follow我們 Social Channel 得到最新資訊 : IG: wavingcat.hk FB: WavingCat招財貓
