其實香港打工仔都有啲津貼可以攞嘅，當然一般都唔多，但如果你中咗某啲要求，例如加入某啲行業，加埋最高可以超過$40萬架！即刻睇下自己漏報邊啲津貼，一蚊都唔好放過呀！
Table of Contents
再就業津貼試行計劃 7月15日推出 最高$20,000
舊年施政報告已講過，會有一個為中高齡人士而設嘅再就業津貼試行計劃，政府早前宣布，將於2024年7月15日正式推出。計畫內容大概係40歲或以上失業最少3個月人士，搵到工後連續返6個月，可獲發最高$10,000津貼，若連續返工達12個月，就再多$10,000，即總共最高$20,000。暫時係咁，到正式推出時我地再詳細睇睇。另外唔好將中高齡就業計劃同呢個撈亂，中高齡就業計劃今年已經冇咗僱員$12,000留任津貼，現時只係僱主先有津貼。
公共交通費用補貼計劃 每月最高$400
應該係最多打工仔認識嘅津貼，每個月以八達通支付嘅交通開支，超過門檻後可以取得1/3補貼，高達$400。之前因為疫情，補貼計劃曾經加到最高$500，但完結後回復之前水平，即是而家嘅每月最低交通開支門檻$400，同埋每月津貼上限$400。
詳情：https://www.ptfss.gov.hk/tc-main.html#/tc-home
電費補貼計劃 最高$1,200
2024至2025年度電費補貼計劃，由2024年1月開始，至2025年12月結束，向合資格住宅用戶戶口，連續24個月注入$50，即是總共$1,200，只能同來補貼電費。如果補貼有剩會延落下個月，一直有剩的話，最多補貼到2025年12月31日。同埋你唔會收到錢的，港燈/中電會直接在電費單幫你扣除。
詳情：https://www.info.gov.hk/gia/general/202309/29/P2023092900274.htm
持續進修基金 最高$25,000
成年人想再進修增值，要記得大家係有持續進修基金資助學費，最高資助$25,000（原有資助$10,000，加碼資助$15,000）。當然，要讀合資格嘅指定課程先有資助，同埋只補貼學費一定比例（原有資助80%，加碼資助60%）。另外亦有7成或更高出席率要求，同埋成續要求，唔可以hea讀。
詳情：https://www.wfsfaa.gov.hk/tc/ce/cef/overview.php
在職家庭津貼計劃 每位住戶每月最高$1,610
香港唔少家庭或個人，都係收入低而工時長，政府其實對呢啲有需要人士提供少許資助。在職家庭津貼計劃有指定收入上限門檻，根據家庭住戶嘅工作時數、家庭結構（人數、單親/非單親、兒童數目），去批出每月津貼額。以一個單人家庭為例，每月最高可領$1,610，超過一人家庭的話，大人同小朋友都係，每人每月一樣最高$1,610。
詳情：https://www.wfsfaa.gov.hk/tc/wfao/wfas/overview.php
為低收入家庭護老者提供生活津貼計劃 每月最高$6,000
「為低收入家庭護老者提供生活津貼計劃」係社會福利署針對低收入家庭，同時又要照顧屋企長者嘅人士而設嘅津貼。首先照顧長者時數每月要超過80小時，然後有家庭入息限額，每月照顧每位長者可獲發放$3,000津貼，最高$6,000。
詳情：https://www.swd.gov.hk/tc/pubsvc/elderly/cat_careersupp/allowanceforcarersoftheelderly/
輪候公屋津貼 每月最高$3,900
呢個係限時嘅試行計劃，早前公布計劃已延長至2025年6月，所以而家仍然可以申請。本計劃係「現金津貼試行計劃」，津貼一啲合資格排公屋，但排咗超過3年仍然未上到樓嘅申請者。津貼額由$1,300（一人住戶）至$3,900（六人或以上住戶）不等。
詳情：https://www.cashallowance.gov.hk/tc/index.html
展翅青見計劃 培訓津貼每日$333 + 實習津貼$7,300
展翅青見計劃係for相對年輕嘅打工仔（15至24歲），主要係幫助就業，提供培訓之餘，仲有培訓津貼同埋留任津貼。合資格學員經計劃入讀同埋修畢展翅青見計劃培訓課程，可申請「培訓津貼」，每日津貼高達$333。另有工作實習訓練津貼，學員完成到實習機構工作，出席率80%以上，可獲$7,300津貼。
詳情：https://www.yes.labour.gov.hk/Home
僱員再培訓局課程 再培訓津貼 每月最高$8,000
同展翅青見計劃非常相似亦有為對方提供課程，僱員再培訓局課程服務對象就闊好多，15歲以上香港打工仔都可以申請。提供多種就職課程學費減免，同埋輔導、培訓、轉介、跟進等服務，亦有提供再培訓津貼，最高每日$333，每月津貼上限$8,000。
詳情：https://www.erb.org/training_courses/erb_courses/manpower_development_scheme/zh/
學徒訓練資助 最高$246,000
學徒訓練都有資助，職業訓練局嘅學徒訓練有多項資助，包括政府於2024年4月1日起，向每名合資格註冊學徒提供每月$1,000培訓津貼，為期最多36個月，合共最高為$36,000。另外，更為每名完成學徒訓練的學徒提供上限最高$30,000進修津貼，學徒於2024年4月1日至2027年3月31日期間完成學徒訓練合約後，在指定行業全職服務滿18個月同埋36個月，同時完成行業相關嘅進修課程，可分別申領上限$10,000同$20,000津貼。
如果有興趣做船舶維修學徒，就要參加「船舶維修訓練獎勵計劃」，有更多津貼，合資格學徒有每月最高$5,000獎勵津貼，為期最長36個月，即是單單呢個津貼最高已可達$180,000！
詳情：https://apprenticeship.vtc.edu.hk/tc/apprentice/allowance
海運及空運人才培訓基金 加入遠洋航海最高$414,000
若果你有興趣加入海運或者空運行業，就一定要留意呢個海運及空運人才培訓基金，有非常多個津貼項目，淨係培訓同實習，都分別有最高$30,000同埋$21,000津貼，即是最高$51,000。海運業方面，本地船舶業新入職有最多$30,000獎勵津貼，考到本地三級船長／輪機操作員資格又送$12,000，或者你揀遠洋訓練，又分4階段發放高達$363,000津貼（第1階段最高$180,000，第2階段最高$27,000，第3階段最高$36,000，第4階段最高$120,000）。航空業方面，揀航空營運培訓最高可得$48,000津貼，或者揀飛機維修課程，可以退還上限$50,000學費等等。另外亦可以揀物流，物流培訓津貼高達$6,500，實習津貼高達$22,500。
詳情：https://www.tlb.gov.hk/matf/tc/index.html
Follow我們 Social Channel 得到最新資訊 : IG: wavingcat.hk FB: WavingCat招財貓
