旅行ATM提款收費比較 原來外國㩒錢手續費超貴！教你最抵兌換辦法！

有時旅行去得多，都會試過去外國櫃員機㩒錢，明明知道要收手續費，但間中都會失去預算帶唔夠外幣。係方便嘅，不過千其唔好成為習慣，因為成本可以好高！你知唔知唔同國家嘅ATM提款收費都唔同？邊度最貴？手續費點計？最緊要係，去旅行應該點唱錢先最抵？本文詳細解釋你知！

熱門旅遊目的地ATM提款收費率 最高竟然超過24%！

首先，去唔同國家㩒錢，手續費都唔同，甚至你用同一張卡，去唔同嘅櫃員機㩒錢，手續費都可以相差好遠！國際付款公司Wise就做咗個研究，統計2024年全球40多個旅遊目的地嘅ATM提款收費率^*，得出以下數據，有國家嘅手續費率竟然超過24%，問你怕未？

* 此調查分析基於對2023年10月至2024年3月期間，使用Wise卡在ATM上提取的1480萬筆現金提款進行分析，並與Wise於2023年5月的研究結果進行比較。

外國提款各種收費及成本

睇完統計數據，咁實際上用香港提款卡去外國ATM提款，提取外幣，手續費係點計呢？答案相當複雜，因為有多重手續費要收，簡單講的話，分為以下收費：

1. 自動櫃員機網絡海外提款手續費
   首先你用香港嘅提款卡去用外國嘅櫃員機，你本身嘅銀行會收你「海外提款手續費」，然後，你睇返自己張提款卡背後，寫住可以用邊個提款網絡嘅櫃員機，例如Cirrus、PLUS、銀聯等等，去返相應嘅網絡先㩒到錢，而且會有收費（銀聯唔收）。本文下面會詳細講香港銀行嘅海外提款手續費。
2. 香港銀行兌換外幣手續費
   如果你係從港幣戶口提取外幣，選擇用返自己嘅銀行兌換，咁就會用返銀行當時嘅兌換率（通常同當日牌價差不多，唔會點蝕），不過會收兌換外幣手續費，只有少部分銀行轄免呢個收費。
3. 外國櫃員機匯價及手續費
   如果你係從港幣戶口提取外幣，並且選擇用動態貨幣轉換（DCC），咁提款網絡會有自己嘅匯價，你事先係唔知兌幾多，個rate可以好差，加上仲會有手續費，蝕上加蝕。
4. 信用卡現金透支手續費及利息
   如果，你係用開信用卡提款，咁你仲可以有個選擇，係信用卡現金透支。不過你千其唔好用呢個，因為除咗以上幾個收費之外，如你在信用卡免息還款期內未清還款項，就會有手續費，同埋最緊要係會開始計息，信用卡透支嘅實際年利率可以去到40%或以上，唔好試。

自動櫃員機網絡 海外提款手續費

上文都講過，用香港提款卡去外國ATM提款，首先會收「海外提款手續費」，呢個已經係最透明嘅收費，基本上每間銀行都會在T&C寫到清清楚楚。以下係香港主要銀行嘅海外提款手續費列表。

如何兌換外幣最抵最方便

講真如果要最抵，一定係見到靚rate就唱定外幣現金，到旅行再帶去用，咁就蝕最少匯同埋畀最少手續費。如想方便少少，以下方法其實都ok，起碼比去外國㩒錢好得多。

1. 1.Debit card 外國直接消費
   當然唔係張張Debit card都適合攞去外國用啦，一定要揀免外幣交易手續費嘅，舉例，滙豐Mastercard扣賬卡、用到Citibank Global Wallet嘅Citi扣賬卡等都得，配合外幣戶口儲起低水時換定嘅外幣，咁樣攞去碌，成本就只係你換匯時嘅手續費。
2. 2.免外幣手續費信用卡 外國直接消費
   如果你真係換唔夠外幣，呢個應該係最方便可靠嘅方法，如唔收手續費的話，成本就會係匯率，咁基本嘅Visa、MasterCard、銀聯匯率其實都唔太差，緊急使用的話都唔需要太擔心。所有銀聯卡都係免外幣交易手續費嘅，不過外國唔一定收銀聯，銀聯以外免外幣交易手續費嘅信用卡方面，Visa有渣打Smart信用卡，MasterCard有中銀淘寶World萬事達卡可以選擇。