日本退稅攻略2024｜遊日必讀！日本退稅條件 要護照定QR code？事後去機場退唔退得？

5算！當日圓平到咁，而日本仲係咁好玩，長假唔去日本嘅真係笨。唔止要去仲要趁5算掃貨，否則必然後悔！日本掃貨就要留意退稅喇，事關日本收緊8%至10%消費稅，勁高！但如shopping的話大部分稅其實都可以退到，並唔複雜，本攻略就話你知點計同埋點退，清清楚楚，記得唔好退漏呀！

日本退稅攻略2024｜日本退稅制度簡介

• 現時日本消費稅稅率：8%或10%，視乎商品類型
• 日本退稅對象：以外國籍非日本居住者為主要對象，簽證類型為「短期滯留」（一般免簽證旅遊即為此類型）、「外交」和「公用」者可享免稅資格。

日本退稅攻略2024｜邊間商店可以退稅？

認住下面呢個「Japan Tax-free Shop」免稅店標誌，有呢個標誌嘅舖頭都有得退稅。

日本退稅攻略2024｜退稅商品類別

1. 一般物品：非消耗品，單日在相同店舖買滿稅前5,000日圓即可退稅，無須放入特殊退稅膠袋，須在入境日起6個月內攜離日本境外。
2. 消耗品：酒、食物、飲品、化妝品等，單日在相同店舖買滿稅前5,000至500,000日圓即可退稅，必須放入特殊退稅膠袋，須在入境日起30日內攜離日本境外。
3. 如同時購買一般物品與消耗品，皆當為消耗品方式處理。

以下以表格方式歸納一下退稅商品類別：

	一般物品	消耗品	一般物品及消耗品
單日在相同店舖消費額	5,000日圓（稅前）或以上	5,000至500,000日圓（稅前）	5,000至500,000日圓（稅前）
放入特殊退稅膠袋	不需要	必須	必須
出境限期	入境日起6個月	入境日起30日內	入境日起30日內

日本退稅攻略2024｜退稅方法

你可以以下方式退稅

1. 向商店出示護照或退稅QR code，直接以免稅價錢購買商品
2. 於商店免稅櫃位，帶同退稅所需文件，即場退回消費稅現金。留意必須於購買當日進行退稅，現時日本係唔可以事後去機場補辦退稅
3. 於商場或商店街免稅櫃位，為在多間店舖購買商品一次過退稅，帶同退稅所需文件，即場退回消費稅現金。留意必須於購買當日進行退稅，現時日本係唔可以事後去機場補辦退稅

留意返，出境時要向海關出示所買並已退稅商品，如已入袋物品千其唔好拆開，要跟身帶過關，預備畀海關Check。

退稅所需文件

1. 你購買嘅商品
2. 商品收據正本
3. 蓋有入境蓋章的護照¹ 或 退稅QR code²

1：蓋有入境蓋章的護照

意思即是如果你要退稅，護照必須有入境蓋章，如經自動查驗通關閘門過關係唔得的，需要去搵入境審查官補返個蓋章

2：Visit Japan Web 退稅QR code

大家同嚟做日本入境申報嘅 Visit Japan Web有新功能，就係免稅 QR Code 服務。你只需要上傳相應個人資料，包括姓名、國籍、出生日期、在留資格、護照資料等，就可以獲得免稅 QR Code，退稅時可以用 QR Code 代替護照。

退稅 QR code流程：

1. 登錄 Visit Japan Web 帳戶
2. 填寫個人資料及選擇「使用免稅QR碼」
3. 掃描護照正本
4. 繼續完成入境申請

Follow我們 Social Channel 得到最新資訊 : IG: wavingcat.hk FB: WavingCat招財貓