香港打工仔其實好無奈，搵到少少錢，連公屋都無得排。其實香港打工仔都有啲津貼可以攞嘅，當然一般都唔多，但如果你中咗某啲要求，例如加入某啲行業，加埋最高可以超過$30萬架！即刻睇下自己漏報邊啲津貼，一蚊都唔好放過呀！
Table of Contents
【2023最新！】臨時求職經濟援助 最高$1,000
由香港仔坊會鑽出耆職計劃推行，為50歲或以上中高齡失業或開工不足人士，提供最高$1,000資助，以津貼受惠人士嘅求職開支，例如考保安牌去做保安、配合適度數眼鏡去做文職、將銀髮染黑去做服務業工作等。臨時求職經濟援助有入息上限$11,000，資產上限$105,000，並只可以實報實銷方式申領。
詳情：https://job50.hk/%e8%87%a8%e6%99%82%e6%b1%82%e8%81%b7%e7%b6%93%e6%bf%9f%e6%8f%b4%e5%8a%a9/
公共交通費用補貼計劃 每月最高$500
應該係最多打工仔認識嘅津貼，每個月以八達通支付嘅交通開支，超過門檻後可以取得1/3補貼，高達$500。之前因為疫情，補貼計劃將每月最低交通開支由$400降至$200（門檻降低更多人受惠），每月津貼上限由$400提升至$500（每月可得津貼增加），會持續到2023年10月。到時睇下會唔會改返以前咁。
詳情：https://www.ptfss.gov.hk/tc-main.html#/tc-home
電費補貼計劃 最高$1,000
新一年財政預算案已宣布，2023年會有電費補貼計劃，由2023年6月開始，向合資格住宅用戶戶口，連續11個月注入$80，第12個月注入$120，即是總共$1,000，只能同來補貼電費。如果補貼有剩會延落下個月，一直有剩的話，最多補貼到2025年12月31日。同埋你唔會收到錢的，港燈/中電會直接在電費單幫你扣除。
詳情：https://www.fstb.gov.hk/tc/treasury/fin_rel_shc/electricity-charges-subsidy-scheme.htm
持續進修基金 最高$25,000
成年人想再進修增值，要記得大家係有持續進修基金資助學費，最高資助$25,000（原有資助$10,000，加碼資助$15,000）。當然，要讀合資格嘅指定課程先有資助，同埋只補貼學費一定比例（原有資助80%，加碼資助60%）。另外亦有7成或更高出席率要求，同埋成續要求，唔可以hea讀。
詳情：https://www.wfsfaa.gov.hk/tc/ce/cef/overview.php
在職家庭津貼計劃 每位住戶每月最高$1,400
香港唔少家庭或個人，都係收入低而工時長，政府其實對呢啲有需要人士提供少許資助。在職家庭津貼計劃有指定收入上限門檻，根據家庭住戶嘅工作時數、家庭結構（人數、單親/非單親、兒童數目），去批出每月津貼額。以一個單人家庭為例，每月最高可領$1,400，超過一人家庭的話，大人同小朋友都係，每人每月一樣最高$1,400。
詳情：https://www.wfsfaa.gov.hk/tc/wfao/wfas/overview.php
展翅青見計劃 培訓+留任津貼最高$72,000
展翅青見計劃係for相對年輕嘅打工仔（15至24歲），主要係幫助就業，提供培訓之餘，仲有培訓津貼同埋留任津貼。合資格學員經計劃入讀同埋修畢展翅青見計劃培訓課程，可申請「培訓津貼」，每日津貼高達$241，每月津貼上限為$5,000，為期6至12個月，即最高可獲$60,000津貼。學員於在職培訓留任滿3個月或以上可獲發放「留任津貼」，津貼期上限為12個月（最多$12,000）。
詳情：https://www.yes.labour.gov.hk/Home
僱員再培訓局課程 再培訓津貼 每月最高$5,800
同展翅青見計劃非常相似亦有為對方提供課程，僱員再培訓局課程服務對象就闊好多，15歲以上香港打工仔都可以申請。提供多種就職課程學費減免，同埋輔導、培訓、轉介、跟進等服務，亦有提供再培訓津貼，最高每日$241，每月津貼上限$5,800。
詳情：https://www.erb.org/training_courses/erb_courses/manpower_development_scheme/zh/
中高齡就業計劃 留任津貼最高$12,000
唔係只得後生仔有福利，高齡人士都有中高齡就業計劃，呢個計劃除咗會津貼聘請中高齡打工仔嘅僱主之外，年滿60歲失業打工仔，搵到工後都可以申請留任津貼，每月最高$1,000，最多12個月，即是最高可獲$12,000津貼。
詳情：https://www1.jobs.gov.hk/0/tc/information/Epem/
海運及空運人才培訓基金 加入遠洋航海最高$213,000
若果你有興趣加入海運或者空運行業，就一定要留意呢個海運及空運人才培訓基金，有非常多個津貼項目，淨係培訓同實習，都分別有最高$30,000同埋$21,000津貼，即是最高$51,000。海運業方面，本地船舶業新入職有最多$30,000獎勵津貼，考到本地二級船長／輪機操作員資格又送$12,000，或者你揀遠洋訓練，又分3階段發放高達$162,000津貼（第1階段最高$108,000，第2階段最高$18,000，第3階段最高$36,000）。航空業方面，揀航空營運培訓最高可得$48,000津貼，或者揀飛機維修課程，可以退還$50,000學費。
詳情：https://www.tlb.gov.hk/tc/highlights/transport/20140401.html
Follow我們 Social Channel 得到最新資訊 : IG: wavingcat.hk FB: WavingCat招財貓