上次講到打工仔8大津貼，其中嘅持續進修基金，有成$25,000資助你進修，唔少會都選擇用嚟學車，確實係抵嘅，不過你知唔知，其實有好多證書課程，讀咗之後仲可以打工搵錢，時薪可達HK$1,000！筆者今次嚴選幾個最搵錢證書課程，同你計下扣完持續進修基金後實際要幾多學費，同埋證書嘅行業起薪啦！
Table of Contents
牙科手術助理 起薪可達HK$18,120
課程名稱：牙科手術助理員證書
院校：嶺南大學持續進修學院
課程編號：41C11798A
牙科手術好多種，包括隱形牙套、漂牙、植牙等，牙科手術助理員都好缺人，因為每位私家牙醫都需要2至3個牙科手術助理員幫手，現時私營牙科診所入行月薪約HK$17,000。你亦可以選擇行公務員路線，「牙科手術助理員」薪級point 5至17，即起薪每月HK$18,120，最高每月HK$35,915。若再升上「高級牙科手術助理員」，薪級point 18至32，即起薪每月HK$37,685，最高每月HK$72,225！
Playgroup導師 起薪可達HK$23,000
課程名稱：幼兒Playgroup導師培訓證書
院校：青協持續進修中心
課程編號：35C104178
與其話Playgroup導師需要呢張證書，其實更需要係教育幼兒嘅愛心同耐心，而呢個證書就可以畀你一個見識呢行同埋入行嘅機會。現時Playgroup導師月薪起點由HK$14,000至HK$23,000左右，視乎經驗。
寵物美容助理 起薪可達HK$20,000
課程名稱：寵物美容及動物保健證書
院校：香港聖公會麥理浩夫人中心
課程編號：43C141967
讀完此證書，學員學會貓犬保健、護理及美容相關知識及技巧，可以搵工入行做寵物美容助理等職位，入行月薪由HK$13,000至HK$20,000不等，視乎經驗與能力。入行後亦不乏加人工機會，呢行好睇個人技術掌握、考外國證書同埋最緊要係客戶關係，呢幾樣都會影響之後人工調整水平。
花藝師 起薪可達HK$20,000
課程名稱：花藝師培訓證書
院校：青協持續進修中心
課程編號：43C136998
此證書提供花藝行業知識、花藝理論同埋實際技巧，讀完後可以搵花藝師等花藝工作，入行人工起薪由HK$13,000至HK$20,000不等，視乎能力。此證書嘅畢業學員可自費（$3,200）申請「韓國B.H.L專業花藝設計二級技能認證證書」，或自費（$1,600）申請由英國資歷頒證機構TQUK頒發嘅Certificate in Florist Training (Level 3)。
驗樓師 起薪可達HK$15,000
課程名稱：樓宇檢驗助理培訓證書
院校：青協持續進修中心
課程編號：36C136986
驗樓師大家都應該知道大概工作係乜，而其實要入行係有唔少證書可以讀，包括青協呢個樓宇檢驗助理培訓證書。驗樓師最主要睇經驗，初入行人工唔高，約HK$12,000至HK$15,000，不過隨住工作累積經驗後，月薪可達HK$80,000或以上。
調解員 初入行時薪可達HK$1,000
課程名稱：綜合調解員培訓證書
院校：嶺南大學持續進修學院
課程編號：44C130682
調解員係一個運用調解技巧同知識去解決爭議嘅職業，綜合調解員培訓證書可以學到如何有系統地安排及協助當事人了解事情重點從而改變睇法，解決紛爭。由於成功調解就表示可以唔使訴訟，慳返好多錢，所以亦代表調解費用可以開得高。一般以時薪計，調解員時薪由HK$1,000至HK$3,000不等，視乎經驗，當然實際工時就要睇個人際遇啦。
瑜伽導師 新入行兼職時薪可達HK$180
課程名稱：瑜伽導師訓練證書
院校：HKU SPACE
課程編號：43C127573
如本身有玩開瑜伽，想嘗試以瑜伽導師為職業，可以讀呢個瑜伽導師訓練證書課程。當然瑜伽導師通常都係自僱，你本身能力足夠的話，唔讀都可以（有客就得），但如自覺未ready都適合報讀。如果打工，即是幫人教班，現時瑜伽導師兼職時薪約HK$100至HK$180左右，但如有經驗有客源的話，自己開班教人，月入並無限制，視乎個人做生意能力。
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓
