存款保障|香港/美國/英國/加拿大等10個地方 保障詳情與賠償上限比較

存款保障 銀行倒閉
存款保障|香港/美國/英國/加拿大等10個地方 保障詳情與賠償上限比較

銀行倒閉,以前係天方夜譚,但自從2008金融海嘯,大家都見識過冇嘢係永恆。最近美國又發生銀行重大問題,先有SVB(矽谷銀行,Silicon Valley Bank)倒閉,再有第一共和銀行(First Republic Bank)同瑞信股價暴跌,一時之間傳言四起,銀行系統搖搖欲墜,會唔會波及到香港?最緊要係會唔會影響到我嘅存款?冇錯,保住老本最要緊,本文就同大家講吓香港與及世界各地嘅存款保障上限,等大家知道自己有幾多錢未受到保障。

世界各地個人存款保障比較表

國家/地區賠償上限相關機構
香港HKD 500,000香港存款保障委員會
美國USD 250,000Federal Deposit Insurance Corporation (FDIC)
英國GBP 85,000The Financial Services Compensation Scheme (FSCS)
加拿大CAD 100,000Canada Deposit Insurance Corporation (CDIC)
澳洲AUD 250,000The Financial Claims Scheme (FCS)
日本JPY 10,000,000預金保険機構 (DICJ)
台灣TWD 3,000,000中央存款保險公司 (CDIC)
新加坡SGD 75,000存款保險計劃 (SDIC)
中國RMB 500,000存款保險基金管理有限責任公司
澳門MOP 500,000澳門金融管理局 (AMCM)

存款保障不包括離岸戶口

首先,最需要注意係,大部分國家/地區嘅存款保障,都係唔包離岸戶口。特別提出係因為香港而家太多人有開離岸戶口,例如Citi(美國)、DBS(新加坡)等,而存款額又通常好高,好可惜,存款保障係唔包嘅,但其實亦好合理,筆錢都離咗岸,自然唔受個岸保障啦。

亦不包括結構性存款

除離岸戶口外,在香港,結構性存款亦都不受存款保障。咩係結構性存款?簡單講係同股票、貨幣掛鈎嘅存款產品,即是你成日見到嗰啲「100%保本」之類字眼嘅存款產品,通常就係。咁定期存款呢?定期就可以嘅,不過有限年期5年以下嘅定期存款先受保。

留意保障貨幣

香港來講,戶口就算係外幣,都一樣受到保障,不過如果你有其他國家嘅銀行戶口就要留意,唔係每個國家都保障外幣存款,例如日本就只保障日元,即是如果你在日本做生意或讀書,但屋企在香港的話,咁在日本嘅存款盡量唱做日元會有保障啲。

香港包埋虛擬銀行

香港而家都好多人用本地虛擬銀行,在發牌之前其實政府已經諗好,需要佢地受到監管嘅同時,亦都好似一般銀行咁有50萬個人存款保障。所以你地要擺錢落虛銀食息係冇問題,但就要留意返個上限,唔好同一間擺太多,咁當然就算傳統銀行都係一樣啦,呢方面兩者係公平的。外國好多都會包埋有註冊嘅虛擬銀行,如有疑問,就去睇返當地存款保障機構查下受保銀行名單就最穩陣。

一般無須主動申請賠償

一旦touch wood銀行有問題,倒閉喇,咁我地要如何「claim」呢個存款保障呢?呢方面,香港同大部分地方,都唔需要存戶做任何嘢,包括打去登記或者追數,每個地方都有相關機構會幫你。香港的話,香港存款保障委員會講明無須主動申請賠償,香港存款保障委員會會查核倒閉銀行紀錄,搵出合資格人士同埋計好補償金額,再聯絡存戶安排發放賠償,過程中可能要存戶提供啲資料咁啦。至於香港以外地方,大家可以去當地嘅相關機構網站睇返點安排。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章香港大富翁夢想世界(TM) 聯乘雍雅山房迎新春
下一篇文章一眾豪宅租值重估 李氏皇宮2400萬成全港最貴豪宅