以巴衝突升級，俄烏戰事膠著，大家關心經濟頂唔頂得住時，發現債息升之餘，連金價都係咁升，執筆之時，金價都連升幾日，距離歷史高位，只有百幾蚊美金之遙，似乎唔少資金都選擇走保值方向。如果你都想投資黃金，可以點做？其實有好多方法，各有優劣，本文就教你7個買金方法，等你自己揀。
Table of Contents
黃金投資特色
- 交易量大，流通量高
- 交易透明，法規健全
- 保值
- 具避險作用，價格常受戰爭或世界突發事件影響而波動
XAU/USD 黃金現貨兌美元 歷史走勢
下圖為黃金現貨兌美元嘅近25年走勢，基本可以分成3階段，第1階段係由2000年開始直至2012年，連續12年狂升，由大約270美元升至1877美元，接近7倍。第2階段由2012年至2018年，連續6年回調。第3階段係由2018至今嘅大升，先於2020年留下歷史高位（2,075美元），然後於2023年5月再破紀錄（2,081美元）。現時金價仍處於極高位（約1,950美元），並仍在上升中。（資料截至2023年10月18日）
投資黃金方法比較
| 投資黃金方法 | 優點 | 缺點 |
| 實體黃金（金粒、金條） | 有實物揸手冇手工成本 | 儲存難度高須考慮防盜問題 |
| 金幣 | 有實物揸手可作收藏或展示用途 | 須考慮防盜問題 |
| 飾金 | 有實物揸手可作收藏或展示用途可戴上身華人社會有送金飾習俗，具實際社交用途 | 有手工成本與及其他消耗費用，較不保值容易遺失須考慮防盜問題 |
| 紙黃金／黃金存摺 | 入場費低方便容易 | 唔同發行商之間嘅紙黃金未必互相流通 |
| 黃金ETF | 入場費低手機都可以買賣 | 價值跟隨金價波動有收費 |
| 黃金期貨 | 有槓桿，回報可以很高 | 期貨風險非常大 |
| 金礦股票 | 入場費低手機都可以買賣 | 並非直接投資黃金價格受金價以外因素影響，不同金礦股有不同表現，須要對採礦業有認識 |
實體黃金（金粒、金條）
如果要投資黃金，最直接方法當然係買實金，特別係去銀行或金行買金粒同金條。在香港買金粒／金條要留意一件事，係香港通常用「両」為單位，金粒通常1両起，金條通常5両起，而唔同產地嘅單位都唔同，國際最流通嘅當然係以「克」為單位，由1克到1千克都有，如果你買金要去外國賣，就要留意唔好買「両」喇。
金幣
金幣同金粒金條最大分別，係鑄造成金幣後有收藏價值，當然要睇返設計、發行量同埋紀念嘅性質等，去衡量返個added value啦！但就算幾差，都起碼值返個重量嘅金價，除非你買到假貨啦。
飾金
飾金即是將黃金打造成金器或首飾，例如龍鳳鈪、金鏈等，既可以保值，又有實際用途。由其係華人結婚流行送金器做嫁妝，愈多愈體面，所以上一輩好多時都會話「趁金平買定啲金器」，將來總有用途。不過打過金器都知，手工唔平，而手工費係冇辦法回收嘅，所以保值方面就唔及金條喇，另外如果打成首飾戴出街，就要小心會有遺失或者被偷嘅風險。
紙黃金／黃金存摺
如果買實金，數目大嘅話，重量都唔少，你需要有防盜嘅方案，以保住自己嘅財產。唔想搵地方擺的話，可以選擇買紙黃金，或者去銀行開黃金存摺，咁你就叫做買咗金，佢又會升值，而你又唔使煩惱擺邊喇！不過凡事冇完美，唔同發行商之間嘅紙黃金未必互相流通，買賣地點比較少選擇。
黃金ETF
ETF即是交易所買賣基金，市面上有好多追蹤金價嘅ETF，你可以好似買股票咁，以股票戶口購買。ETF第一好處係方便易買，用手機就買到，而且入場費非常低，入門買金的話ETF係最平易近人嘅方法。不過ETF同基金一樣都係有管理費，會反映在價格上，所以高管理費嘅ETF，長揸會有食價嘅情況出現，只適合用來投資中短線波動。另外，市面上亦有反向黃金ETF，如你唔睇好金價都可以買反向，非常彈性。
| 港股黃金ETF例子 | 美股黃金ETF例子 |
| SPDR金ETF（2840.hk）價值黃金ETF（3081.hk）恒生人幣金ETF（83168.hk） | SPDR Gold Shares（GLD）ProShares Ultra Gold（UGL）ProShares UltraShort Gold（GLL） |
黃金期貨
期貨係高風險嘅槓桿投資工具，黃金期貨買賣嘅係合約而唔係黃金本身，只適合極短線投資或者用來做對沖。以呢個方法來投資黃金，可以買多或買空，好處係如果睇啱市，你可以在短時間內賺到倍計嘅回報，而壞處亦一樣，輸就輸更多，風險就視乎槓桿倍數，可以非常高。
金礦股票
黃金價格與產量息息相關，所以亦有人會選擇投資金礦股，不過相比起炒賣黃金，投資金礦股需要更多其他學問，皆因不同採礦公司產量不一，公司管理方面亦不盡相同，所以投資金礦股不能單睇金價，仲要研究埋公司業績同埋地緣政治等，先會揀到好股。
| 港股金礦股例子 | 美股金礦股例子 |
| 山東黃金（1787.hk）招金礦業（1818.hk）紫金礦業（2899.hk）靈寶黃金（3330.hk）中國黃金國際（2099.hk） | Franco-Nevada（FNV）Wheaton Precious Metals（WPM）Barrick Gold（GOLD）Kinross Gold（KGC）Royal Gold（RGLD） |
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓