【大家樂焗住加價】

財經卒仔

大家樂截至9月底止既中期業績,同疫情之前既2019年同期比較,除稅前溢利大跌左49%,即係少左9,200萬。困擾飲食業既3大成本都係存貨、人工同埋租金。今次中期同疫前比,人工成本佔收入比大致持平,租金佔收入比仲因為好多業主減租而有得跌,對中期業績最不利既就係存貨成本。

食材價格提升

存貨成本佔收入比提升,主要都係因為食材價格提升,而且外賣佔比高左,包裝成本都重左。食材及消耗品成本今次中期佔收入29.9%,比2019年中期高左2%。以今次中期收入38.7億黎計,2%即係7,700萬左右,亦即係除稅前溢利跌幅既八成半(7,700萬/ 9,200萬)。集團今次中期大家樂快餐既客人平均消費只係39.1元,同2019年同期比大致持平,即係話兩年黎都加唔到價,唔可以將食材價格上升壓力同埋包裝量上升壓力轉移俾消費者。食材價格一直上升,俾個數字你參考。聯合國公布既食品價格指數,2019年係95.1,2020年係98.1,係今次中期報告期間,更加上到120至130之間水平。估計下半財年既食材成本價格只會繼續上升,因為宜家全球疫情仲係好勁,航運延誤令到供應鏈混亂,船期失準加上貨櫃價格高企,都令到食材價格上升,食品價格指數係10月已經升到133.2喇。如果國際疫情唔舒緩,食材價格升勢睇黎都會持續。集團可以做既野,可能只有轉用D更加平既食材,又或者係調整下產品組合,不過相信呢D一直都做緊,所以食材成本升幅暫時仲會係困擾住集團盈利既一大因素。

集團終於被逼嘗試加價

另外一個困擾集團既問題,就係加唔到價,轉嫁唔到D存貨升幅俾客人。集團之前話驚D消費者唔多接受加價,市場競爭好大,怕流失客人。不過,食材升幅壓力咁大,集團終於被逼嘗試加價喇。集團首席執行官羅德承係早兩日既業績發布會上面話,唔排除下半年大家樂「策略性加價」,以人均消費計,預料大約加1蚊。大家樂同一弼麵加埋佔集團61.2%收入,大家樂門店數量係一弼麵4倍,所以估計大家樂都佔到集團大約一半收入。單價由39.1蚊提高1蚊,幅度係2.5%左右,以集團下半財年收入保守估計同上半財年一樣有39億計,假設加價唔會令客人流失,除稅前溢利就可以增加5,000萬左右 (2.5% X 39億X 50%)。加價應該可以推高到集團盈利,始終食快餐都有種慣性,而且估計其他快餐都會有加價壓力,大家一齊加價既話消費者都唔走得去邊,所以估計加價唔會令太多客人流失。

集團已適應疫後新常態

今次中期收入比2019年中期,仲係低左9%。其實集團最近兩個財年收入環比都有改善,似乎集團已適應疫後新常態,不過睇返佢地既回復速度,我諗速食餐飲要一年至一年半先至可以回復到疫前水平,而休閒餐飲或者需要半年至一年時間。機構飲食就冇計啦,睇黎有排都唔會好轉。盈利方面,如果大家樂加到價既話,的確係有提升空間。提一提集團既中國業務。中國業務表現中規中矩,收入比2019年中期高左10%。雖然廣東省有D零星疫情,影響左集團6月營運同埋門店網絡擴展計劃,但大家樂似乎捉到內地客人既口味,生意都做多左。只不過,中國業務既分部業績比2019年中期都仲係少左一成,相信都係同樣受制於食材價格啊。

*此文章由專欄作家:財經卒仔提供

FB: 財經卒仔 (https://www.facebook.com/FinSmallSoldier/)

IG: @finsmallsoldier

免責聲明:本平台發佈的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本平台及相關作者無關。而WavingCat旗下網站或社交平台的網誌內容及觀點,僅屬筆者個人意見,與WavingCat立場無關。WavingCat對因上述人士張貼之資訊內容所帶來之損失或損害概不負責。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章【「喱DAO」NFT開售 杜汶澤即賺3800 萬】
下一篇文章【Elon Musk上年捐出57.4億股票 WFP原來無份】