阿爺今年8月底祭出未成年人限打機令，搞到騰訊國內市場未成年人遊戲流水佔比，由舊年9月4.8%大跌到今年9月1.1%，一步到位，亦令騰訊國內遊戲收入升得5%。海外市場好啲，仍然keep到兩成增長，但較第二季29%增幅有所減慢，不過相對總遊戲收入佔比去到25%，愈黎愈重要。黎緊第四季遊戲收入，我估點都好過第三季！《英雄聯盟手遊》10月8日喺大陸上架，短短一個月所得收入，已經超過呢隻GAME係海外市場全年收入總和；10月又係《王者榮耀》六周年慶，搞左一連串優惠活動，肯定谷到收入。據Sensor Tower講，10月騰訊遊戲全球收入按季增長32%，按年增長23%，創下歷史紀錄。騰訊另外仲有4款遊戲，被列入亞運會正式競賽項目；啱啱2021《英雄聯盟》全球總決賽，中國EDG贏咗全球總決賽冠軍，勁多官媒報道表揚，同之前打機好似吸毒咁款既輿論差天共地，氣氛改善咗，對騰訊遊戲都有好處。
Table of Contents
廣告復蘇要等等
第三季表現濕滯，事關最大金主教育行業，被阿爺打到殘，仲邊會落廣告？大陸今年經濟又麻麻地，金融行業類等廣告需求都弱，所以廣告收入只升5%。集團預期成行既廣告價格，未來幾季仲係咁弱。坦白講，騰訊廣告業務不嬲都不溫不火，做得唔算出色，不過微信廣告收入，我就無擔心過。佢啲廣告位長期都供不應求，只係今次教育同遊戲金主突然sharp cut，搵人補位都要時間啦？ 等下啦，2022下半年，我諗會恢復雙位數增長。
又請工程師
收入增幅不似預期，但支出反而多咗，早係Q1講過，會請多啲工程師做R&D，margin自然拉低。所以收入有增長，盈利都要跌少少。社交網絡、金融科技及企業服務，呢兩項業務收入都無Q2升咁多，不過對今季盤數影響相對較細，主要都係受累於上面講既三個因素。
谷高盈利實有計
今季係差咗啲，但坦白講，騰訊既收入同支出，某程度上可以自己調節，朋友圈放多一兩個廣告位、《王者榮耀》整啲新皮膚賣貴少少，谷下個收入好易啫，燒錢個啲項目，燒少啲錢，請人唔好咁快，一下就谷高個盈利啦。當然，騰訊唔係咁短視，唔會為一、兩季做啲損害長期利益既事。更何況而家風頭火勢監管強，你仲expect第三季有好大增長？避下風頭都要啦。所以我覺得今季業績差少少都可以接受。只要監管風暴告一段落，等成個行業逐步適應，騰訊增長自然會好返。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓