【燒錢搶市佔 唔係人人得】

donki

網上Call車、外賣、券商呢啲靠app搵食既互聯網公司,初初入香港市場個陣除左大賣廣告、仲瘋狂燒錢補貼俾優惠搶客,但傳統線下超市、賣衫賣鞋呢類鋪頭,就極少咁做。你唔會見到DONKI搞首單免費、阿布泰全單五折搶客,因為就算佢地咁做,一大批客即刻蜂冚過去,門市根本食唔晒啲客。燒錢呢招對傳統線下生意黎講,無乜成本效益。

對傳統線下生意無乜成本效益

第一,快唔到。就算你幾咁財雄勢大,超市呢類傳統線下生意模式,無可能短時間喺港、九、新界插晒旗。由搵鋪位,傾租約、裝修、請人、逐間逐間開,點都要三五七年時間,競爭對手大把時間追你。第二,規模效應有限。開100間鋪,拉勻單店成本一定少過開1間,開得多裝修師傅都計你平啲啦。但如果開500間鋪,除開平均成本未必平過100間好多,事關每間鋪都係要俾租金、人工,裝修折舊等,而且你愈管得多鋪、管得多人,效率反而有機會低咗,造成「反規模效應」。

互聯網721格局

互聯網公司就唔同啦,無論係獲客時間同規模效應都大大超越線下生意,只需要整個apps出黎,一萬個客又係咁用、十萬、百萬個客都係咁用。愈多人用,邊際成本愈少,profit margin愈高。亦因為咁佢地狼好多,唔會等到賺錢先慢慢投資再發展,而係一開波就要鬥燒錢、搶用戶、上規模。咁肯洗錢就係等有朝一日,市場上死剩得幾個對手,生還者就會可以收購合併、最終成為贏家獨佔最大舊餅,亦即互聯網721格局 : 第一名市佔70%;第二名佔20%;其餘瓜分剩低既一成。去到呢個階段,成個市場差唔多你玩曬,再諗點樣賺返之前燒咗既錢都唔遲。

*此文章由專欄作家:財經卒仔提供

FB: 財經卒仔 (https://www.facebook.com/FinSmallSoldier/)

IG: @finsmallsoldier

免責聲明:本平台發佈的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本平台及相關作者無關。而WavingCat旗下網站或社交平台的網誌內容及觀點,僅屬筆者個人意見,與WavingCat立場無關。WavingCat對因上述人士張貼之資訊內容所帶來之損失或損害概不負責。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章【財政預算案2022】「派糖」每人增至10,000元 不過仲係唔肯派現金
下一篇文章【月供股票】WavingCat 為你介紹月供股票好唔好,好處壞處及邊間好。