【每隻股票買幾多?成個倉位點配置?我主要睇兩樣嘢】

股票買幾多

今個禮拜買左6隻股票,每隻買幾多,成個倉位配置點決定,我主要睇兩樣

1. 對公司既熟識程度
2. 確定性及商業模式

熟唔熟間公司就只有自己知,反而想講下確定性及商業模式。喺ROE既角度下,可以分為三種商業模式。首先大家可能知道ROE係由三個factors組成,分別係純利率(net profit margin)、資產周轉率(Asset turnover)同槓桿比率(Leverage ratio)組成,如果一家企業能夠極大地提升其中一個factors,就能夠產生高ROE,亦由此衍生出三種商業模式。

高margin模式

我個倉既代表就係騰訊同Meta,佢地既純利率都高達30%左右。呢啲公司既產品或者服務非常賺錢,相對上對管理層既要求唔使好高,唔行差踏錯都喺度等收錢。呢個商業模式最好既地方係,當經濟衰退時,蝕錢既機會最少,最多就賺少啲,可以捱得過逆境既機會最高,所以確定性亦係最高。呢個係最好既商業模式。

打turn模式

我個倉既代表就係利亞同日本城,佢地margin就得個位數,全靠打高turnover,做多幾轉生意谷高個ROE。一般佢地個資產周轉率都去到2.0樓上,意思係用1蚊資產做到2蚊生意。呢種生意通常對管理層既要求比較高,梗係啦,margin得個丁丁咁多,郁啲都無咗,整個效率要求都好高。呢種商業模式,喺經濟衰退時,比較容易蝕錢,但由於一般無嘜有息債,槓桿低,衰退時間唔長,都頂得住,確定性差少少,係次一等既商業模式。

高槓桿模式

我個倉既代表就係平安。其實大部分金融類都係呢種模式,賺1%至2%息差,用十幾倍槓桿,谷到ROE去到十幾、二十%。呢種生意模式最脆弱,當經濟衰退時,甚至金融危機,資產端有可能出現極大減值壓力,蝕錢不突止,更有資不抵債, 倒閉既風險,所以確定性係最低,係次次等既商業模式。如果要揀呢種生意投資,一定係揀龍頭,最好嗰間。

近期個人總結

由於騰訊係最好既商業模式,我亦比較熟,所以個倉位去到40%,不過已經係最盡,唔會加到超過40%。至於Meta都係呢個模式,但係我study佢既時間唔夠長,有啲地方仲係有顧慮,所以最大倉位俾到10%,已經配置晒。

至於利亞同日本城,我比較鐘意利亞,因為喺OK時代,佢deliver到相對穩定既高ROE,而且好肯派錢,對佢管理層比較有信心,我俾佢個倉位最大去到20%,目前接近打爆。日本城呢幾年條數愈黎愈好,可能同換咗老闆有關,而且都肯派錢,我俾佢個倉位最大去到15%,都仲未打爆。

平安,商業模式既原因,15%已經係我俾到最大既倉位,已經入齊貨。

最後剩返啲錢未諗到買嘜,現價恒指仍然好平,我買入2800盈富基金作為儲存資產既工具,搵到目標後再用佢黎換馬。

*此文章由專欄作家:財經卒仔提供

FB: 財經卒仔 (https://www.facebook.com/FinSmallSoldier/)

IG: @finsmallsoldier

免責聲明:本平台發佈的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本平台及相關作者無關。而WavingCat旗下網站或社交平台的網誌內容及觀點,僅屬筆者個人意見,與WavingCat立場無關。WavingCat對因上述人士張貼之資訊內容所帶來之損失或損害概不負責。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章【煤氣08年來首不派紅股】 中華煤氣股價急挫 創年半以來新低位
下一篇文章【日圓創六年新低 🇯🇵 你又會唔會兌定啲等返鄉下?】