【巴菲特靈魂伙伴 芒格的悲慘人生】

芒格

查理‧芒格(Charles Munger),巴菲特既靈魂伙伴,巴郡副董事長,知名億萬富翁同一位智者。佢教曉咗我凡事都要倒轉黎諗。股市點樣賺錢?諗下股市點樣蝕錢,之後避開蝕錢既做法你就會賺錢;人生點樣過得好?諗下做啲咩會令人生過得差,避開晒佢,你人生就會過得好。

芒格的生平

芒格一生成就非凡,而家好多人都識佢,但你未必知佢所經歷過既苦難,更加唔係人人受得起,如果我是旦中一樣,都未必可以振作起身。
芒格既大學時代正值第二次世界大戰,19歲就走咗去參軍。正當芒格被軍隊調派去加州理工學院讀氣象學,佢細妹介紹個女同學 ─ Nancy俾佢識,好快就一齊咗。當時成個美國處於戰爭既恐懼同悲痛中,芒格同Nancy隨時都要面對長期、甚至永遠既分開。戰爭、年輕、戀愛,喺呢個極之浪漫既氣氛底下,無幾耐佢地就不顧一切結緍。嗰年芒格21歲,Nancy 19歲,錯誤就係咁樣種下。
一個嚴肅既律師,一個追求自由既靈魂,最老套既劇情:因了解而分開。

芒格的悲慘人生開端

芒格同Nancy八年既婚姻終於走到盡頭,但喺呢八年裏,佢地有咗三個小朋友,一個仔、兩個女。離婚後芒格一無所有,加上仔女都係跟媽咪,芒格當時孤獨、落漠既心情可想而知。但最慘都唔係呢樣,離婚後無耐,芒格最愛既9歲大仔Teddy患上嚴重既白血病,亦都係呢個病,奪去咗芒格父親生命。
當時患有白血病既細路幾乎無可能好返,芒格崩潰了。有一次芒格帶住仔女同朋友去俱樂部玩,一個小朋友問Teddy想唔想一齊去玩,虛弱既Teddy話「唔好啦,我真係唔得,太攰」,呢個情景外人睇都無不心痛,更何況係芒格?佢只可以眼白白咁,睇住Teddy既生命一點一滴咁消逝,慢慢死去。
Teddy確診第二年後過咗身。當年芒格31歲。白頭人送黑頭人,呢個打擊我諗無乜邊個可以承受得住。

悲慘結束了

愛子過身、婚姻失敗、離婚後一大筆錢無咗,但芒格最後都頂住,盡量正常生活,佢認為就算面對難以置信既悲劇,都唔應該將一個悲劇演變成第二個、甚至第三個悲劇。
稍為幸運既係,喺Teddy患病期間,芒格有同事介紹咗第二個Nancy俾佢。第二個Nancy對於芒格黎講,就好似一道光,將佢從無盡既黑暗救起,生命再次有返色彩。第二個Nancy亦係一個離過婚既人,有兩個仔。佢地相識一年後結婚,之後又再生咗四個仔女,加埋兩人各自兩個細路,就係八個細路。雖然芒格當時已經係一位出色既律師,但對於咁大個家庭,生活仍然有啲吃力。不過芒格無自怨自艾,非常發奮。
之後喺事業上,芒格非常成功,自己開律師樓,開發房地產,再搞合伙人基金,之後仲拍住巴菲特建立巴郡商業帝國。

悲慘延續/一

你以為芒格既災難已經到盡頭?未。
正當芒格同巴菲特忙緊水牛城晚報同對手打官司,而水牛城晚報仲要不斷蝕錢,真係煩到死既時候,52歲既芒格開始發現自己視力出現問題,原來係患上嚴重既急性白內障。對於一個工作繁忙,熱愛睇書既人,雙眼有事肯定憂心仲仲,係一個好大打擊。但據巴菲持講,芒格睇起黎無乜野,表現相當克制,佢都好出奇芒格無對自己既問題有任何抱怨,依然繼續同佢電話會議傾公事。

悲慘延續/二

過多兩年,54歲既芒格已經好清楚會因為白內障失去視力。呢個時候,佢決定做白內障手術。但芒格非常倒霉,手術後得到非常罕見既後遺症,有啲眼外細胞入眼、佔據眼內空間,損壞視覺神經。即係完全盲咗。比盲咗更慘既係,呢啲外來細胞不斷擴散,令到芒格承受極大痛楚。最後,芒格決定做切除手術,摘除左眼,裝上一個玻璃眼球。
更唔好彩既係,芒格右眼,亦都有白內障,但佢唔想再經歷多次痛苦,決定放棄手術,改為戴上一副勁厚既白內障眼鏡。自此,芒格就帶著一隻有白內障既單眼過咗43年,直到而家。
芒格喺人生經歷咗情感同身體既巨大創傷,但依然積極面對,得到極大既成功,而且家庭幸福,兒孫滿堂。我覺得真係無咩必要為咗一啲唔順意既事,例如事業或者投資,就自怨自艾。雖然好難,但向芒格學習。

*此文章由專欄作家:財經卒仔提供

FB: 財經卒仔 (https://www.facebook.com/FinSmallSoldier/)

IG: @finsmallsoldier

免責聲明:本平台發佈的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本平台及相關作者無關。而WavingCat旗下網站或社交平台的網誌內容及觀點,僅屬筆者個人意見,與WavingCat立場無關。WavingCat對因上述人士張貼之資訊內容所帶來之損失或損害概不負責。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章【香港地產商其他業務收入遠超賣港樓? 拆解地產商收入來源】
下一篇文章【英國供應鏈危機致800萬人無嘢買 約翰遜竟照去度假!】