樓價keep住跌，自住用家其實都幾不安，因為樓價跌到咁，究竟可以出手執得平貨未？確實，自己住嘅，平又唔買，唔通等貴先買咩？筆者可以做嘅，就係將雙方論點擺出嚟，等大家參考。學誠哥嗰句話齋：買樓要量力而為！
Table of Contents
樓好點睇
呢個時勢，做樓好日日都畀人笑，因為一路唱好，個價就一路keep住跌，日日新聞都講緊區區有筍盤，但又冇人買，即是未夠筍啦！所以樓好呢期比較忙，忙於搵論點，去支持自己嘅睇法，例如以下幾點：
放寬按揭保險
政府都其實已開始落手救樓市，早於今年7月，首先就放寬咗按揭保險。舊制係首置人士400萬以下樓可以申請最高9成按揭，而新制係1,000萬以下樓可以申請最高9成按揭；1,000萬至1,500萬樓可以申請最高8成按揭，貸款上限900萬；1,500萬至3,000萬樓可以申請最高7成按揭，貸款上限1,200萬。而且新制下，首置人士就算過唔到壓力測試，只要達到供款佔入息一半嘅標準，都可以用加保費形式做到按保。
好明顯，放寬後要上車係容易咗，尤其而家樓價回落，3房單位隨時6、700萬有交易，即是低過1球就可以入市買中型單位。至於在高息、高貸款額嘅環境下會供得幾辛苦，呢啲就後話喇，但政府係做咗嘢，放寬咗門檻，一旦市民回復信心時，起碼入到場先。
印花稅減辣
政府救樓市措施，當然唔少得最近嘅減辣措施，首先將額外印花稅（SSD）禁售期由3年縮短至2年，綁少1年；買家印花稅（BSD）同埋新住宅印花稅（NRSD）稅率減半，由15%減至7.5%；專才買樓，印花稅「先免後徵」，專才最後唔成為香港永久居民先至要收。
相信大家都仲記得，其實地產界一開始係想要完全「撤辣」，但結果得到嘅係「減辣」，都收貨啦（唔係點啫）。而其實政府呢招都幾聰明，如果一開波就撤辣，唔work的話就返唔到轉頭，而家擠一半牙膏先，到真係work，咁下年可以再擠多少少，由2年cut到1年，咁又可以玩多兩年，咁大家就明白，香港樓市嚟緊仲有得improve嘅，唔會無招可出，係咪前途一片光明先。
發展商樓價保障
政府做嘢，發展商都唔敢怠慢，叫佢地投地就唔肯啫，但出啲小聰明總有嘅。好似新地屯門NOVO LAND就推出「置開心」樓價保障計劃，咩玩法呢？就係去到2024年5月，即是預計入伙日，如果樓價跌（樓價係計樓價指數），跌幾多發展商同你分擔一半，但當然有上限，就係樓價嘅5%，計落即是半年跌1成的話，佢賠返半成畀你，非常刺激好玩，如果我係業主都唔知想佢升定跌好，唔怪得叫「置開心」而唔係「置安心」。
你班友成日話驚樓價仲有得跌所以唔出手，而家幫你包埋底，信心係咪返晒嚟？
樓淡點睇
做樓淡就易好多，皆因樓市真係好差嘛，我唔需要任何有力證據，只需要覺得睇唔到有改善，其實就可以睇淡。而樓淡心目中，現時仲有以下兩個解唔開嘅結。
房住不炒
買樓咁大投資，當然要睇長遠啲，不過當我地撇開短期樓價下滑唔理，嘗試睇遠啲，睇將來，咁你就會睇到「房住不炒」4隻大字。要明白「房住不炒」唔係口號，而係中國長遠國策，而你諗真啲，其實樓又真係應該要嚟住，而唔係要嚟炒架喎，最好就係樓價人人都負擔得起添！如果咁睇的話，而家嘅樓價即使跌到業主們喊晒口，但對於好多未上車嘅香港人來講，仍然係太貴。國家會唔會為咗香港業主嘅損失而去改變策略呢？機會好似微咗啲。
美國就算唔加息，都好難減息
樓價大跌其中一個原因係利息不斷升，標普都話，如果美國利率keep住高過4厘，香港樓價估計仲有得跌2成。經過呢一年幾不停加息，現時已經去到5.5厘水平（暫時維持咗3個月），有人話：「加息週期完咗喇！」呢個已經係一個好樂觀嘅睇法，但你好少聽到人話：「減息週期嚟到喇！」邊個信？咁即是最樂觀都只係keep住而家5厘以上，對於香港樓價，仍然持續帶來破壞。
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓