被詛咒定係有陰謀?剖析幣圈連環死亡事件之謎

被詛咒定係有陰謀?剖析幣圈連環死亡事件之謎
被詛咒定係有陰謀?剖析幣圈連環死亡事件之謎

由細到大睇好多電影,或者近年經歷好多新聞,都有好多劇情或陰謀論,好多嘢都錢作怪。加密貨幣呢幾年幫好多人發達,同時亦出現好多騙局,近幾年又真係有幾單連環死亡事件,今個月又有一單新嘅謀殺案!究竟係幣圈被詛咒?定係早有預謀掩埋某啲真相?不如一齊研究吓。

幣圈連環死亡事件 與 比特幣歷年走勢比較

雖然未必有關係,但如果比較返幣圈死亡事件嘅發生時間,同埋Bitcoin走勢,又真係幾巧合,通通都係發生於Bitcoin破大頂後冧市嘅時間。不過連環死亡事件會唔會其實係同炒幣輸錢發窮惡有關?或者洗黑錢之類嘅黑幕?我覺得睇返個走勢,懷疑下都係合理嘅。

2018年4月16日 紐約梅隆銀行後人 懷疑服迷幻藥後猝死

Matthew Mellon係紐約梅隆銀行(BNY Mellon)繼承人之一,後生時已經有大筆遺產在手,本身已經有錢,但佢最出名係買Bitcoin,投資200萬美元,升值到10億美元!Matthew Mellon於2018年入住墨西哥Cancun一間戒毒所前,被發現在酒店房間猝死,疑似服用死藤水(一種南美盛行嘅薩滿通靈藥物,有迷幻成份)致死。佢死後留下100萬個bitcoin,有說佢家人一直搵唔到呢批加密遺產,亦有說佢地搵唔到個key,總之到現時為止都係攞唔到,賣唔到。

2018年12月9日 QuadrigaCX創辦人 懷疑詐死

呢單犀利,連Netfli都有紀錄片(《Trust No One》)講呢件事,係幣圈其中一個最大謎團。話說QuadrigaCX曾經係加拿大最大嘅加密貨幣交易所,創辦人兼CEO Gerald Cotten當時年僅30歲,2018年11月底佢同太太飛咗去印度渡蜜月,12月8日佢因為克隆氏症併發症,包括感染性休克、穿孔、腹膜炎和腸梗阻在當地入院,12月9日死亡。

弔詭嘅係,佢死前一個月內先立完遺囑,然後佢仲帶住11萬個客人嘅加密貨幣,總值2億5千萬加幣,在佢身上嘅cold wallet(離線錢包),而佢就帶埋個密碼入棺材!佢死後5個月內,QuadrigaCX就破咗產,於是好多人就質疑,根本Gerald Cotten係假死,一來克隆氏症死亡率極低,二來有人聲稱去印度調查發現佢張死亡證連名都串錯,亦冇任何驗屍報告。Gerald Cotten究竟係假死?定係謀殺(有傳聞指佢本身盤生意都係騙局)?定真係意外死亡?直至而家都被視為一個謎。

2022年10月28日 MakerDAO創辦人 遇溺身亡

來到2022年10至11月,幣圈1個月內接連有3人死亡,第一宗係MakerDAO嘅聯合創始人Nikolai Mushegian,佢嘅屍體於2022年10月28日於波多黎各一海灘(Condado beach)被發現,死時年僅29歲,死因為遇溺身亡。

遇溺並非奇事,該沙灘一向都係危險多意外發生,奇就奇在Nikolai Mushegian死前一日發咗一條tweet,內容係話CIA(美國中央情報局)、Mossad(以色列情報組織莫薩德)等在波多黎各與加勒比海島設局陷害,而佢前女友係間諜,安插咗一部手提電腦去害佢,佢會被折磨至死。條Tweet而家仍在(https://twitter.com/delete_shitcoin/status/1585918718088970241),有興趣可自行查閱。不過最後警方都查唔到有謀殺成份,官方說法係意外死亡,你又信唔信?

2022年11月23日 Amber Group創辦人 睡夢中猝死

Tiantian Kullander死時只有30歲,係加密貨幣公司Amber Group嘅Co-Founder,本身曾在高盛同埋大摩做交易員。2022年11月28日傳出死訊,指佢11月23日在睡夢中猝死。Amber Group總公司在香港,佢2021年4月先在香港結婚,婚後育有1子,估唔到結婚年半之後就咁走咗。

2022年11月25日 Libertex Group創辦人 直升機墜機身亡

Vyacheslav Taran係俄羅斯幣圈富豪,佢係加密貨幣交易所 Libertex Group創辦人,本身仲係

外匯交易平台 Forex Club嘅Co-Founder。2022年11月25日,佢搭直昇機由瑞士Lausanne起飛,去到法國Villefranche-sur-Me附近墜機,當時53歲嘅Vyacheslav Taran同機師一同身亡。

呢單係1個月內第3單幣圈死亡事件,當然就引來好多懷疑,究竟係咪意外?定係殺人事件?尤其Vyacheslav Taran係俄羅斯人,就可以有更多陰謀論,因為自從俄烏戰爭開始,俄國寡頭死亡事件接二連三,比幣圈更亂,所以有傳Vyacheslav Taran可能同俄羅斯對外情報局有聯繫,利用加密貨幣幫助俄羅斯政府洗錢,因此引來殺機。

2023年4月4日 CashApp創辦人 三藩市遇刺身亡

2023年4月4日美國時間凌晨2:34,三藩市警方收到求救電話,有人被刺傷。警員6分鐘後到場,將傷者送去醫院搶救但最後不治。死者身中三刀,係CashApp創辦人Bob Lee,年齡43歲。呢單係暫時最新嘅幣圈死亡事件,相當震撼,連Elon Musk都有出Post鬧三藩市治安差(Elon話佢好多朋友都試過被襲擊,同埋好多時就算捉到人都會放走,質疑三藩市有冇心整頓治安)。

執筆之時,呢單案仲打緊官司,4月13日,警方捉到疑犯Nima Momeni,指事發前死者同疑犯同車出入,疑犯跟死者落車後有動作,之後發生死亡事件。Nima Momeni現年38歲,住三藩市灣區,係軟件公司Expand IT老闆,同Bob Lee認識。至於佢係咪凶手?動機係乜?就要睇埋之後發展了。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章全港戲院日$30到處伏 黃牛炒價高見$100
下一篇文章借書唔還 審計署報告揭 圖書館被走數570萬元