Table of Contents
十萬大關我來了
自從侵侵喺選舉期間承諾過要將美國打造成世界加密貨幣之都，到侵侵真係當選，成個加密貨幣市場好似發咗癲咁一路向上。其中比特幣更加就嚟到10萬美元呢個大關，加密貨幣之所以可以愈嚟愈強勢，最主要原因係因為最近有消息傳出侵侵考慮緊喺白宮設立一個專門負責加密貨幣政策嘅新職位。雖然目前仲未清楚呢個職位係點樣運作，但係呢個職位係白宮有史以來第一個專門負責加密貨幣行業嘅職位。呢次可以喺白宮插到旗，無疑幫到加密貨幣走上主流產業，所以由侵侵當選至今，比特幣已經升咗46%。
MSTR囤幣點解股價跌？
正當比特幣升到咁強勢之際，最近突然發生咗一件幾特別嘅事，就係有比特幣影子股之稱嘅MSTR理論上都應該跟住比特幣升，但最近竟然唔升之餘仲要暴跌，到底發生咩事呢？MSTR本來係做商業智慧嘅軟體供應商，但就喺疫情期間，MSTR諗住All In比特幣嚟對沖通貨膨漲，點知買吓買吓就做咗美國上市公司中持有比特幣最多嘅企業，自此之後，MSTR就成為咗比特幣嘅影子股，股價亦同比特幣掛勾咗。2020年，MSTR更加直接將公司轉型成為加密貨幣投資平台，加上佢哋會用槓桿買比特幣，所以今年MSTR一年內升咗六倍，仲升得多過比特幣。正當比特幣衝上10萬，大家都以為MSTR會繼續升嘅時候，突然一日之內跌超過31%。
老老實實買幣好過
MSTR股價之所以無啦啦重挫主要係因為知名做空機構香櫞喺社交平台X發文話，自己做空緊MSTR呢間公司，而做空原因係因為佢哋認為MSTR已經變成咗比特幣投資基金，咁買MSTR股票其實就即係間接投資緊比特幣，咁依加又有比特幣ETF，直接買賣比特幣都非常容易，根本就唔洗多此一舉買MSTR，所以就做空佢。香櫞最後仲要補多句話雖然佢哋仍然睇好比特幣，但佢哋會繼續透過做空MSTR以作來避險。雖則沽空機構最鍾意雞蛋裡挑骨頭，之後放大嚟嚇啲投資者，搞到無貨嘅投資者唔敢買入，有貨嘅投資者就恐慌性拋售，咁就可以壓低個股價從而賺錢，不過香櫞今次又講得無錯，MSTR基本面已經無乜投資。
比特幣跌 MSTR死得
如果由基本面嚟看，MSTR嘅市值比佢哋持有嘅比特幣價值多大約三倍，即係計返條數，MSTR嘅投資者實際俾緊25萬美元去買一粒比特幣，而比特幣市場價都仲未到10萬美元，所以依加MSTR主力去炒比特幣，其他業務都無收益，基本面係絕對唔抵買。加上今次咁樣俾香櫞咁講一講，睇怕MSTR都凶多吉少，睇返技術分析，一路以嚟都頭也不回咁升，所以都唔係好多支持位。如果就咁睇有個好細力嘅支持喺$320，要搵返個較大嘅支持怕且都要去到$183呢嘅位置，而我相信回返去呢啲位嘅機會都幾大，所以無貨嘅唔好撈底，食花生算，有貨嘅都要考慮吓及早止蝕，因為基本面同埋消息面都唔好，到比特幣回調嘅時候，相信MSTR會跌得更慘重。