聖誕旅行旺季又嚟，你有冇煩緊，究竟帶邊張信用卡去旅行簽賬好？其實旅行簽卡不外乎兩件事：信用卡外幣回贈同埋外幣交易手續費，本文就為你比較晒市面上嘅高外幣回贈信用卡，同埋佢地嘅外幣交易手續費，發現現時竟然有張卡可以做到38%回贈咁誇張！一齊睇下啦。（本文資料截至2023年12月12日）
Table of Contents
外幣簽賬｜信用卡外幣回贈 與 外幣交易手續費比較
以下為香港較高外幣簽賬回贈嘅信用卡，現時可以做到嘅最高回贈率，同埋外幣交易手續費比較。留意最高回贈率需要多個條件才能達成，例如需要指定簽賬額同埋優惠，只用作參考用途。
| 信用卡 | 最高外幣回贈率 | 外幣交易手續費 |
| 渣打Smart信用卡 | 38.05% | 0% |
| 恒生MMPOWER | 19% | 1.95% |
| 信銀國際Motion信用卡 | 16% | 1.95% |
| 滙豐Visa Signature卡 | 14.92% | 1.95% |
| 滙豐白金Visa卡 | 13.72% | 1.95% |
| 滙豐Pulse銀聯雙幣鑽石信用卡 | 13.19% | 0% |
| EarnMORE銀聯卡 | 10.24% | 0% |
| 滙豐Red信用卡 | 9.68% | 1.95% |
| 中銀Chill Card | 5% | 1.95% |
外幣簽賬｜最緊要回贈高？銀聯匯率最差？
睇返上面個比較表，部分嘅回贈率非常誇張，係咪即是話，最緊要睇回贈率去揀信用卡？又唔一定！回贈率高固然好，但相同信用卡，唔同簽賬額未必一樣回咁多，或者你唔係新客，少個迎新，回贈率又會降好多！反而最緊要係好多人都會忽略嘅外幣交易手續費，如果有得揀，首先盡量揀免外幣交易手續費嘅信用卡（例如銀聯），否則所有簽賬仲未計蝕匯，就先加咗1.95%收費係非常唔抵！其次先睇回贈率！
至於匯率方面，坊間好多人都會話，VM（Visa／MasterCard）匯率好過銀聯好多，其實係都市傳說，筆者年頭去日本時已寫過一篇，實測銀聯匯率唔一定差過Visa、MasterCard！所以唔好聽人亂講，匯率根本係海鮮價，簽嗰下先知邊個高邊個低，唔會話銀聯一定差。
外幣簽賬｜渣打Smart信用卡 外幣回贈高達38.05%！轄免外幣交易手續費！
比較完最高外幣回贈率，都要解釋返點計出嚟，下文都係幾張信用卡嘅回贈解說，首先由渣打Smart信用卡開始。由於渣打Smart信用卡簽$4,000就食到全額迎新，而又冇其他特別優惠需要兼顧，所以簽$4,000就一定係最高回贈率，如果你手上冇渣打信用卡，好值得出一張食迎新。留意返，就算簽超過$4,000，其實筆者都仍然會推薦呢張卡，首先佢免外幣交易手續費，其次佢基本回贈雖低，但佢係無上限，簽得多回得多，唔會有樽頸。
| 渣打Smart信用卡 | 簽HK$4,000可得回贈 | 回贈解說 |
| 基本外幣回贈 | $22 | 此卡簽賬有無上限0.56%現金回贈 |
| 迎新 | $1,200 | 全新客戶申請有迎新，簽$4,000有$1,200現金回贈 |
| 渣打信用卡冬日禮遇 | $300 | 而家做緊額外迎新，即日至2024年2月29日出卡有多$300現金回贈（詳情） |
| 總共 | $1,522 | |
| 回贈率 | 38.05% |
外幣簽賬｜恒生MMPOWER 外幣回贈高達19%！簽賬彈性高！
恒生MMPOWER回贈率都好靚，而且每月回贈率勁高，達$800，要簽$16,000先簽爆，非常好用。不過用來去旅行的話，就因為有1.95% 外幣交易手續費而爭少少，但如果你預計簽賬額在$16,000內，呢張都係好選擇。
| 恒生MMPOWER | 簽HK$5,000可得回贈 | 回贈解說 |
| 基本外幣回贈 | $250 | 自選類別可以揀外幣簽賬，會有5% +FUN Dollars回贈，每月上限回$800 +FUN Dollars |
| 迎新 | $700 | 新客出卡有迎新，頭60日簽滿$5,000有$700 +FUN Dollars，舊客出卡都有迎舊，簽$8,000有$300 +FUN Dollars |
| 總共 | $950 | |
| 回贈率 | 19.00% |
外幣簽賬｜滙豐信用卡 外幣回贈高達14.92%！VS回贈最多！銀聯轄免外幣交易手續費！
滙豐有幾張信用卡，用嚟旅行都有高回贈，因為最近做緊2個優惠：「最紅冬日賞簽賬優惠」同埋滙豐Travel Guru 會員計劃，回多好多。至於以下幾張滙豐當中，筆者就比較推薦滙豐Pulse銀聯雙幣鑽石信用卡，免外幣交易手續費嘛！
| 回贈項目 | 簽HK$38,000可得回贈 | |||
| 滙豐Visa Signature卡 | 滙豐白金Visa卡 | 滙豐Pulse銀聯雙幣鑽石信用卡 | 滙豐Red信用卡 | |
| 基本外幣回贈 | $1,368 | $912 | $912 | $380 |
| Red Card外幣1%無上限回贈；VS最紅自主揀「賞世界」會有外幣簽賬3.6%「獎賞錢」回贈，白金／銀聯最紅自主揀「賞世界」會有外幣簽賬2.4%「獎賞錢」回贈，每年頭$100,000簽賬都有得回 | ||||
| 「最紅冬日賞簽賬優惠」 | $1,300 | $1,300 | $1,100 | $1,100 |
| 有2個tier，第1個係簽$12,000回$600「獎賞錢」，第2個係簽$38,000回$1,100「獎賞錢」，Visa會再多$200 | ||||
| 滙豐Travel Guru 會員計劃 | $2,200 | $2,200 | $2,200 | $2,200 |
| 有3個級別，累積簽愈多就愈高級，分別有外幣3%/4%/6%回贈，上限回$600/$1,400/$2,200「獎賞錢」 | ||||
| 迎新 | $800 | $800 | $800 | / |
| VS、白金、銀聯新客出卡有迎新，頭60日簽滿$8,000有$800「獎賞錢」，舊客出卡都有迎舊，簽$8,000有$300「獎賞錢」；Red Card現時冇迎新 | ||||
| 總共 | $5,668 | $5,212 | $5,012 | $3,680 |
| 回贈率 | 14.92% | 13.72% | 13.19% | 9.68% |
外幣簽賬｜信銀國際Motion信用卡 外幣回贈高達16%！
最近好多KOL推緊嘅呢張信銀國際Motion，確實係好高外幣回贈率，達16%，不過缺點都好明顯，首先16%係連迎新計，迎新期後就只得6%。你話6%都唔少呀？係！不過回贈上限就低咗啲，每月回得$200，即是簽$3,334就回到盡，旅行用就要啲策略，夾埋其他卡一齊用。另外1.95% 外幣交易手續費都係令筆者唔太推薦嘅原因。
| 信銀國際Motion信用卡 | 簽HK$3,334可得回贈 | 回贈解說 |
| 基本外幣回贈 | $200 | 外幣簽賬有6%現金回贈，每月回贈上限為$200，即是每月簽$3,334就回到盡 |
| 迎新 | $333 | 全新客戶出卡有迎新，外幣簽賬有額外10%現金回贈，最高回$1,000 |
| 總共 | $533 | |
| 回贈率 | 15.99% |
外幣簽賬｜EarnMORE銀聯卡 外幣回贈高達10.24%！轄免外幣交易手續費！
唔好睇EarnMORE得2%回贈，同上面啲卡比好似好少咁，其實在特定情況係非常好用。首先佢有1%係無上限回贈，仲高過渣打Smart信用卡嘅0.56%；其次呢張係銀聯，一樣轄免外幣交易手續費！所以有兩個情況你可以放心揀呢張信用卡：1. 你已經有渣打卡，食唔到渣打迎新；2. 你嘅簽賬額非常高，講緊幾十萬或以上。以上兩個情況加埋，市面上冇一張卡會回得多過EarnMORE。
| EarnMORE銀聯卡 | 簽HK$8,500可得回贈 | 回贈解說 |
| 基本外幣回贈 | $170 | 基本2%現金回贈，其中1%每年上限回贈$1,500，另外1%無上限回贈 |
| 迎新 | $700 | 迎新可選簽$8,500回$500現金回贈，網上申請再多$200現金回贈 |
| 總共 | $870 | |
| 回贈率 | 10.24% |
外幣簽賬｜中銀Chill Card 外幣回贈高達5%！
中銀都有張Chill Card主打高外幣回贈，有成5%！不過呢，每月上限回$150，旅遊唔多夠用，加上有1.95% 外幣交易手續費，如果你手上只有呢張，都勉強可用，否則都係盡快申請多張上面嘅信用卡會好啲。
Follow我們 Social Channel 得到最新資訊 : IG: wavingcat.hk FB: WavingCat招財貓