而家香港同內地已經通關，返過大陸都明白，而家已經唔興唱錢過關，或者過關唱錢，因為好多地方都唔收現金，亦唔收香港信用卡，變成收微信支付。但微信支付有分大陸版同香港版（WeChat Pay HK），兩者究竟有咩分別？邊度先會收香港版？或者簡單啲，等筆者話你知，返大陸點樣先可以用微信支付畀到錢啦！
Table of Contents
微信支付／WeChat Pay HK分別
講微信支付大陸版同香港版分別。咁當然係有大陸版先至再有香港版啦！微信支付係內建於微信裡面嘅支付錢包，現時除咗大陸版同香港版，仲有馬來西亞版，所有版本之間互不相通。即是收大陸版嘅地方，未必會收香港版；或者揸住大陸版嚟到香港，一樣都未必會收！你將佢地當成係唔同嘅支付平台觀感就fit晒喇！
WeChat Pay HK 雙向跨境支付
不過近年香港版同大陸版距離近咗，自2018年10月1日起推出雙向跨境支付，WeChat Pay HK用戶可以在中國內地部分商戶使用微信支付消費，直接將港幣兌換成人民幣付款，用戶在推廣期間使用WeChat Pay HK在中國內地商戶消費，唔收取手續費。
至於大陸會收WeChat Pay HK嘅部分商戶有幾部分？都有啲指定商戶嘅，包括線上商戶滴滴打車、美團外賣、大眾點評、高鐵12306之外，更有喜茶、奈雪之茶、海底撈、探魚、旅遊景點廣州長隆等等。另外WeChat Pay HK嘅乘車碼亦都可以搭深圳、廣州、北京、上海等城市嘅巴士同地鐵。睇個陣容就知道，起碼搭到車同餓唔死先啦。
WeChat Pay HK 跨境支付必須認證
如果你想用WeChat Pay HK做跨境支付，就要留意一定要做認證先得。而認證都有好多種，包括身份認證、銀行認證，做認證後餘額上限會有限制，由港幣$3,000至港幣$10萬不等，當然係做愈多認證上限就愈高。
認證方式
要使用WeChat Pay HK在國內消費，要先進行身份認證或綁定銀行卡，步驟如下：
- 把微信升級至最新版本（WeChat6.7.2或以上）
- 點擊WeChat
- 選擇「我」
- 選擇「服務」
- 選擇右上角「…」
- 支付管理
- 身份認證
如果狀態顯示「已認證」，就可以用，如果狀態顯示「未認證」，就需要身份認證，或綁定銀行帳戶或信用卡。要做身份認證，需要進入電子錢包服務頁面，驗證個人手機號碼同埋拍攝身份證正面，填寫所在地區、出生日期、住址，最後接受人臉識別。
要綁定香港銀行賬戶，進入「添加銀行賬戶」、選擇「銀行」、驗證支付密碼同埋輸入登記訊息；如果想綁定信用卡，進入「新增銀行卡」，驗證支付密碼、輸入卡號、有效期同埋安全碼，遞交申請後輸入銀行一次性密碼。
WeChat Pay HK 增值方法（附信用卡回贈表）
要使用WeChat Pay HK，首先要入錢落錢包，跟住先可以消費。增值有以下3種方法：
- 綁定信用卡增值
- 綁定銀行戶口增值
- 到便利店以現金增值
3種方法中，推薦信用卡增值，因為部分信用卡會有回贈！以下為幾張有回贈嘅信用卡推介：
| 信用卡 | WeChat Pay HK 增值回贈 |
| Citi Cash Back | 1%現金回贈 |
| DBS Black World Master | HK$6/里 |
| Citi Premiermiles | HK$8/里 |
WeChat Pay（微信支付 大陸版）懶人包
如果WeChat Pay HK 雙向跨境支付唔啱你用，無論如何都需要用微信支付大陸版，你可以用以下方法開通：
- 申請內地電話號碼：好簡單，在香港都做到，去電訊商開張一卡多號就得，不過留意返而家一定要實名先開到。
- 開內地銀行戶口：同樣可以在香港做到，攞你申請咗嘅內地電話號碼，帶埋身份證、回鄉卡等資料，去中銀或者恒生開個內地銀行戶口。開完要等，大約兩至三星期左右。
- 跟住就可以綁定內地電話號碼去WeChat App，填返資料就搞掂。
- 如果要由WeChat Pay HK轉去大陸錢包，直接在個人menu點擊「變更錢包地區」，改成「中國大陸」就可以。
Follow我們 Social Channel 得到最新資訊 : IG: wavingcat.hk FB: WavingCat招財貓
