香港人移民加拿大嘅救生艇計劃Stream A、Stream B，都行咗一段時間，早前突然再放寬Stream B，2023年8月15日開始Stream B會移除學歷要求（但OWP學歷要求不變），變相10年內（之前為5年內）大學畢業嘅港人，都可以行Stream B去加拿大工作一年換取PR！咁超過10年畢業係咪唔得呢？唔係，一樣有方法！等筆者同你詳細解構放寬後嘅要求，同埋教你最有效率嘅移加方案。
Table of Contents
2023年8月15日放寬後 加拿大Stream A及Stream B要求
Stream A、Stream B 共同要求
- 持有BNO或香港特區護照
- 申請和獲得永久居留權時身處加拿大境內
- 有效加拿大臨時居民身分
- 打算居住在加拿大魁北克省以外任何省或地區
- 申請截止日期為2026年8月31日
Stream A 要求
- 申請時過去3年內完成加拿大指定專上學習機構（DLI）嘅2年制或以上文憑，或學位（副學士、學士、碩士或博士），或1年研究生課程，並且最少50%課程要在加拿大完成
Stream B 要求
- 你必須已被允許在加拿大合法工作，即是持有合資格工作簽證
- 申請時過去3年內，於加拿大全職工作了最少12個月，或等量兼職工作時間（總共至少 1,560 小時）
Stream B各類合資格工作簽證要求
- 開放工作簽證 OWP（Open Work Permit）：申請前10年內獲得大學（副學士、學士、碩士或博士）學位，如非加拿大畢業須提供ECA（Educational Credential Assessment），
簽證為期3年
- 配偶開放工作簽證 SOWP（Spouse Open Work Permit）：配偶持有有效加拿大學生簽證或工作簽證，簽證為期3年
- 工作假期簽證 IEC（International Experience Canada）：18至30歲之間香港居民，最少有2,500加幣存款，逗留期間有醫療保險，簽證為期1年
現時BNO移民加拿大所有最有效率方案
以下將有心要移民加拿大嘅香港人分成3種，應該都係得呢3種，如果有第4種嘅麻煩話我知，會加返落去。
第1種：10年內大學畢業人士
- 最有效率方案：直接行Stream B申請OWP去加拿大工作，一年拿PR
之前行Stream B需要5年內畢業，2023年8月15日之後，就冇呢個要求，但當申請工作簽證（OWP）時，都需要10年內畢業先得，換句話說，今次放寬最大得益其實就係5至10年內畢業嘅朋友，可以即時行Stream B去加拿大工作，做滿1年至少1,560小時就可以申請PR！諗都唔使諗當然係呢個方案最快最低成本，仲有工作收入可以維持生活（FYI加拿大最低工資每個州都唔同，現時係加幣$13至$16.77之間）。
第2種：超過10年畢業或無大學學歷，有配偶一齊移民人士
- 最有效率方案：配偶行Stream A，自己申請SOWP去加拿大工作，一年拿PR
如果你已經畢業超過10年，又或者無大學學歷，咁係咪只能夠花十幾萬去加拿大讀兩年書，行Stream A呢？唔一定！仲有一個平啲又快啲嘅方法，但你需要有配偶同你一齊移民先得。話說除咗OWP之外，SOWP同埋IEC都係Stream B合資格嘅工作簽證，不過IEC得1年就唔建議喇，分分鐘差一、兩日儲唔夠鐘就喊都無謂。至於SOWP就同OWP一樣係3年，而SOWP係無任何學歷要求！所以你可以請配偶行Stream A去讀書，你就申請SOWP去加拿大工作行Stream B，滿一年就可以申請PR（或者你行Stream A去讀書，配偶申請SOWP去做嘢都得，視乎自己需要）！留意返，即使憑SOWP工作滿一年成功移民，另一位配偶嘅課程都最好讀埋佢，一來咁就唔係取巧「呃」移民局，二來有PR後就可以用平學費完成餘下課程，梗係讀埋佢抵啲。
第3種：超過10年畢業或無大學學歷，無配偶一齊移民人士
- 最有效率方案：行Stream A，讀書兩年拿PR
如果你已經畢業超過10年，又或者無大學學歷，同時又冇配偶同你一齊移民的話，咁就疊埋心水，報個2年課程去加拿大讀兩年書行Stream A吧！留意兩件事，首先Stream A時間緊逼，2023至2024期間就要入學，所以唔好等盡快報讀喇！然後如果你冇一技之長，咁就盡量揀一啲實用工作嘅課程去讀，唔好hea咗佢，加拿大有張diploma要搵工唔難，分分鐘揀啱課程搵啱工，可以改變埋你嘅人生架！
Follow我們 Social Channel 得到最新資訊 : IG: wavingcat.hk FB: WavingCat招財貓
