香港人日日困喺香港，去旅行已變成我哋喘口氣嘅必須品。究竟我地買旅遊保險時，要留意邊啲保障範圍係必要？旅遊保險保額又要買幾多先夠？同埋應該幾時買旅遊保險，早買定係臨出發先買好？筆者今次整理咗揀旅遊保險嘅重點向大家分享。
Table of Contents
首先要揀會保障手機嘅旅遊保險
呢個真係好重要，重要到需要一開始就講。真心唔明，點解市面上咁多旅遊保險，係會唔保手機嘅呢？要明白而家人人都用手機，唔保手機，就等於買醫保唔保你個肺一樣，係完全唔合理嘅。而且手機又貴，成日攞出嚟用又有機會被偷，又有跌壞嘅可能，所以大家如買旅遊保險，筆者推薦大家要買保手機嗰啲，因為有實際必要。
邊間旅遊保險保手機：
| 旅遊保險 | 手機保障（高達） |
| 恒生銀行 | HK$8,000 |
| 滙豐銀行 | HK$6,000 |
| 安聯 Allianz | HK$5,000 |
| 豐隆 | HK$3,000 |
| 藍十字 Blue Cross | HK$3,000 |
| 蘇黎世 Zurich | HK$3,000 |
| 富衛 FWD | HK$2,500 |
| 忠意 Generali | HK$2,500 |
| 安達 Chubb | HK$2,000 |
| 三井住友 MSIG | HK$2,000 |
| Avo | HK$2,000 |
個人財物保障要細睇
除咗上文講嘅手機之外，如果你有特別物品會帶去旅行，例如相機、手提電腦等，只要你覺得值錢，就應該揀一份cover到嘅旅遊保險，以免意外導致損失。題外話，仲有一樣物品成日都有機會claim保險，就係行李喼，經常都發生掟爆喼、個喼甩碌，甚至寄失或者唔見喼情況，機場工作人員都處理到熟晒手，所以你要make sure旅遊保險有足夠行李保障。
要就自己旅行目的去揀旅遊保險
有時旅行可以有目的，例如爬山、跳傘、滑雪、單車環島等，呢個時候就要留意，唔係間間旅遊保險都會保障呢啲有危險性活動。就算部分保險公司會保，都會寫明只保非競技性嘅危險活動，而且唔一定全部都保，又或者有條件地保，例如攀山高度有限制、潛水深度或裝備有限制等，必須於投保前睇清楚以免買完先發現冇受到保障。另外，上面提到「非競技」，即是如果涉及競技就大部分都唔保，特別係飛去外國跑馬拉松嘅選手要注意，記得確認會保先好買，有時要加錢買額外保障先有。
最好買完機票即刻買旅遊保
好多人都問，應該幾時買旅遊保險？呢個問題答案係愈早愈好，最好早到你買完機票，就即刻買埋旅遊保險就完美喇。點解？首先要明白，旅遊保險最大機會claim錢嘅，除咗財物損失之外，就係旅程延誤或者取消。你買完機票到你出發之間嘅日子，係有可能會令你嘅旅程出現變數而阻礙你成行。所以要盡早買旅遊保險，以保障呢啲情況你會有得賠，當然本身要保先得啦，例如目的地打仗，呢啲就幫你唔到喇。反正都要買，其實早買唔會辛苦咗，而且仲可以避免因為拖延而最後唔記得買保險添！
新冠肺炎保障 雖非必要但有好過冇
雖然而家大部分國家都已開晒關，唔會再check新冠肺炎，但係都要小心睇返自己去嘅國家入境條件，可能部分國家仲有少少限制。不過有樣嘢應該警惕，就係新冠肺炎最近又再有大量人中招，某啲國家都有提出警告，慎防佢地短期或中期內防疫政策突變，如買旅遊保險，雖非必要，但如有新冠肺炎保障會安心少少。
醫療保障 幾多保額先夠？
呢個問題唔係冇得計，但相當複雜，首先唔同國家醫療價錢唔同，其次係唔同意外所需醫療費用都唔同，並無一個絕對「夠用」嘅準則。不過同其他保險一樣，可以從性價比著手，即是同一保費能提供較高保障者，性價比較高。醫療保額當然愈高愈好，如你已有幾個心儀旅遊保險，盡量揀最高或較高保額為佳。
Follow我們 Social Channel 得到最新資訊 : IG: wavingcat.hk FB: WavingCat招財貓