利息不斷升，現時已無理由再做風險投資，好多人已食息超過半年，由活期玩到定期、收息股等，其實去到最後，都會接觸到美國國債呢個詞彙。美國國債（U.S. Treasury Securities），即是美國以自己為擔保發行嘅債券，係極低風險，歷史上從未違約嘅債券，現時短期至2年期嘅美國國債收益率已去到超過5厘水平，嘅高息又穩陣，本文就詳細講解美國國債走勢同埋買賣方法同收費啦！
Table of Contents
美國國債 年期分別
同世界大部分國家發行嘅債券一樣，美國國債都有分年期，主要分為短、中、長期：
- 短期為U.S. Treasury bill（T-bill），到期日由1個月至1年，唔會派息，但發行價會有折，到期收全價，即是當畀息。
- 中期為U.S. Treasury Note（T-Note），到期日由2年至10年，每半年派息，其中10Y，10年期美國國債，被認為係指標，你新聞見到美國國債又加息之類嘅新聞，但又冇講明年期，通常就係講緊10Y。
- 長期為U.S. Treasury Bonds（T-Bonds），到期日由10年至30年，每半年派息。
- 另外仲有美國國庫抗通脹債券，Treasury Inflation Protected Securities（TIPS），會按通脹（或通縮）調整，有3種年期，分別為5Y、10Y、20Y，每半年派息。
美國國債 收益率近1年走勢
美國國債同其他債券一樣，收益率（Yield）受債券市價影響，以下為美國國債半年期至30年期嘅近一年收益率比較（以下資料截至2023年10月13日為準），可以睇到每半年嘅調整幅度。
從表中所見，中長期美國國債由1年前有個小調整，到近半年大幅攀升，而短期更是升足成年，加上現時股市景氣仍未改善，筆者相信美國國債收益率仍在上升軌道當中。
| 年期 | 代號 | 現收益率（%） | 半年前收益率（%） | 1年前收益率（%） | ||
| 美國半年期國債 | US6M | 5.558 | +10.3% | 5.040 | +20.1% | 4.198 |
| 美國1年期國債 | US12M | 5.404 | +12.2% | 4.818 | +12.6% | 4.280 |
| 美國2年期國債 | US2Y | 5.069 | +21.0% | 4.188 | -5.9% | 4.450 |
| 美國3年期國債 | US3Y | 4.840 | +23.2% | 3.929 | -11.6% | 4.444 |
| 美國5年期國債 | US5Y | 4.685 | +26.3% | 3.708 | -12.4% | 4.232 |
| 美國7年期國債 | US7Y | 4.712 | +29.0% | 3.653 | -11.7% | 4.138 |
| 美國10年期國債 | US10Y | 4.629 | +29.8% | 3.604 | -10.2% | 4.015 |
| 美國30年期國債 | US30Y | 4.834 | +26.8% | 3.813 | -5.2% | 4.021 |
美國10年期國債 收益率歷史走勢圖
以下為美國10年期國債，幾十年間嘅歷史走勢（以下資料截至2023年10月13日為準）。
表中可見雖然歷史上現時並唔算好高息（相比80年代初嘅10至15厘），但係，而家個情況係由2020年嘅歷史低位（0.5厘），短短3年間極速反彈至4.685厘，幅度達9.37倍，並已導致美股近來交易量減，現金流入美債嘅情況。
美國國債 買賣收費
在香港買賣美國國債其實相當方便，唔少銀行或證券商都有提供呢個服務，不過收費就有分別。銀行收費相對唔透明同埋入場費較高，證券商就相宜得多，以下係幾間主要證券商嘅美國國債收費與及入場費比較。
| 證券商 | 入場費 | 佣金 | 平台費 |
| 盈透 | USD 1,000 | 少於USD100萬：0.002% 多於USD100萬：0.0001% 最低USD5 | / |
| 富途 | / | 0.08% | 0.04%，最高USD15 |
| 輝立 | USD 20,000 | 0.15% | / |
| 盛寶 | / | 基本賬戶：0.20%（低至 20 歐元） 白金賬戶：0.10%（低至 20 歐元） VIP 賬戶：0.05%（低至 20 歐元） | / |
在香港買賣美國國債，要交稅嗎？
由於在香港買美股，股息係要抽30%稅，所以唔少人都有疑問，咁買賣美國國債，要交稅嗎？簡單講，如果你係經證券商或銀行買美債，係唔需要交稅，因為債券係waive咗稅項。不過如果你係投資美國國債嘅ETF，咁佢地派嘅就係股息，股息就要抽30%稅喇。
美國國債 穩唔穩陣？
如果你google「美國國債」，都會見到大部分文章都會形容美國國債係「全球最安全」嘅債券，因為美國國債從不違約，即是擺得落去一定能夠連本帶利收返；二來美國係世界最大經濟體，破產機會極低，所以其他國家都會有美國國債儲備。所以當美債收益率不斷上升，係非常吸引，因為佢會成為市場上罕見嘅極低風險而高回報投資。
但從未違約，並唔代表將來都冇可能違約，現時世界立立亂，美國國債都面臨唔少負面因素，特別係國際局勢緊張，美國經濟持續不明朗，還債能力令人憂慮，你借錢畀人收息，都希望債仔有穩定收入準時還錢，係咪先？短期美債相信大家都唔會擔心有咩問題，但中長期，十年廿年，會唔會有甩漏？都唔係完全冇可能喎。所以投資美國國債，並非係絕對零風險投資，切記。
Follow我們 Social Channel 得到最新資訊 : IG: wavingcat.hk FB: WavingCat招財貓
