香港人尤其是打工仔，究竟做錯啲乜？之前有報道指今日頭10個月，強積金人均已蝕逾2成錢，即是接近5萬蚊。好多人平時唔多理份強積金，一時間都嘩然，點解差得咁緊要？而家點算，保本先定係趁低吸納？媽呀好亂呀！
Table of Contents
保守基金打和之外 全部慘跌1至4成
根據積金評級9月強積金表現調查，筆者搜集咗2022年初至9月份各強積金類別表現，整咗個表：
由表中數據一片紅已睇到，由年初至9月，除了貨幣市場基金之外，全部勁跌1至4成，連偏保守嘅債券基金亦不能倖免，勁跌5.76%至22.97%！蝕得最甘係股票基金，尤其係香港及中國，中位數係最低，跌29.85％！
至於個別基金表現，全年表現最差係「宏利環球精選（強積金）計劃 宏利MPF歐洲股票基金」，年初至9月跌40.87%；全年表現最好係「交通銀行愉盈退休強積金計劃 交通銀行強積金保守基金」，年初至9月升0.67%，簡單講2022年只要打到個和已經可以跑贏全香港！
股票基金輸得最甘 甚至跑輸股市 點解差得咁緊要？
其實在現時嘅後covid時代，環球經濟立立亂。對於香港人來講，近嘅有香港遲遲未正式開關，經濟復甦無期，中國大陸一樣未開關，而且恒大等房地產股仍然停牌中，經濟陰霾懸而未決；遠嘅有歐洲受俄羅斯戰爭核危機影響深遠，美國美聯儲不斷加息，亦重創自身與及環球經濟。
因此各大股市指數今年基本都係愈跌愈深，例如恒指由2022年初至9月底，累積跌6051點，跌幅26.0%；道瓊斯指數，年初至9月底累積跌7859點，跌幅21.4%。而以港、美股市為投資目標嘅股票基金（香港及中國）同埋股票基金（美國），年初至9月分別錄得-29.85%及-24.66%中位數跌幅，即是大部分都係跑輸指數。尤其股票基金（香港及中國）係香港人最重倉強積金，現時佔有率達21%，難怪近月開始見到強積金資產開始由股票基金流出，流入至保守基金
有冇方法賺返？而家轉保守會否太遲？
呢個係好正常想法，既然跌得咁犀利，應否止血（轉保守）？冇錯，既然數據清楚顯示，如果2022年年頭就由股票基金轉晒做保守，最少蝕少20%以上！但留意返，環球股市跌勢係由2021年初已經開始，例如恒生指數由31183.36跌至10月最低14947.39，跌幅已超過一半，達52.1%！嚴格來說我哋正身陷一個尚未被命名嘅股災之中而不自知。
「現在轉保守會否太遲？」呢個問題，等於問股市幾時跌完一樣，冇人會知道答案。正如都有唔少專家走出來教人，樂觀嘅就叫你趁低吸納，悲觀嘅就話仲有排跌止血為先，各有各講法。的確，如果股市2023年繼續深跌，現時轉保守「止血」，待一兩年後經濟復甦再轉股票基金，當然有利可圖；但如股市已到底，現在轉保守，則必定會錯過一大段升幅。魚與熊掌，最後都要留返你自己決定。
不過無論你點揀，要留意兩件事：第1，就算保守基金，亦只是低風險而非零風險，不能視作保本用途；第2，強積金係幾十年長線投資，需要你悉心打理，唔打理的話自然愈賺愈少，要保住自己血汗錢啊！
Follow我們 Social Channel 得到最新資訊 : IG: wavingcat.hk FB: WavingCat招財貓
