想食息，除咗定期存款之外，都仲有其他選擇，例如短期嘅儲蓄保險。短期係講緊1次過供款或最多分兩年供款，而保單年期1至5年嘅儲蓄保險，點解要分短期？因為儲蓄保有太多玩法，保單去到100歲咁長都有，呢啲就完全唔同玩法，無謂一齊比較。本文會為你比較今個月最高息嘅短期儲蓄保險（有4.5厘，唔低過定期架），同埋講返短期儲蓄保險同定期存款嘅分別。
Table of Contents
2023年5月短期儲蓄保險比較
就咁睇今個月保證回報率，香港嘅短期儲蓄保險相差都非常大，由2.25%至4.50%都有，而呢個range同銀行定期（12個月或以內）係相差不大，就咁睇息口我會話打和，不過定期資金冇儲蓄保鎖死咁耐（除blue嘅WeSave 短期高息儲蓄保 ST1有1年期以外），門檻亦低，呢方面係定期存款佔優。
| 保險公司 | 儲蓄保險 | 保單年期 | 供款期 | 保證回報率 | 最低保費（美元） | 最高保費（美元） |
| blue | WeSave 短期高息儲蓄保 ST1 | 1 | 1 | 4.50% | $4,000 | $1,000,000 |
| 立橋人壽 | 喜盈於「息」五年儲蓄守護保 2 | 5 | 1 | 4.28% | $800 | $750,000 |
| 恒生 | 五年儲蓄人壽保障計劃 | 5 | 2 | 4.10% | $1,800 | $45,000 |
| 中銀人壽 | 目標三年網上儲蓄保險計劃 | 3 | 2 | 3.90% | $1,200 | $125,000 |
| 立橋人壽 | 喜盈於「息」三年儲蓄守護保 2 | 3 | 1 | 3.88% | $800 | $450,000 |
| blue | WeSave高息儲蓄保E1 | 5 | 1 | 3.50% | $4,000 | $1,000,000 |
| Sun Life | 多盈儲蓄計劃 | 5 | 2 | 3% | $20,000 | $20,000 |
| blue | WeSave 定息儲蓄保S3 | 5 | 1 | 2.70% | $4,000 | $1,000,000 |
| 中銀人壽 | 綠色網上儲蓄保險計劃 | 3 | 1 | 2.65% | $375 | $250,000 |
| 富邦人壽 | 3年儲蓄易網上保險計劃 | 3 | 2 | 2.38% | $2,500 | $37,500 |
| 滙豐 | 滙捷儲蓄保險計劃 | 5 | 2 | 2.35% | $5,000 | $250,000 |
| 滙豐 | 滙捷儲蓄保險計劃 | 3 | 2 | 2.25% | $5,000 | $250,000 |
短期儲蓄保險 VS 定期存款
比較完近期息口，短期儲蓄保險同埋定期存款，仲有以下分別。
短期儲蓄保險 仍然唔算好短期
頭先都提到，定期資金冇儲蓄保鎖死咁耐，皆因定期相對靈活，最少擺7日甚至更短都得，最長通常都唔過兩年。但短期儲蓄保險短極都要1年，大部分都綁你3至5年，首先你要對自己現金流好有信心，絕對唔會動用到呢筆錢先，其次到你見到有其他更佳投資機會，亦更難等到資金到期再投資。留意返而家活期息都唔太差，如決定要將資金長時間綁定，一定要息口好靚先好咁做呀。
提早退保 比定期更傷
短期儲蓄保險另一特色，係每年息口唔同，拉勻先有保證回報率，所以必須坐到尾派彩，先會高息。如果你等錢洗，想提早取消短期儲蓄保險，要有心理準備頭一兩年息可以係負數都得，取消保單可以蝕好甘，唔係取消定期罰少少錢咁簡單。
儲蓄保期內包埋身故保障
短期儲蓄保險有個定期一定冇嘅好處，就係保單期內，通常都會包埋身故保障，保障額同你嘅存款額、紅利等掛勾，詳情要睇返個別保單。因為有身故保障，所以儲蓄保係真係似返個保險嘅。
短期儲蓄保險不受存款保障
香港銀行有50萬存款保障，就連定期都保障埋，不過短期儲蓄保險就同存款無關，並不會受到存款保障。但你話係咪好緊要呢？又未算嘅，始終香港咁耐都未試過有保險公司執笠（touch wood），而且保險公司都會有Reinsurance（再保險），理論上冇大問題嘅，但都需要提出呢個風險畀大家參考。
Follow我們 Social Channel 得到最新資訊 : IG: wavingcat.hk FB: WavingCat招財貓
