好多人會用被動收入多寡，作為能否提早退休嘅指標。不過被動收入有好多種，回報亦會隨市場格局起跌，例如之前曾大熱的債券，隨住綠債在加息環境下，二手市場勁跌而熱潮降溫；又或回報一時無兩嘅加密貨幣Staking，經歷幣值大跌同埋交易所倒閉而風光不再。嚟緊2023年，應該點部署先會有較佳被動收入，而又遠離風險呢？本文同大家探討。
| 被動收入 | 入場費 | 資產貶值風險 | 2023展望 |
|---|---|---|---|
| 銀行定期 | 低 | 低 | ⭐⭐⭐⭐⭐ |
| 銀行活期 | 低 | 低 | ⭐⭐⭐⭐ |
| 買物業收租 | 高 | 中 | ⭐⭐⭐ |
| 收息股 | 中 | 中 | ⭐⭐ |
| 債券 | 中 | 中 | ⭐ |
| 加密貨幣Staking | 低 | 高 | ⭐ |
Table of Contents
被動收入定義
被動收入（Passive Income）簡單講即是投資咗之後，唔需要做額外工作，就會不斷產生嘅收入，例如做定存，只要利息為正數，重複存錢就會有利息產生，以股票為例，買收息股嚟收息係被動收入，但買指數（例如標普500）或者ETF、基金等，賺取差價嘅，就唔算係被動收入。
被動收入是什麼？WavingCat告訴你被動收入重要性 : 被動收入
被動收入2023 展望
銀行定期展望將繼續加息
兩年前如果你話要將閒錢放定期，要預備好畀人恥笑，當時嘅港元定期真係低息到同冇一樣，就算外幣定期都只得人民幣息口好睇啲，但都係得1厘多少少。時移勢易，你又點估到低息年代咁快走到盡頭，加息來得既兇且猛，現時部分港元定期已經升到4厘甚至更多，仲有大量優惠搶客，2022年銀行定期絕對係穩陣又好賺。展望2023，美聯儲雖然話放緩加息，但冇話唔加，暫時可見，銀行定期依然會係2023年被動收入寵兒，要隨時留意新優惠，尤其短期（3個月內）高息定存優惠唔好放過。
銀行活期：息口持續增加 視乎虛銀能否轉虧為盈
銀行活期以往唔會有人當做投資，直至虛擬銀行發牌，其中幾間大搞高息活期燒錢上客，齋擺有日息收仲隨時可以提款，亦有50萬存款保障，曾經係小資金嘅完美被動收入。可惜，你就賺息，但虛銀就間間蝕大錢，上完客活期利息自然下降，降至一個食之無味棄之可惜嘅尷尬水平。2022年，隨住息口上升，虛銀活期利息都靚咗，但2023年會唔會繼續加呢？就要睇虛銀有冇辦法轉虧為盈，尤其係2022年嘅低息送錢式貸款有冇數返，如果有賺都有機會送多啲錢畀新客嘅。
買物業收租：樓價波動 富貴險中求
買樓收租由我哋阿爺嗰代已經係行之有效嘅被動收入。作為香港最缺乏嘅必須品，樓你唔買就要租，唔係就要瞓街，所以咁多年嚟樓價只升不跌，買樓收租除咗有穩定租金收入，物業同時不斷升值更加係雙贏！不過，最近樓價大跌令人質疑買樓收租係咪仲有肉食。睇返歷史，香港每次樓價大波動過後，都係會升返，唔代表今次係同以往係一樣。呢個好可能係信心問題，考驗大家對香港未來發展嘅信心夠唔夠。若果依然睇好，樓梗係應該趁平買，2023年會係好嘅入市時機，不過同時都要承受好大風險，若樓市未跌定就入市，有機會成負資產，請小心衡量承受能力先好做呀！
收息股：股市反覆 企業盈利能力受考驗
香港人對買股收息並不陌生，以前好多香港人以為月供滙豐，退休後就可以財自，但後來嘅事大家都知道，股價跌到青姐落淚，2020年仲試過唔派息，由賺息賺價，變成賺息蝕價，再到蝕息蝕價，大銼市民對於收息股信心。話雖如此，市面上依然有好多穩定收息股存在，例如部分內銀股、公用股、房地產信託基金等。不過香港仲未徹底通關，好多企業盈利能力受限，2023年除非市道有突破性好轉，否則收息股就算股息率幾吸引都好，賺息蝕價風險依然高企，遠不如擺定期穩陣賺幾厘好過。
債券：加息環境下吸引力大減
債券收益其實一直升緊，仲要升得好快，不過利息升得仲快。君不見綠色債券5月中上市，保證回報2.5厘，在當時來講絕對唔差，不過首日全部要蝕，孖展認購每手最少擺低HK$30，唔蝕走的話，隨時坐艇坐到今時今日！在現時加息環境下，就算本金冇蝕，亦蝕去機會成本，筆者展望2023年會繼續加息，債券好大機會會維持2022年現狀，繼續係低回報嘅被動收入，而風險就要睇返個別債券，風險由低至無限大不等。
加密貨幣Staking：風險極高 提款困難 前景難料
單純交易加密貨幣唔係被動收入，但Staking係，類似抵押畀幣商收息嘅概念。當加密貨幣好景時，你根本唔需要做加密貨幣買賣，淨係做Staking都可以賺10％至30%息，仲一邊睇住加密貨幣升值，非常爽！不過，加密貨幣Staking嘅缺點都非常明顯，首先係加密貨幣本身缺點，好難cash out，唔少人甚至因為買幣而被封銀行戶口。另外加密貨幣太新，唔係缺乏監管，而係直頭冇監管，大大間FTX都可以一夜之間崩盤！2023年，筆者就無從估計加密貨幣前景，但係幣安創辦人趙長鵬話會有更多交易所倒閉，你自己決定信唔信喇。
=== 引申投資閱讀 ===
【定存】一文整合銀行定存利率助您逆市保本 : 銀行定存
投資新手入門-新手投資前必睇懶人包-2022wavingcat教學 : 投資新手
牛市熊市是什麼?一文掌握牛市熊市意思、特徵、周期 : 牛市熊市
【止賺】保護投資目標，你需要知道的止賺技巧和訊號 : 止賺
使用止蝕位保護投資，你需要知道的3個止蝕技巧 :止蝕
3個參考投資組合比例，投資組合優化6部曲 : 投資組合
【經濟周期】投資前需了解的經濟周期四階段 : 經濟周期
Follow我們 Social Channel 得到最新資訊 : IG: wavingcat.hk FB: WavingCat招財貓
