新世界發展自從9月底鄭志剛請辭咗CEO一職之後，問題就一籮籮，被恆指踢出成份股，暴力套現，之後又換多次CEO，最後仲停埋牌。短短兩個月，已經可以用精彩嚟形容新世界發展嘅表現。而佢嘅股價亦都好完美咁反映哂出嚟，由10月頭嘅高位一跌，跌咗足足40%。今日就同大家分享一吓呢兩個月新世界發展嘅精彩表現。
Table of Contents
賤賣啟德體育園 股民唔buy
而喺新世界被踢出恆生指數成份股之後幾日，新世界又突然宣佈以大約4.17億出售啟德體育園項目75%股權俾新世界主要股東周大福企業，周大福企業就緊係表示歡迎，因為周大福企業都係鄭裕彤家族架嘛。2017年嗰陣新世界預估啟德呢個項目，一年淨利起碼有2.76億，依加準備開始賺錢就4億賣返俾自己，咁做法班投資者點會服氣。再者諗吓都知啟德園建築成本點止4億咁少，建設都已經用咗6年時間，超支肯定唔止4億元這個數，隨時有幾10億，依加賣得4億，咁搞法新世界之後嘅財報又點會靚仔呢？一起完就即刻賣，仲要平賣呢個優質資產俾自己，呢個係一個好典型公司要向下炒嘅情況，所以相信股價會繼續向下跌。
頻換CEO反映公司無長遠方向
就喺同一日，新世界宣佈只係做咗兩個月CEO嘅馬紹祥將會卸任，消息一出，原本已經跌緊嘅新世界再插多一吓，之後仲宣布埋停牌。而新世界就喺當日收市之後發通告，話馬紹祥因為個人原因辭任，而CEO一職將會由現任執行董事兼新世界中國地產有限公司CEO黃少媚接任。根據新世界網頁介紹，黃少媚喺2015年10月加入新世界，佢擁有超過20年房地產經驗，長期擔任中國內地城市基礎建設嘅顧問，向內地政府提供專業建議。不過到底市場點睇呢件事都仲喺未知知數，雖然黃少媚嘅經濟相當豐富，但咁樣換CEO法市場未必受落，首先鄭家嘅人唔做CEO，之後新世界套現返俾自己，馬紹祥就即刻走，好奇怪。
股價技術分析
至於技術分析方面，幅圖都可以話係相當之差，橫行一段時間之後跌，再橫行一段時間之後又跌，呢類嘅圖形係最應該避之則吉，比幾枝陰燭直插40%仲要差，因為如果係直插的話，到佢反彈既時候阻力同樣地會少左，所以跌得急，反彈既時候升得都會急。但新世界呢個圖形，一級一級咁向下突破，到佢要反彈嘅時候，就會阻力重重，要先過$7.1果關，之後$7.8又有一個大阻力，所以就算要直衝返高位嘅一半，都要相當大力氣。所以無論長線中線定短線都好，新世界都唔值得買入。如果仲有貨既朋友，$6.2有一個大支持位，都可以睇下佢會唔會因為轉CEO而有個小小既反彈，如果有彈到$7呢d位就好走，無彈到跌穿$6.2就點都要走。
（聲明：上述文章僅供參考，並不構成任何投資建議。讀者宜按自己的能力及認知，而作出投資決定。）
