Table of Contents
銀主盤平貨通街執
何謂銀主盤？「銀主」，即是相對於業主，屬借出貸款方。簡單講即是業主以物業作為抵押向銀行借貸，但無力還款，銀行沒收並賣出該物業以抵消債務。當經濟唔好，例如而家，業主因唔同原因供唔起物業，市面就出現愈來愈來銀主盤。十幾廿年前講起銀主盤，好多人會覺得個單位風水唔好，先會變成銀主盤；但而家係連凶宅都照搶嘅時代，銀主盤自然變成香港人趨之若鶩嘅筍貨，只係苦於門路，本文就同大家睇下最近有咩銀主筍盤，同埋教大家點買！
2022精選銀主筍盤
*以上資料搜集自不同拍賣平台與地產代理網站，資料只作參考用途
銀主盤唔一定平
雖然銀主盤係銀行收回物業出售，作為還債抵押品，而拍賣開價又通常會比市價平一截（見上表「銀主盤（拍賣）」，拍賣呎價與平均呎價分別），不過最後拍賣出嘅價錢，其實唔一定平過市價，甚至有時比街價高。一來要視乎該物業質素，靚盤靚裝多人競投，求過於供，自然貼近市價；遇到特色單位，例如打通相連／複式單位，本身已難估價，就有機會高價賣出。另外，近來樓價急速下跌，亦要留意若後市不如預期，銀主盤都有機會買貴咗。
銀主盤拍賣伏位
買銀主盤，無論經拍賣還是地產代理，記得一定要約睇樓，就如一般樓宇買賣一樣，都要先驗貨，唔好見價錢平就心急跳過。另外，你亦應該留意以下幾點：
● 單位有冇欠錢：最簡單就係睇吓上一手有冇拖欠管理費、水電煤氣費等。
● 是否凶宅：就如一般樓宇買賣，盡量check下該單位是否凶宅，就算你百無禁忌，都睇下會否影響銀行估價，以免按唔足。
● 有冇連租約：如果連租約，按揭成數會降至4至5成。
● 有冇樓契：如果冇契就上唔到會，要full pay。另外，亦有少部分銀主盤係「半契」，即是得一半業權，小心唔好貪平投錯。
● 有冇僭建物：常見於村屋銀主盤，如有僭建物你有機會需要自費拆除。
– 常見問題：銀主盤做唔做到按揭？-
答案係「得」！簡單講，其實同一般樓宇買賣一樣咁做，銀行一樣咁審批，冇分別。
地產代理銀主盤 請大膽開價
除咗拍賣，你上網搵銀主盤，都會見到好多係地產代理盤，同正常地產樓盤一樣，有晒單位資料，大部分都有相睇，亦可以約睇盤。不過如同上面「銀主盤（地產盤）」表列，你會見到地產代理銀主盤開價非常貼近市價，留意返地產代理呢個價只係參考價，想買呢類盤你可以大膽啲，嗌個靚價，代理會幫你向銀行落bid，中唔中標視乎該單位需求。
銀主盤公開拍賣流程
銀行亦會委託拍賣行，將銀主盤公開拍賣，拍賣有指定日期、時間，上網就會搵到，非常透明，亦向公眾開放，簡介流程如下：
1. 拍賣行於網上貼出拍賣日期、時間、地點，與及當日拍賣單位詳情，包括物業地址、面積、開價、睇樓日期、聯絡方法等。
2. 已交吉物業，可預約於指定日期睇樓。
3. 拍賣當日，有意買銀主盤嘅買家，帶同臨訂於指定時間到達拍賣現場。
4. 進行拍賣，即場投標，價高者得，當然最後出價要高於銀行底價。
5. 成功投標買家，即時交訂簽約。
Follow我們 Social Channel 得到最新資訊 : IG: wavingcat.hk FB: WavingCat招財貓
