老老實實唔係針對保險經紀，不過最近真係見到有人心地差到令人懷疑佢有冇heart去跟啲客嘅保單，又玩過龍被保險公司中止合約，令大批客人嘅保單變孤兒單！其實點解唔考慮上網買虛擬保險，跟返自己張保單呢？放心啦，而家好多人都咁做，除咗免去遇到極品agent嘅風險之外，虛擬保險比起傳統保險仲有4大優勢！
Table of Contents
香港虛擬保險公司 與 虛擬保險產品 現況
所謂虛擬保險，其實定義好簡單，就係純網上嘅保險公司，傳統保險公司嘅網上業務係唔算嘅。在呢個定義下，現時香港有5間虛擬保險公司，其中Blue本身有保險牌，而另外4間包括Avo、Bowtie、OneDegree同ZA Insure，就係政府為發展創新金融科技而特別發牌俾佢地營運。以下係5間虛擬保險公司現時提供唔同種類保險嘅保險產品數量（資料截至2023年6月6日）。為免影響閱讀，我會在文章最後列出返各虛擬保險公司嘅保險產品。
虛擬保險 優勢1：保障簡單直接
虛擬保險通常會將保險產品設計得更簡單同直接，務求你無須借助保險經紀講解，自己都睇得明保險條款，亦會攞走一啲同保障無關嘅元素，特別係儲蓄成份，等你可以買到最純粹嘅保障，而無需處理其他多餘嘅枝節。無儲蓄成份嘅好處，你去睇下虛擬保險嘅人壽保就會明白，平平地幾十蚊一個月都買得到，保費變得好輕鬆就負擔到。
由於每種保險變成純保障之後，保費都超平，你就可以就自己需要，買多幾種唔同嘅保險，管理返一啲之前由於保費過高而無法cover嘅風險，例如買完人壽仲可以買埋醫保同家居保，以前邊夠錢買咁多種？
虛擬保險 優勢2：透明度高
虛擬保險由於係全網上運作，所以盡量都會將重要資料放在網頁，就算唔當眼，都起碼俾你搵得到詳情，比起傳統保險，透明度高好多。透明度高好處係容易同其他保險互相比較，如果某啲保障呢間寫得唔清楚，你都可以幫襯第二間，唔使同佢磨爛蓆。
虛擬保險 優勢3：無需佣金
上面講到虛擬保險保費超平，除咗因為剔除咗儲蓄成份等嘅多餘成本之外，更由於虛擬保險純網上運作，唔使請保險經紀跟你張保單，自然就唔需要分佣金俾經紀，恭喜你唔使再貼錢俾人sell你買保險，亦唔需要被保險經紀嘅品德影響你張保單！
虛擬保險 優勢4：同樣受監管
同虛擬銀行一樣，香港嘅虛擬保險公司，同樣受到監管，監管虛擬保險公司嘅機構係保險業監管局（保監局），同其他傳統保險公司並無分別。虛擬保險公司都要滿足《保險業條例》中訂明嘅幾個嚴格條件，包括「充足的股本」（最低HK$2,000萬）、「充足的償付準備金」等。另外虛擬保險同傳統保險一樣，都會有再保險（Reinsurance），即是保險公司自己都會買保險去分擔風險。所以虛擬保險同傳統保險，安全性係一樣嘅。
香港虛擬保險公司保險產品一覽
以下資料截至2023年6月6日。
Follow我們 Social Channel 得到最新資訊 : IG: wavingcat.hk FB: WavingCat招財貓
