【FB二號人物走先啦,係咁先啦】財經專欄|財經卒仔

FB

FB 首席運營官(COO) Sheryl Sandberg禮拜三喺FB出post話會喺今年秋天sayunana。如果有跟開FB業績既可能都知Sheryl對FB有幾重要,每年業績會上,有關廣告業務都係Sheryl負責講。

由Javier接替做COO

Sheryl加入FB前做過財政部長辦公室主任、又做過Google高層,對廣告業既了解,團隊管理經驗、政經人脈都非常豐富。喺2008年加入FB時,Sheryl已經39歲,朱仔仲係24歲既花靚仔,幾乎FB成個廣告業務都係Sheryl湊大。有咗Sheryl幫手處理生意,同各界打交道,包括政府關係,令到朱仔可以全心全意聚焦產品。黎緊接替Sheryl做COO既係原FB既首席增長官Javier Olivan。Javier比Sheryl仲要早一年入FB,佢之前主要戰績就係帶領FB國際化,令Meta family of apps由4千萬用戶變到而家30億用戶。 喺FB經歷重大變革同挑戰之際,Sheryl選擇離開,當然令FB既uncertainty又再高啲。Javier接替後主要任務肯定係要扭轉FB放緩既廣告收入同用戶增長,而朱仔就專心攪佢個元宇宙。

倉務管理

今個禮拜盈富(2800)喺31/5派咗息,大拿拿$160,扣埋$20手續費,得返$140。另外,騰訊、利亞、平安都已經除淨,除淨後未派股息有成兩皮野,喺6月底前會陸陸續續收到,加埋原有現金五千,夾埋會有兩萬五買貨。錢唔係多,都係加返原有Portfolio啲股票。騰訊同利亞已經到咗我倉位上限,唔會再加倉住。即係得返平安、FB、國際家居零售揀。其實平安、FB啱啱入貨嗰時已經打爆倉位上限,只不過佢地唔爭氣,跟唔到成個倉既升幅,變相倉位佔比跌咗。如無意外,今次我會加倉平安,希望我加倉前佢會跌返多少。假設每股$47入到,應該會買多500股。

同志同道合朋友一齊討論

至於我呢,近排都好很忙。難得解禁,梗係捉緊時間做gym打網球約食飯,加埋公事,攪埋個page就忙上加忙,不過幾忙都好,都唔會放棄唔update個page。對我黎講,個page唔單止係分享我對投資所思所想,更加係一個平台,俾志同道合朋友一齊討論、互相學習。當然,總有人同你觀點唔同,但正正因為唔同,先可以擦出火花。對與錯,視乎角度,投資方面更加係。如果睇完我啲文,你會心情不順的話,可以選擇不看,言語刁難、甚至攪破壞,免了。人生有限,將時間花於更值得花既地方吧。

本周交易

無。

目前倉位

騰訊(700)41.4%;利亞(831) 20.4%;平安(2318) 12.5%;Meta(FB) 8.9%;國際家居(1373) 10.8%;盈富(2800) 3.8%;現金 0.5%;除淨後未派股息1.8%。回報:今個禮拜組合上升2.0%,15/3/2022中午開倉至3/6/2022;回報率:12.7%,同期恒指(總股息累計指數)回報率:12.1%;組合現值:1,126,593。

* 此文章由專欄作家:財經卒仔提供

Facebook: 經卒仔
Instagram: finsmallsoldier

免責聲明:本平台發佈的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本平台及相關作者無關。而WavingCat旗下網站或社交平台的網誌內容及觀點,僅屬筆者個人意見,與WavingCat立場無關。WavingCat對因上述人士張貼之資訊內容所帶來之損失或損害概不負責。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓