去日本應該簽邊張信用卡?海外簽賬回贈/手續費/匯率完全比較

日本簽卡

日元匯率依家好低,去日本食玩買已經打咗折,如果用啱信用卡畀錢,計落平上加平。冇錯,計吓用邊張卡最平係好複雜,既要計匯率,又要計手續費同埋回贈,但都唔可以懶,因為帶啱卡真係可以慳好多!今次等筆者代勞,幫大家比較市面嘅日本簽賬信用卡!仲有匯率比較實測,好有參考價值!

日本簽卡 留意外幣交易手續費

去日本,同去其他海外國家一樣,簽賬係會有外幣交易手續費,下表係唔同信用卡系統嘅外幣交易手續費。留意唔同銀行出嘅信用卡,外幣交易手續費有可能同信用卡系統唔同,不過通常只會少過以下數字,唔會多過。

信用卡種類外幣交易手續費
銀聯 UnionPay0%
JCB1.95%
Visa1.95%
MasterCard1.95%
美國運通2%

大家見到,只得銀聯係唔收外幣交易手續費,其他都收接近或直頭係2%,貴到爆!咁係咪揀銀聯就冇錯呢?我哋繼續睇落去。

唔好睇少匯率 但亦都唔好太重視

外幣交易手續費之外,日本簽賬成本仲有匯率。要明白外幣交易手續費頂盡都係2%,但匯率淨係買入賣出價隨時都唔止相差2%,所以唔好睇少匯率。不過,同時都唔可能太重視匯率,有以下兩個原因。

唔係間間都有得查匯率,難以比較

大家都知道,匯率好海鮮價,尤其近月波動好大,加上唔同機構,每日嘅買入賣出價都唔同,其實好難比較。而且,唔係想查就有得查,以下係各信用卡系統嘅匯率查詢渠道,唯獨是JCB同美國運通就冇得咁check。

匯率計法不透明

另一個更大問題,係匯率計法根本唔透明。舉例,你知唔知信用卡簽賬係計邊日匯率?即是,你今日簽賬,聽日見到條數,咁匯率係計今日定聽日?好多人覺得梗係計今日啦,唔係點樣睇住匯率高低嚟簽?咁你就錯,筆者問過幾間銀行,都有唔同講法,例如美國運通係計誌賬日而非簽賬日,滙豐仲犀利,CS回覆可能係簽賬日,可能係誌賬日,冇固定日子,總之跟返月結單就啱。

實測飛日本 信用卡簽賬成本完全比較

雖然匯率咁麻煩,但簽完之後再返轉頭,都可以比較到的,筆者10月飛日本,曾經同日簽過美國運通Explorer同埋東亞銀行JCB,都已經出月結單。當日美國運通匯率為0.0527,JCB匯率為0.0524,再翻查同日銀聯、Visa、MasterCard匯率,分別為0.0526、0.0525、0.0532。

有以上資料,就可以計返唔同信用卡,同一日內扣埋外幣交易手續費,同埋計埋信用卡日本簽賬回贈,簽指定日圓簽賬(分別為20,000日圓、100,000日圓、1,000,000日圓),最後要找幾多卡數。

當然,剛才都已講過,唔同卡匯率計法唔同,未必全部都用同日匯率,加上匯率每日唔同,當日MasterCard匯率最高,唔代表日日都最高,所以實測結果都只能用來作參考用途。

日本簽賬回贈/手續費/匯率比較表

信用卡匯率外幣交易手續費日本簽賬回贈簽賬 20,000 日圓簽賬 100,000 日圓簽賬 1,000,000 日圓
滙豐Visa Signature0.05251.95%5.60%HK$1,010.14HK$5,050.69HK$51,276.93
滙豐白金卡0.05251.95%4.40%HK$1,022.98HK$5,114.89HK$51,918.97
安信 Earnmore 銀聯卡0.05260%2.00%HK$1,030.22HK$5,151.10HK$51,511.00
富邦白金卡0.05251.95%3.20%HK$1,035.82HK$5,179.09HK$53,303.04
渣扛Smart信用卡0.05250%0.56%HK$1,043.72HK$5,218.58HK$52,185.80
AEON WAKUWAKU0.05321.95%3.00%HK$1,052.81HK$5,264.03HK$53,968.39
AEON JCB0.05241%0.40%HK$1,054.79HK$5,273.93HK$52,739.26
中銀淘寶World萬事達卡0.05320%0.40%HK$1,060.35HK$5,301.75HK$53,017.48
美國運通Explorer0.05272%1.25%HK$1,061.69HK$5,308.46HK$53,084.58
東亞銀行JCB0.05241.95%0.40%HK$1,064.71HK$5,323.53HK$53,235.33

Visa:滙豐、富邦 日本簽賬回贈高

Visa嘅優勢並非來自匯率或外幣交易手續費,而係來自個別極高回贈信用卡產品。例如滙豐雙卡:滙豐Visa Signature、滙豐白金卡,如果選擇賞世界,再登記最紅海外簽賬,日本簽賬可以分別做到高達5.60%及4.40%回贈。富邦白金卡都唔差,可以做到3.20%回贈,遠高於外幣交易手續費,因此名列前矛。

銀聯:免外幣交易手續費有優勢 但高回贈信用卡不多

文章開首提出一個問題,既然銀聯免外幣交易手續費,係咪揀銀聯就冇錯?錯唔晒,不過銀聯卡通常回贈唔高,所以日本簽賬來講,安信 Earnmore 銀聯卡嘅2%已屬頂級。另外,坊間一直有個講法,話銀聯匯率通常差過Visa同MasterCard,在今次實測中就見唔到呢個情況,當日銀聯匯率介乎Visa同MasterCard之間,其實差唔多。

MasterCard:有2張免外幣交易手續費

MasterCard收開1.95%外幣交易手續費,但市面上有兩張MasterCard豁免咗,就係渣扛Smart信用卡同埋中銀淘寶World萬事達卡。兩張都係低比率但無上限回贈,分別為0.56%同0.40%。如果簽賬額去到好高,就會開始展現優勢,不過一般旅行,都係唔夠銀聯同埋個別Visa好。

美國運通:要睇當日匯率

美國運通收最高外幣交易手續費(2%),回贈率較佳嘅美國運通Explorer則好都係得2%,打個和。不過有江湖傳聞,美國運通匯率靚過其他好多,但從今次實測就見唔到,但筆者唔敢否定人哋講法,可能某些日子係會贏到其他卡都未定。

JCB:去日本簽賬未見優勢

一個好正路嘅諗法:揸住JCB去日本,仲唔係最著數?事實的確唔著數,但錯不在JCB,而在香港太少JCB卡,只有AEON JCB同埋東亞銀行JCB兩張。剛好兩張都高手續費低回贈,就被比下去了。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓