近日種種打擊，都無動搖到Facebook揸住既兩大王牌。
先有Apple新私隠政策打擊佢既廣告業務，後有前員工爆佢大鑊唱衰佢個朵，因為咁，資本市場都唔多想理佢，股價麻麻地。但你仍然係咁黐佢，即使有MEWE、Clubhouse呢啲平台出現，都對佢不離不棄，走唔出佢手指罅。全因為呢兩張王牌，至今無人能破。
Table of Contents
網絡效應
好多人都話Facebook已經好耐無創新，淨係識抄人野，Story就抄Snapchat，Reels就抄Tiktok。You are damn right！Facebook左抄右抄，抄到佢年收入過千億美金，賺到盆滿缽滿，就係因為社交網絡係一個極好既商業模式。個人社交平台對於用戶既價值會隨著用戶啲親朋好友加入而提升，當Facebook建立咗網絡效應，就算同類社交平台產品設計、用戶體驗等各方面都好過Facebook，只要用戶既親朋好友唔係一窩蜂搬去新平台，都難以撼動Facebook既優勢。
高轉換成本
好多人都鬧Facebook，但又離唔開佢，咪就係因為有「感情」囉。Facebook見證住你大中小學畢業、第一份工、結婚生仔等等等等，儲埋儲埋咁多相、post、share、留言，全部都係回憶。想唔玩轉場，咁多有價值既內容就帶唔走。要放棄過往啲回憶，你捨得咩？
咁講法，即係 Facebook無敵啦，我地都俾佢食住啦？咁又唔係喎。
成功源於求偶市場
事關以上所講既優勢，僅限於existing既用戶。啱啱開始玩social media既細路仔，就唔一定要用Facebook，而且同老豆老母用同一個platform，好似俾佢地昅住晒，寧願試新野、建立自己既小圈子。
咁就弊啦。Social media原始動力，就梗係用黎溝仔溝女! 點解Facebook一開始係大學爆成功，因為班大學生最熱衷既活動，就係求偶。而家我識個班人已經愈黎愈少post野，如果無埋班後生仔女，Facebook可能會變成一潭死水，淨係用黎睇新聞。朱克伯格都aware到呢樣野。
為求閱讀體驗而放棄嘗試
喺Q3業績會上話，目前Facebook同Instagram係以滿足大部分人既需要為主，但黎緊要大變，18至29歲既young adult先係佢地所有apps既北極星，要以滿足佢地為主，其他所有用戶都要企埋一邊。
我都好好奇，佢會點變。因為Facebook所有格式仲係好rigid，同一句想用唔同字型、唔同顏色都唔得，好明顯係為咗大部分人既閱讀體驗，而放棄咗有趣既嘗試。究竟朱仔贏唔贏得返班後生仔既心，可能要問下佢兩個女。如果你係00後，咁啱有玩facebook又咁啱睇到我篇文，話我知，到底你地用緊咩social media。
*此文章由專欄作家：財經卒仔提供
FB: 財經卒仔 (https://www.facebook.com/FinSmallSoldier/)
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
Follow我們 Social Channel 得到最新資訊 : IG: wavingcat.hk FB: WavingCat招財貓
