相信好多人同筆者一樣，對於近來每日不停收到嘅騙徒電話、SMS、Whatsapp，甚至近來連Facetime都有唔識嘅人不停打嚟，而深感困擾同埋憤怒。要點解決？靠人冇用，大部分人都只係會叫你自己小心，咁惟有靠自己。筆者研究多日，終於知道點set電話可以一勞永逸，在騙徒有新招之前享受返片刻寧靜。
Table of Contents
不停打嚟，忍到極限
其實今年開始筆者每日都會收到平均兩至三個短訊或電話，最嬲一次，係一個3字頭電話，一次唔聽，兩次唔聽，呢條友一連打咗6次嚟，咁緊急自然忍唔住聽下係咪其他客戶打嚟啦，一聽，條友理直氣壯咁大大聲自稱係 XLend貸款打嚟，好似筆者唔聽係唔啱咁！一收線，Facetime就響，嚇到電話都差啲跌。真係忍夠！於是筆者決心搵方法解決呢個問題！
第1步：必須要裝可疑來電欄截軟件
首先第一件事，手提電話必須要先裝有可疑來電欄截軟件，佢地會有個可疑電話嘅database，可以幫你screen走大量垃圾電話，你需要經常更新個database先有效。你自己收到可疑來電，都可以透過可疑來電欄截軟件回報，下次就唔會再收到。以下係市面最多人用嘅可疑來電欄截軟件，功能差不多，唔喺度比較喇，盡快搵個裝左佢先，唔就手再換個試下吧。
第2步：將電話設定為只允許聯絡人來電
不過淨係裝可疑來電欄截軟件唔夠，仲有好多漏網之魚，用block嘅方法係block唔停，需要徹底一啲，用whitelist嘅概念，先開Do Not Disturb模式，將所有來電block晒，再允許contact list內嘅聯絡人（家人、朋友、工作夥伴）來電。
你問咁樣會唔會miss左好多其他電話？有機會架，尤其係如果要成日收新客戶電話，就唔好用呢個方法。但一般人一來其實好少需要收陌生電話，二來真係要搵你都可以用Whatsapp或其他messenger（會收到，但未必有alert），間中check下就冇問題。
Android設定只允許聯絡人來電方法
Android要設定只允許聯絡人來電，要睇唔同品牌手機（因為UI唔同），一般跟以下流程：
- 按「電話」，點擊右上三點
- 選「設定」
- 選「封鎖號碼」
- 開啟「封鎖未知號碼」或「封鎖未知／私人號碼」
iPhone設定只允許聯絡人來電方法
iPhone統一用ios，所以流程可以清楚好多，不過步驟亦比Andriod複雜。
- 先update ios至最新版本
- 進入「設定」
- 點選「專注模式」
- 按右上「＋」號
- 點選「自訂」
- 為新專注模式輸入你喜歡的名字與顏色
- 在你加入嘅新專注模式點選「聯絡人」
- 第一格選「允許下列通知」，第二格清空，第三格選「只限通訊錄聯絡人」，第四格開啟。像下圖一樣：
9. 回到你你加入嘅新專注模式，點選「App」
10. 第一格選「允許下列通知」，第二格選一些你需要收到通知嘅App，第三格隨自己需要關啟或關閉
11. 回到你你加入嘅新專注模式，拉到下方「設定時間表」，「智慧型啟用」選擇「關閉」
12. 完成
Follow我們 Social Channel 得到最新資訊 : IG: wavingcat.hk FB: WavingCat招財貓
