信用卡交租 揀啱平台 回贈夠買日本機票?

信用卡交租

同朋友傾開,先知原來好多人都唔知道,交租係可以用信用卡交,賺取回贈。以往里數好用時,筆者都用信用卡交租賺過幾套日本機票。個原理好簡單,只要你嘅業主接受銀行過數交租,你就可以利用市面上嘅交租平台,平台會畀你碌卡,賺網上簽賬回贈,然後平台會幫你過數畀業主。咁當然平台會收手續費啦,但只要手續費少於回贈,你都有得賺!

信用卡交租平台比較

以下係4個主要信用卡交租平台嘅手續費等比較,呢度都簡單講一講,選擇其實唔係咁多。

  • Keychain Pay有同滙豐合作,所以滙豐信用卡只收2.1%手續費,以往多數用嚟配合滙豐Red Card 4%回贈,或者滙豐Visa Signature 5.6%回贈使用,賺取超多回贈。不過除住Red Card回贈上限一cut再cut,同埋2023年滙豐Visa Signature未知仲做唔做到5.6%(滙豐網上回贈優惠未確定續唔續),需要觀望。但佢可以夾2張卡一齊交嘅功能就非常好用(即是租金高於回贈上限,可以再加多另一張卡食回贈)。
  • RentSmart強在銀聯手續費極低,但佢同時MasterCard都做緊優惠,所以暫時係手續費最平嘅平台(唔計Visa)。另外RentSmart可以一次用6張信用卡付款,令到佢可以有好多玩法。
  • Reap除了交租之外仲有好多用法,不過本文只討論交租,現時Reap嘅手續費欠缺競爭力,需要再觀望。
  • Citi PayAll只能使用Citi信用卡,最初推出時,交租非常好用,因為手續費只係1%,而且可以食到信用卡迎新!筆者頭一套日本機票就係咁嚟!當然好快就取消咗,而手續費最近又改咗,要使用時先知手續費係幾多(據聞最高4%),可以好高。不過就算手續費唔高,限制使用Citi信用卡都係問題,因為Citi正正係欠缺網上簽賬高回贈卡,所以筆者唔推薦用Citi PayAll交租。
平台優惠手續費多卡付款VisaMasterCard銀聯美國運通
Keychain Pay滙豐信用卡 2.10%2張2.9%2.1%/2.9%
RentSmart銀聯限時推廣手續費HK$256張2.4%1.9%HK$25/
Reap//2.6%2.6%2.6%/
Citi PayAll//高達4%高達4%//

交租信用卡回贈率與回贈上限

正如上文所講,信用卡交租係計網上簽賬,所以要揀網上簽賬高回贈嘅信用卡,而除回贈率外,有回贈嘅簽賬上限都好重要,以下上限中,筆者已經將部分計全年嘅上限除返開12個月,統一換算成每月上限,咁樣易計啲,大家易比較啲。

信用卡回贈率每月簽賬上限
滙豐Red信用卡4%HK$12,500
滙豐Visa Signature5.60%HK$8,333.33
信銀Motion信用卡6%HK$3,333.33
Aeon Wakuwaku6%HK$5,000
Earnmore銀聯卡2%HK$12,500

信用卡交租 不同租金回贈計算例子

當夾埋平台同信用卡一齊,就會衍生出唔同玩法,但主要利用多卡付款功能,先使用最高回贈嘅卡交部分租金,剩低嘅租金就再夾另一張或多張信用卡去交。

以下係兩個比較常見嘅高回贈組合,你會睇到交唔同租金可以賺到幾多回贈。

平台Keychain PayRentSmart
信用卡組合Aeon Wakuwaku + 滙豐Red信用卡Aeon Wakuwaku + 滙豐Red信用卡 + Earnmore銀聯卡
回贈(扣除手續費)
每月交租HK$5,000HK$195.0HK$205.0
每月交租HK$10,000HK$290.0HK$310.0
每月交租HK$15,000HK$385.0HK$415.0
每月交租HK$20,000HK$405.0HK$492.5
每月交租HK$30,000HK$295.0HK$692.5

(忠告:借定唔借,還得到先好借)

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓