話說經歷完3年疫情，好多行業都開始回復生機，好似的士業咁，捱足3年，而家終於唔使戴口罩，大家又好似以前咁call車去機場搭飛機去旅行，遊客又重臨香港俾黑的劏！不過睇返市區的市牌價，竟然不升反跌，而家已跌到430萬，去返2010年價位。既然而家的士牌價回落到咁低，係咪投資好時機呢？筆者用數據同大家分析下！
Table of Contents
市區的士牌價走勢圖
首先睇返以上由1996年至2023年嘅市區的士牌價走勢圖。我地可以見到幾點：
- 市區的士牌價在2000年代不斷於200萬至400萬之間徘徊，直至2010年終於升破400萬之後都未回落過400萬樓下；
- 2013至2015年係市區的士牌價最高峰，達到700萬以上，在當年接近可以買到一個二手三房單位；
- 2015年後，市區的士牌價不斷下降，至2019年終於跌穿500萬；
- 3年疫情期完結後，市區的士牌價已跌足8年，不過2023年疫情完結牌價竟然不升反跌。
的士租金回報計算
牌價跌，以一個資產去計，當然不利，不過另一方面，的士牌會同時可以產生租金收入，當牌價愈跌愈低，理論上租金回報亦會愈高。
現時較新嘅混能的士，每月租金約HK$25,000（舊款豐田4座位約HK$18,000/月），以現時430萬牌價計算，回報率達6.9%！以租金回報計係非常理想。
如打算出租賺回報，都要留意，之前3年疫情期間，絕大部分車主都需要長時間大量減租，顯示的士出租容易受大型社會事件／公共衛生事件影響收入，如果要供牌，就需要小心現金流，以免突然供唔起。
市區的士牌價前景
即使租金回報理想，但都要睇返個牌價，如果會一路繼續跌，咁幾好租都冇用啦！以下我地一齊睇吓的士牌價嘅前景。
1. 按揭利率正在上升
同樓價一樣，由於買的士牌大部分都會做按揭（通常按7至8成），所以市區的士牌價同樓價一樣，都受按揭利率影響。現時香港早已過咗低息期，按揭利率由舊年年中一直升，銀行同業拆息一度升破5厘再回落至現時約3.553厘。除非突然大量減息，否則利率無法帶動的士牌價上升。
2. 政府唔正面處理Uber問題
市區的士牌價下跌，其中一個最大原因，係2014年Uber登陸香港。呢度先唔討論Uber同的士邊個好服務同埋抵坐，純粹講返Uber出現對的士行業影響。以下論點係筆者同幾位的士司機詳談後得出。
Uber對比的士，在工作成本上，有非常大優勢。首先揸的士係要考的士牌照，而且相當難，要記好多路，而Uber係唔需要；的士一定要租車，先可以開工，每月車租都萬幾兩萬，Uber唔使，好多Uber車手30幾萬出架Tesla Model Y就可以開工，供車都係幾千蚊個月，又慳電又多人call；的士要買的士保險，每年保費差不多HK$50,000，Uber唔使，買一般車保就得（而其實Uber載客正常保險係唔受）。
而的士作為係政府發牌嘅交通工具，多年來對Uber嘅競爭，都唔正面處理。話說話唔係合法，但一日唔提供一個清晰嘅說法，其實的士真係好難投資，你點知之後會唔會再有多幾間國產Uber又開嚟香港？
3. 的士需求已經轉型
以往的士係有必要性，以前好多地方未有港鐵覆蓋，好多人都會利用的士做駁腳，又快又舒服。經過咁多年發展， 而家香港公共交通網絡已非常完善，的士駁腳已非那麼重要，變成更純粹用價錢換時間嘅「服務」，即是想出入舒服啲，又唔想揸車，就搭的士啦。不過，的士又真係唔爭氣，即使出現Uber咁大個競爭，的士司機服務一直都冇顯著改善，開返關後，旅客來港，又即刻多返好多投訴。既已轉型，又未符合轉型要求，談何前景？
Follow我們 Social Channel 得到最新資訊 : IG: wavingcat.hk FB: WavingCat招財貓
