今年嘅業績公佈真係精彩過睇美斯踢波，先有Netflix公佈完業績即裂口高開10%，前幾日到Meta公佈完業績後高開20%，尋日又有隻Arm高開咗40%。好多投資者會覺得，升到咁高，又有個裂口，唔係好買得過喎，陣間補裂口咪死。呢個觀念係十分正確，不過咁你睇吓Nvda，上年5月24，咪一樣裂口高開25%，一下升到上$380，半年之後升到上$700，個裂口少少都無補過。
雖然話軟銀旗下ARM係第3隻咁樣爆嘅股票，但今次Arm同上次Netflix，Meta有2個唔同嘅地方係好值得留意。第1，睇潛力，AI係嚟緊嘅趨勢，同甚麼虛擬貨幣，NFT完全唔同，之後係足夠改變全世界人類號生活模式，而AI所需嘅上游，甚至講緊所有科技嘅上游一定係晶片。而Arm正正就係做晶片設計，當全世界都打緊晶片戰嘅時候，可想而知呢個板塊係幾重要，同埋可發展嘅潛力係非常大。
Netflix難做到呢樣，佢個模式要點變先做到足以改變世界嘅生活模式？所以相比之下，Netflix可以發展嘅潛力就無咁大。咁當然Meta嘅發展潛力都可以好大啦，雖然佢個元宇宙計劃失咗蹤，但始終佢都係科技界嘅龍頭，發展潛力一樣可以好大。不過咁龍頭有龍頭嘅問題，就係市值太大，Meta可以再爆升嘅空間有限，你試諗下，港交所升跌20%機會大啲定碧貴園升跌20%機會大啲？
總括而言Arm做晶片設計，依加啱啱跑咗出嚟，仲要有軟銀撐腰，發展潛力夠哂大，市值都只係千幾億，股價長線嚟講仲有力上。不過呢一刻都未係可以即刻All in住，因為通常呢啲裂口高開完都會有一段時間嘅橫行調整，依加應該會有班人襯佢高位短炒沽貨，又或者係止賺，所以俾嘅時間佢消化呢一段時間嘅沽盤先。等佢橫行一排，出咁個區間，再一個大成交升穿先再買入都未遲，呢隻絕對值得大家密切留意同等待。
Follow我們 Social Channel 得到最新資訊 : IG: wavingcat.hk FB: WavingCat招財貓
