信用卡不再安全?信用卡盜用/ 銀行唔睬你 必學自救步驟

信用卡盜用

無耐前有銀行發生多宗信用卡被盜用事故,非常大單,一來嗰間銀行好多人有,二來當消息傳出後,太多人關心,卡centre電話打唔通,網上銀行又用唔到,連App都死埋,人心惶惶,但銀行都算回應得快,講明未經授權交易客戶唔會上身,先令事件降溫。事實上香港愈來愈常發生信用卡被盜用事故,更曾發生被盜用後銀行唔理咁多,要消費者硬食情況。香港人不禁要問:究竟在香港使用信用卡,仲有冇安全可言?如有,又應如何自處?本文為你詳細解構。

2021年起 信用卡盜用愈趨嚴重

首先睇睇數字,下表係過去5年金管局收到有關信用卡未經授權交易嘅投訴數字,可見由2021年起,數字比之前係倍數上升,2022年去到10月就已經有307宗,都未計渣打今次呢單。但上升原因,金管局就冇特別講。

年份201720182019202020212022(截至十月)
投訴數字53765188329307

信用卡被盜 責任誰屬?

在今次事件之前,亦有其他銀行發生被盜事件,更有事主投訴到上《東張西望》,批評銀行好好處理,卡主一樣要無奈找幾萬蚊卡數,導致今次渣打被盜事件,受影響人士更為緊張,究竟銀行會唔會要自己賠呢?

就呢個問題,2022年12月7日金管局於立法會終於有清晰回應:「一般而言,若持卡人信用卡賬戶被他人用作未經授權交易,而持卡人並無作出任何欺詐或嚴重疏忽行為,持卡人不需為這些未經授權交易承擔責任。」即是如你作為卡主,並無授權有關交易的話,被盜責任就不在你。佢咁樣答完,即刻清楚好多!

如何預防信用卡被盜用?

又嚟到講過好多次,但通常都唔啱聽環節。究竟信用卡卡主,要點樣預防自己張卡被盜用呢?嗱,老老實實呢個世界冇100%防盜嘅,如果銀行被hack其實你點小心都會中招,不過做足以下幾點,起碼唔係自己衰先。

  1. 設定安全性高密碼,唔好再用自己生日做密碼喇,換個真係安全嘅密碼啦!
  2. 定時更改密碼,同埋唔好換個差唔多嘅就算。
  3. 睇清楚月結單,有冇可疑交易。
  4. 小心釣魚網站,唔好見掣就撳。
  5. 付款時唔好用公共Wifi。
  6. 電腦要定時做防毒檢查。
  7. 收到奇怪OTP唔好由得佢,東張西望好多苦主就係衰呢樣!
  8. 記唔記得上文金管局話持卡人唔需為未經授權交易承擔責任?所以,記得唔好從任何渠道授權任何你唔清楚嘅交易,就最保障到自己。

信用卡被盜用 如何自救?

咁真係唔小心信用卡被盜用,好似今次班苦主咁,一晚被人碌十幾次喇,應該點做好?

  1. 第一時間冷靜啲先,信用卡卡背有電話,打電話通知銀行,停咗張卡同埋等銀行回覆會點處理。
  2. 如果好似渣打今次咁,係集體事件,打唔通電話,就嘗試用網上ebanking,或者銀行手機App,鎖咗張信用卡先,以免繼續被碌。
  3. 報警,打去反詐騙協調中心(ADCC),電話18222。

信用卡被盜用 銀行唔認數 投訴渠道

要知道銀行都唔係開善堂,遇到上報完,甚至報埋警,都唔肯「幫你處理」(咁即是要你賠啦),咁可以點?係咪吓吓都要搞到上《東張西望》先有啲希望?唔敢講一定幫到你,但有一個機構你應該第一時間聯絡,就係金管局(HKMA)!簡單講,香港銀行都受金管局監管,包括銀行發出嘅信用卡,而你千其唔好以為向金管局投訴好麻煩,其實超簡單,以下方式都可以:

●   網上投訴表格:https://bankcomplaint.hkma.gov.hk/#/?lang=tc

●   PDF投訴表格:https://www.hkma.gov.hk/media/chi/doc/other-information/complaint_form_chi.pdf

○   電郵:[email protected]

○   傳真:(852) 2509 3990

○   郵寄:投訴處理中心,香港金融管理局,香港中環金融街8號,國際金融中心2期55樓

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓