【 財經卒仔每周盤點 】大陸放水陸續有嚟|財經專欄|財經卒仔

財經卒仔

香港疫情開始放緩,下個禮拜終於可以打返波!我個friend今朝晨早起身Book網球場,個server死晒機,電話電腦一齊禁左個幾鐘,先至Book到下個禮拜五夜晚9-11點,超級旺場!但今次輪到大陸疫情爆大鑊,尤其係上海,對大陸經濟就梗係PK啦。疫情呢啲野,最慘係唔知攪幾耐。其實疫情由2020年初開始,到而家已經遠遠超出咗我當初既想像,我係無諗過會攪咁耐。所以如果要靠估中疫情,先可以喺股市賺錢,咁就食得茄啦。 呢個只係財經卒仔既投資記錄,入面任何操作同睇法,都有可能錯到離譜。文中提及既股票都有清零風險,一定要獨立思考,自己錢自己孭飛。

大陸放水陸續有嚟

李克強禮拜三先話會適時運用降準等貨幣政策工具支持經濟,尋晚人行就宣布,會喺4月25號降準四分一厘。但之後會唔會減息就好難講,事關大陸3月份CPI升1.5%,高過預期,更高過前值0.9%好多,意味升得好快,所以就算減息,都好手緊。不過overall,貨幣政策大方向都係放水,我估今年整個政策環境都會好啲。其實呢啲野我識條鐵咩,我淨係知啲野衰到咁上下就會有轉機。

遊戲版號重啟 好出奇咩?

自從上年7月22號起,停咗263日既遊戲版號終於喺4月11號重發。我之前都講過,停版號確實會對騰訊國內遊戲收入做成影響,事關唔係隻隻Game都好似《王者榮耀》咁長期受歡迎。好多Game都係出嗰排,啲人貪新鮮玩下,無耐就唔玩,如果你唔繼續出新Game,收入就會跌。據報道,淨係舊年下半年,已經有1萬4千間遊戲公司頂唔順收皮。就算繼續頂住唔執既公司,都要cut budget,停項目、裁員、減人工。對於騰訊,呢段時間反而迫佢加快開發海外市場。騰訊海外市場佔總遊戲收入已經有三成,愈黎愈接近佢地五成既目標。當年2018年3月29號開始停版號,直至2018年12月19號解禁,足足停咗265日,時間同今次非常接近。上次停版號嗰時,騰訊股價就由四百幾跌到落二百幾,重啟之後,就試過升到七百幾。當然,騰訊呢浸由高位跌落黎唔止因為停版號,但重啟肯定係好事。

平安數據小驚喜

平安禮拜三晚出咗首季保費數據,壽險及健康險個人新業務收入仲係要跌15.7%,不過上年基數係比較高,而且唔好唔記得,上年agent人數仲有成百萬,今年得返60萬人咋,所以agent平均新單收入應該係高咗。另外一個數字值得高興既係,個人續期業務收入按年上升3.82%,終於企穩,舊年係全年每個月都要跌。由於平安好多agent走咗,佢地啲舊單就變咗孤兒單,部分人自然會斷供,所以舊年續保收入keep住跌。而續保率跌,又會影響營運偏差跌,繼而影響營運利潤。所以今年首季續保收入企穩,係一個好兆頭。

目前倉位

騰訊(700) 41.1%;利亞(831) 21.7%;平安(2318) 14.5%;Meta(FB) 9.3%;國際家居(1373) 9.3%;盈富(2800) 3.7%;現金 0.4%。回報:今個禮拜組合下跌0.9%;15/3/2022中午開倉至15/4/2022回報率:18.4%;組合現值:1,184,298。

* 此文章由專欄作家:財經卒仔提供

Facebook: 經卒仔
Instagram: finsmallsoldier

免責聲明:本平台發佈的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本平台及相關作者無關。而WavingCat旗下網站或社交平台的網誌內容及觀點,僅屬筆者個人意見,與WavingCat立場無關。WavingCat對因上述人士張貼之資訊內容所帶來之損失或損害概不負責。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章騰訊雲為中小企及開發者推出輕量應用服務器Lighthouse
下一篇文章歌禮宣佈3CLpro抑制劑ASC11有望成為治療新冠肺炎的有效藥物