Table of Contents
海底撈大洗牌
海底撈上半年由虧轉盈，賺9千萬人仔，不過對比19年同期賺9億人仔，都仲差9成咁多，股東唔滿意、業績出左當日股價即隊(雖然業績前都係咁跌)! 可能想投資者重拾信心，所以管理層借機黎個大洗牌，一口氣委任9個新董事，當中7個介乎35至42歲，後生得黎亦都有好多前線經驗。原本係COO既楊利娟，做執董不特止，仲升埋職做副CEO，勝在工作表現傑出又夠長情。
海底撈呀姐上位記
楊利娟16歲已經入海底撈做waitress服務員，20歲已經做海底撈第一間老店既店長，做到咁上下仲有股份分。由2012年開始，楊利娟一個人睇曬海底撈所有門店運營，仲幫手打入外國市場。現年42歲既楊利娟，淨係計佢手上揸住既海底撈股份(昨日收市$27.95)都值50億港紙。
創辦人相繼辭任
有人走，楊利娟先上到位。創辦人其中之二，施永宏、同埋集團第一把交椅張勇既老婆舒萍決定辭任董事職務，原因無交代。佢兩個走唔係第一次，當年張勇諗住搞上市，而勇哥又覺得上市需要絕對控股，所以用超低價向施永宏夫婦買入部份股份。施氏一向當張勇係大佬，基本上所有野都係佢話點就點。大佬叫到，施氏點會托手踭？持股少左啫，但勇哥咁叻，公司愈做愈大，到頭來賺多左錢咪又係入自己袋。勇哥勸多幾勸，施氏索性退出埋管理層，轉投其他生意，頤海就係施永宏主力搞起。早期大部分訂單都係黎自海底撈，去到2016年直頭上埋市，家陣市值都近420億港紙。不過施氏無因為咁而忘記海底撈，中間又返去海底撈幫手。
今次施氏又走，係自己想、被勇哥勸退、抑或業績實在太差要搵人祭旗？原因唔知啦，不過啲公司大到一定程度，好多創辦人既魄力已經追唔上，又或者自己有另一番追求，索性放手。好似騰訊當初4個創辦人，而家咪又係剩低馬化騰一個。公司要進化，每個階段都需要唔同人才，創辦人退位，後生一輩先有上位機會。
海底撈分店越開越多
海底撈近年規模急速擴大，分店數目由2020年6月底935間，急增到今年6月底1,597間咁多，的確需要多啲年輕有活力既管理層，以親身經驗配合新思維，做更多改革。另外，公司內部行「賽馬制」，鼓勵創意、副品牌誕生，創造新既增長引擎，呢啲都需要更有創新能力既年輕人領導。海底撈仲係一間成長中既企業。中國有近3,000個縣級行政區，海底撈每度開間鋪，起碼可以開3,000間，依家只係一半多少少，仲有好長既路要行。股價由2月80幾蚊跌到依家30蚊都無，希望新人事，真係有新作風啦。
此文章由專欄作家：財經卒仔提供
FB: 財經卒仔
IG: @finsmallsoldier
免責聲明：本平台發佈的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本平台及相關作者無關。而WavingCat旗下網站或社交平台的網誌內容及觀點，僅屬筆者個人意見，與WavingCat立場無關。WavingCat對因上述人士張貼之資訊內容所帶來之損失或損害概不負責。
WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師，WavingCat都會幫你捉緊錢途。
Follow我們 Social Channel 得到最新資訊 : IG: wavingcat.hk FB: WavingCat招財貓
