【759阿信屋已經捱過最差時間】

阿信屋

最近疫情嚴重,好多舖頭都閂門拉閘,就算仲做緊生意果啲都鬼影唔多隻。不過有間舖頭,總係見有客喺度買野,雖然唔係話好多,但咁既時勢,算係「人頭湧湧」架喇。呢間舖頭就係阿信屋。

阿信屋帶俾大家新鮮感

而家雖然dup咗好多,但諗返2010年至2015年果陣,阿信屋如日中天,間間舖都係真正既人頭湧湧。基本上我同班同事買親零食都係落樓下阿信屋!阿信屋成立果陣,大型超市都仲未有專責部門採購零食,而且仲要通常只係由香港代理商入貨,就算你話去到優之良品、零食物語呢啲當時既零食霸主,其實啲貨都見慣見熟。阿信屋既日本水貨正正帶俾大家新鮮感,好多貨喺香港冇代理商做緊,從來冇入過香港市場,而且仲要賣得平!不過,公司實在太心雄喇,不停加開分店。

最近財年收入谷底回升

公司為左短期之內喺唔同地方搶地盤,租左好多舖頭,果陣雖然自由行帶黎既零售增長減慢,但係租金依然係貴,拖低左好多分店既營運效率,有唔少分店甚至係蝕錢既!另外,佢又搞埋啲自己根本唔熟既業務,好似茶餐廳、寢具店、Cafe同埋化妝護膚品店等等。搞零食店搞得好,唔通搞其他行業又真係得咩?仲有,零售業因為客人直接俾現金,無數期,所以現金流特別充裕,好少負債。但林老闆工廠出身,慣咗借錢擴張,公司借埋咁多債,利息一直都維持喺千萬級別,而公司每年盈利或者虧損都係千萬級別咋,利息成本對佢盈虧有超級重大影響。過多低效分店,加上副業搞唔好,借貸利息過多,令到阿信屋喺17-19財年出現收入倒退,而且仲要蝕錢。不過,最近20、21財年,公司收入谷底回升,而且由虧轉盈,仲要喺疫情、經濟咁差既情況之下實現。

關閉唔賺錢副業

其實我覺得CEC國際已經喺最差既情況走左出黎。首先,公司已經差唔多閂曬D唔賺錢既副業,閂曬營運效率低既阿信屋分店;其次,公司賣左部份虧損既電子元件業務,呢啲業務唔駛蝕落去之餘,仲拎到筆現金去還債,令到最近兩個財年既利息開支大跌,而只要唔再大幅度借貸,融資利息可望繼續慢慢減少。最近兩個財年,公司都有錢賺,而以上利好因素只要公司唔主動破壞就唔會改變,所以盈利估計之後都會keep到。問題黎喇,就公司利潤率,以至ROE有冇得增長呢。我諗都有少少,雖然唔方多。

收入將會穩定

CEC國際襯住疫情多左好多人自己喺屋企煮餸,自然要買多啲柴米油鹽,阿信屋轉型賣多咗食糧,而且仲租返大小小既舖位黎陳列多啲貨品。疫情會有再次減輕既一日,不過有左疫情最少兩三年既「培訓」,我諗好多客都慣左去阿信屋買食糧,疫情好返啲之後都應該保留到部份市佔率。咁點解公司之後增長又未必有咁多呢? 因為你攻人時人地都攻返你。宜家好多百佳、OK便利店都有賣零食相關既水貨,所以宜家對阿信屋零食黎講都有啲考驗。不過好彩,阿信屋零食銷售既重要性冇佢初初果陣咁大,食糧係必須品而零食唔係,食糧銷售佔比大啲,對公司收入既穩定性都高啲。所以話呢,CEC國際最壞既情況已經過去,之後既收入將會穩定啲,不過就唔好期望話佢會好爆囉。

*此文章由專欄作家:財經卒仔提供

FB: 財經卒仔 (https://www.facebook.com/FinSmallSoldier/)

IG: @finsmallsoldier

免責聲明:本平台發佈的所有投資分析技巧,只可作參考用途。市場瞬息萬變,讀者在作出投資決定前理應審慎,並主動掌握市場最新狀況。若不幸招致任何損失,概與本平台及相關作者無關。而WavingCat旗下網站或社交平台的網誌內容及觀點,僅屬筆者個人意見,與WavingCat立場無關。WavingCat對因上述人士張貼之資訊內容所帶來之損失或損害概不負責。

WavingCat提供即時全面的樓市、移民、置業、財經、加密貨幣、獨家優惠資訊。無論你係投資新手定係資產管理大師,WavingCat都會幫你捉緊錢途。

Follow我們 Social Channel 得到最新資訊 : IG: wavingcat.hk FB: WavingCat招財貓


上一篇文章【人均虧損逾1萬 強積金出現負回報】
下一篇文章【錯過咗第一日? 】印度神童預言又中 4月仲有一次致富時刻